ជំនួបបែបនេះ ត្រូវបានធ្វើឡើងជាបន្តបន្ទាប់ ក្រោយពីអ្នកស្រី យ៉ីងឡាក់ ស៊ីណាវ៉ាត់ (Yingluck Shinawatra) បានឈ្នះឆ្នោត ក្លាយជានាយរដ្ឋមន្ត្រីថៃ នៅក្នុងការបោះឆ្នោតសកល នៅខែកក្កដា ឆ្នាំ ២០១១ កន្លងទៅនេះ។
ប្រមុខការទូតកម្ពុជា និងមេដឹកនាំសមាគមមិត្តភាពកម្ពុជា ថៃ មានឯកភាពនឹងគ្នា ជំរុញឲ្យមានកិច្ចសហប្រតិបត្តិការល្អប្រសើររវាងប្រជាជនកម្ពុជា និងថៃ ដើម្បីរក្សាសន្តិភាព ព្រមទាំងបង្កើនទំនាក់ទំនងពាណិជ្ជកម្ម នៅតាមបណ្ដោយព្រំដែននៃប្រទេសទាំងពីរឲ្យមានដំណើរការល្អប្រសើរ។
ការមានឯកភាពនឹងគ្នាជាគោលការណ៍នេះ បានធ្វើឡើងនៅក្នុងជំនួបមួយ នៅឯក្រសួងការបរទេសកម្ពុជា នៅថ្ងៃទី ៣ ខែវិច្ឆិកា ឆ្នាំ ២០១១។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ប្រាប់អ្នកសែត ក្រោយជំនួបនោះថា កម្ពុជាមិនចង់ឃើញមានជម្លោះនៅតាមព្រំដែននោះទេ ពីព្រោះរឿងព្រំដែននេះ
គឺសល់ពីសម័យអាណានិគមនិយមបារាំងមក។
គឺសល់ពីសម័យអាណានិគមនិយមបារាំងមក។
លោក កុយ គួង៖ «ស្របពេលគឺឯកឧត្ដម (លោក ហោ ណាំហុង) បានជំរុញឲ្យលោកប្រធានសមាគមមិត្តភាពថៃកម្ពុជាហ្នឹង គឺថាលោកមានតួនាទីសំខាន់ណាស់ គឺថាលោកធ្វើឲ្យរដ្ឋាភិបាល និងរដ្ឋាភិបាល កាន់តែជិតស្និទ្ធ យោគយល់គ្នាឲ្យកាន់តែមានភាពល្អប្រសើរជានិច្ច ហើយសមាគមនេះ មានតួនាទីសំខាន់ គឺធ្វើប្រជាជន និងប្រជាជនកាន់តែយល់ដឹងគ្នា កាន់តែខិតជិតគ្នា»។
លោក កុយ គួង បានដកស្រង់ប្រសាសន៍របស់លោក ប៉ុកសាក់ នីលូប៊ុល ថា លោកឯកភាពទាំងស្រុងចំពោះការផ្ដួចផ្ដើមនេះ៖«ពីព្រោះសមាគមនេះ លើកមុនមានឈ្មោះថា សមាគមវប្បធម៌ ថៃ កម្ពុជា ហើយដែលផ្ដោតតែលើវិស័យ ៣ គឺវិស័យវប្បធម៌ វិស័យប្រវត្តិសាស្ត្រ និងវិស័យទេសចរណ៍។ ប៉ុន្តែ ក្រោយមក នៅឆ្នាំ ២០១០ សមាគមនេះ បានប្ដូរជាសមាគមមិត្តភាពថៃកម្ពុជា»។
អ្នកវិភាគស្ថានការណ៍ជម្លោះរវាងថៃ និងកម្ពុជាកន្លងមក លោក បណ្ឌិត សុខ ទូច មានប្រសាសន៍ព្រមានថា កម្ពុជាត្រូវតែមានការប្រុងប្រយ័ត្នចំពោះទំនាក់ទំនងទ្វេភាគីនេះ៖ «ប្រទេសថៃ តែងតែលើកឡើងមិត្តភាព មិត្តភាពជានិច្ចកាល។ ប៉ុន្តែ បញ្ហាចម្បងដែលដោះស្រាយបញ្ហាព្រំដែន ដែលលើកយកផ្លូវការគតិយុត្តិណាមួយ ថៃអត់ដែលលើកយកមកនិយាយទេ»។
កាលពីខែកញ្ញា ឆ្នាំ ២០១១ កន្លងទៅនេះ នាយករដ្ឋមន្ត្រីថៃ អ្នកស្រី យ៉ីងឡាក់ ស៊ីណាវ៉ាត់ និងរដ្ឋមន្ត្រីក្រសួងការពារជាតិថៃ លោក យុត្ថាសាក់ សាស៊ីប្រាផា (Yuthsak Sasiprapha) បានមកធ្វើទស្សនកិច្ចនៅកម្ពុជា ដើម្បីរឹតចំណងមិត្តភាពរវាងកម្ពុជា និងថៃ ម្ដងរួចមកហើយ។ ប៉ុន្តែ កិច្ចប្រជុំគណៈកម្មាធិការព្រំដែនទូទៅ ឬហៅកាត់ថា ជី.ប៊ី.ស៊ី (GBC) រវាងកម្ពុជា និងថៃនោះ អាចដំណើរការទៅបានដរាបណាសភាថៃបោះឆ្នោតយល់ព្រមជាមុនសិន។
កិច្ចប្រជុំ ជី.ប៊ី.ស៊ី នេះ គឺមានសារសំខាន់ ក្នុងការសម្រេចដកកងទ័ពនៃប្រទេសទាំងពីរចេញពីតំបន់គ្មានកងទ័ព ដែលតុលាការយុត្តិធម៌អន្តរជាតិ ឬហៅថា អាយ.ស៊ី.ជេ (ICJ) បានចេញដីកាបង្គាប់ កាលពីថ្ងៃទី ១៨ ខែកក្កដា ឆ្នាំ ២០១១ កន្លងទៅនេះ៕
ពីវិទ្យុ អាស៊ីសេរី
No comments:
Post a Comment
yes