រដ្ឋាភិបាលចិន បានផ្ដល់ជំនួយឧបត្ថម្ភបន្ថែមទៀតដល់កម្ពុជា។ ប្រាក់ជំនួញទាំងនោះបានផ្ដោតទៅលើការជួយដោះស្រាយលើវិបត្តិទឹកជំនន់។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រីបានចុះហត្ថលេខាជាផ្លូវការដើម្បីទទួលយកនូវជំនួយទាំងនោះជាមួយឯកអគ្គរដ្ឋទូតប្រទេសចិន នៅកម្ពុជា លោក ផាន ហ្គងហ្ស៊ី (Pan Guang Xue) នៅក្រសួងការបរទេសកម្ពុជា នៅព្រឹកថ្ងៃទី៣ ខែវិច្ឆិកា ឆ្នាំ២០១១។
ជំនួយពីប្រទេសចិនជាថ្មីទៀតនេះ គឺមានទឹកប្រាក់ចំនួន ១លាន៥សែនដុល្លារអាមេរិក សម្រាប់ទិញស្បៀងអាហារសង្គ្រោះបន្ទាន់ដល់ប្រជាពលរដ្ឋខ្មែរចំនួនជាង ១លាន៥នាក់ដែលរងគ្រោះដោយសារទឹកជំនន់នៅក្នុងខេត្តចំនួន ១៨ តាំងពីខែសីហា មក។
ជំនួយនេះត្រូវបាននាយករដ្ឋមន្ត្រីចិន លោក វិន ជាប៉ាវ ( Wen Jiabao) បានសន្យាផ្ដល់ឲ្យលោកនាយករដ្ឋមន្រ្តី ហ៊ុន សែន នៅគ្រាដែលលោក ហ៊ុន សែន បានទៅធ្វើទស្សនកិច្ចនៅទីក្រុងណាន់នីង (Nanning) ប្រទេសចិន កាលពីខែតុលា កន្លងទៅនេះ។
អ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍ប្រាប់អ្នកកាសែតក្រោយពីការចុះហត្ថលេខានោះថា ជំនួយជាទឹកប្រាក់នេះគឺមានសារសំខាន់សម្រាប់ទិញស្បៀងអាហារចែកជូនប្រជាពលរដ្ឋខ្មែររងគ្រោះ ដោយសារទឹកជំនន់ជាបន្តទៀត៖ «ឯកឧត្ដមឧបនាយករដ្ឋមន្ត្រីលោកបានមានប្រសាសន៍ហើយថា ចិនជាមិត្តទី១ ដែលផ្ដល់ជំនួយដំបូងគេ ហើយច្រើនជាងគេ។ ឯកឧត្ដមក៏បានបញ្ជាក់អំពីកាយវិការ អំពីចំណងមិត្តភាពដ៏យូរអង្វែងរវាងប្រជាជននៃប្រទេសទាំងពីរ ( ចិននិងកម្ពុជា)»។
ឯកអគ្គរដ្ឋទូតប្រទេសចិន នៅកម្ពុជា លោក ផាន ហ្គងហ្ស៊ី បានមានប្រសាសន៍ថា ប្រជាជនចិនមានការព្រួយបារម្ភ និងជួយឈឺឆ្អាលដល់ការរងគ្រោះរបស់ប្រជាពលរដ្ឋខ្មែរ ដោយសារទឹកជំនន់។
មន្ត្រីស្ថានទូតចិននៅកម្ពុជា បានចុះចែកជំនួយសង្គ្រោះបន្ទាន់នោះកន្លងមក និងបានឃើញការរងគ្រោះដោយផ្ទាល់ភ្នែក។ អាជ្ញាធរកម្ពុជា នៅតាមខេត្តនានា បានចាត់វិធានការជួយសង្គ្រោះដោយប្រសិទ្ធភាព និងទាន់ពេលវេលា។
កាលពីថ្ងៃទី១៥ ខែតុលា និងយប់ថ្ងៃទី១៦ ខែតុលា ឆ្នាំ២០១១ កន្លងទៅនេះ យន្តហោះចិន ចំនួន ២ បានដឹកសម្ភារៈសង្គ្រោះបន្ទាន់មានតម្លៃ ៥០លានយន់ ស្មើនឹង ៨លានដុល្លារអាមេរិកមកកម្ពុជា។ សម្ភារៈទាំងនោះមានដូចជា ភួយ មុង កម្រាល ត្រីខកំប៉ុង ថ្នាំពេទ្យ និងកន្សែងពោះគោ និងសម្ភារៈប្រើប្រាស់ប្រចាំថ្ងៃដទៃទៀត។
អនុប្រធាននាយកដ្ឋានព័ត៌មាននៃគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានមានប្រសាសន៍ថា ការរងគ្រោះគឺធំធេង ដូច្នេះជំនួយនេះមានសារសំខាន់ខ្លាំងណាស់៖«មកដល់ពេលនេះ រដ្ឋាភិបាលយើងបានចែកបានចំនួនប្រហែលជា ២៥ម៉ឺនគ្រួសារហើយ ដូច្នេះនៅសល់ប្រហែលជា ១០ម៉ឺនគ្រួសារទៀត ទាំងអស់វា ៣៥ម៉ឺនគ្រួសារ ហើយការផ្គត់ផ្គង់ជួយសង្គ្រោះប្រជាជនមិនមែនថា ផ្គត់ផ្គង់នៅពេលនេះទេ។ ពេលដែលគាត់វិលទៅលំនៅឋានវិញ ក៏គាត់នៅមានតម្រូវការជាងហ្នឹង ដែលរដ្ឋាភិបាលត្រូវការគិតគូរបន្តទៀតក្នុងរយៈពេលយ៉ាងតិចបំផុតក៏ ៣ខែដែរ»។
លោកនាយករដ្ឋមន្ត្រី ហ៊ុន សែន បានប្រកាសឲ្យដឹងនៅថ្ងៃទី២ ខែវិច្ឆិកា ថ្មីៗនេះថា មានប្រជាពលរដ្ឋចំនួនជាង ២៥០នាក់ហើយបានស្លាប់ដោយសារទឹកជំនន់នៅឆ្នាំ២០១១នេះ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ប្រជាពលរដ្ឋចំនួន ១លាន៥សែននាក់ រងការប៉ះពាល់ដោយសារទឹកជំនន់។ ស្រូវចំនួន ៥សែន៩ម៉ឺនហិកតារ បានលិចទឹកជំនន់ និងស្រូវចំនួនជាង ២សែនហិកតារទៀត បានខូចខាតទាំងស្រុង។
ក្រសួងកសិកម្ម រុក្ខាប្រមាញ់ និងនេសាទ កំពុងតែត្រៀមស្រូវពូជប្រដេញទឹកចំនួនជាង ៣.០០០តោន សម្រាប់ចែកជូនកសិករនាពេលឆាប់ៗនេះ ដើម្បីស្ដារកសិកម្មក្រោយពីទឹកជំនន់ស្រក៕
ពីវិទ្យុ អាស៊ីសេរី
No comments:
Post a Comment
yes