ទីបំផុតទៅនៅថ្ងៃសុក្រ រដ្ឋសភាបានអនុម័តលើសេចក្តីព្រាងច្បាប់គ្រប់គ្រងទឹកអាស៊ីដដោយសម្លេងច្រើនលើសលុប។ តំណាងរាស្ត្រគណបក្សសមរង្ស៊ី ទាមទារឲ្យលុបចោលមាត្រាមួយចំនួនចំពោះការកំណត់ដាក់ទោសលើជនល្មើសជះទឹកអាស៊ីដ តិចតួចពេក។ ប៉ុន្តែសមាជិករដ្ឋសភាគណបក្សប្រជាជនកម្ពុជា មិនយល់ព្រម។
សមាជិករដ្ឋសភាចំនួន ៨១ រូប ក្នុងចំណោមសមាជិករដ្ឋសភា ៨៥ រូប ដែលមានវត្តមានក្នុងកិច្ចប្រជុំរដ្ឋសភា កាលពីព្រឹកថ្ងៃទី៤វិច្ឆិកា ឆ្នាំ២០១១ បានលើកដៃអនុម័តលើសេចក្តីព្រាងច្បាប់ ស្តីពីការគ្រប់គ្រងអាស៊ីដខ្លាំង ដែលមាន ៦ ជំពូក និង ២៧ មាត្រា។
សេចក្តីព្រាងច្បាប់ទឹកអាស៊ីដ ដែលរដ្ឋសភា បានលើកយកមកពិភាក្សាដេញដោល កាលពីព្រឹកថ្ងៃទី៣វិច្ឆិកា ឆ្នាំ២០១១ បានតម្រូវឱ្យមណ្ឌលសុខភាព មន្ទីរពេទ្យរដ្ឋ ឬ គ្រឹះស្ថានព្យាបាលសាធារណៈ ត្រូវផ្តល់ការសង្គ្រោះ និងការព្យាបាលដល់ជនរងគ្រោះ ដោយទឹកអាស៊ីដ ដោយឥតគិតថ្លៃ។ ច្បាប់ទឹកអាស៊ីដ ក៏តម្រូវឱ្យផ្តន្ទាទោសឧក្រិដ្ឋជន វាយប្រហារទឹកអាស៊ីដ ដាក់ពន្ធនាគារពី២ឆ្នាំ រហូតដល់ ៣០ឆ្នាំ។
ក្នុងកិច្ចប្រជុំរដ្ឋសភា លោក តេង សាវង្ស រដ្ឋលេខាធិការក្រសួងមហាផ្ទៃ បានលើកឡើងថា ច្បាប់គ្រប់គ្រងអាស៊ីដ គឺជាឧបករណ៍ច្បាប់ដ៏សំខាន់ សម្រាប់រដ្ឋាភិបាល ដើម្បីគ្រប់គ្រងអាស៊ីដខ្លាំង ឱ្យមានប្រសិទ្ធិភាព និងផ្តន្ទាទោសឱ្យបានតឹងរ៉ឹង ចំពោះឧក្រិដ្ឋជន ដែលឆ្លៀតឱកាសប្រើប្រាស់អាស៊ីដខ្លាំងប្រឆាំងនឹងគូសត្រូវ។
ចំពោះការអនុម័តច្បាប់ទឹកអាស៊ីដ ត្រូវបានគណបក្សប្រឆាំង និងអង្គការសង្គមស៊ីវិល សម្តែងការស្វាគមន៍។ ប៉ុន្តែគណបក្សប្រឆាំង បានសម្តែងការមិនពេញចិត្តចំពោះការកំណត់ផ្តន្ទាទោសលើជនល្មើស ដែលជះទឹកអាស៊ីដ។
លោក យឹម សុវណ្ណ តំណាងរាស្ត្រគណបក្សសម រង្សី បានថ្លែងនៅក្នុងសម័យប្រជុំសភាថា ច្បាប់ទឹកអាស៊ីដ ដែលមានចន្លោះប្រហោងនោះ ដើម្បីកាត់បន្ថយទោសជាប់ពន្ធនាគារលើជនល្មើស វាយប្រហារទឹកអាស៊ីដ។ នោះគឺកម្រិតនៃការផ្តន្ទាទោសជនល្មើសពី ២ ទៅ ៥ ឆ្នាំ នៅក្នុងមាត្រា២០ គឺតម្រូវឲ្យតុលាការផ្តន្ទាទោសស្រាលពេកលើជនល្មើស។
ក្នុងកិច្ចប្រជុំនៅព្រឹកមិញ រដ្ឋសភា ក៏បានលើកយកសេចក្តីព្រាងច្បាប់ពន្ធនាគារ មកពិភាក្សា ដេញដោលផងដែរ។ សេចក្តីព្រាងច្បាប់ពន្ធនាគារ មានគោលបំណង កំណត់អំពីការគ្រប់គ្រងពន្ធនាគារនៅកម្ពុជា និងដើម្បីផ្តល់ការអប់រំ កែប្រែស្តារនីតិសម្បទា ដើម្បីធ្វើសមាហរណកម្មជនជាប់ឃុំ ទៅក្នុងសង្គមជាតិវិញ។
សេចក្តីព្រាងច្បាប់ពន្ធនាគារ ដែលមាន ១១ ជំពូក និង ៨៧ មាត្រា ក៏ដើម្បីគ្រប់គ្រងជនជាប់ឃុំឲ្យធានាបានសន្តិសុខ សុវត្ថិភាព សុខភាព និងមនុស្សធម៌ ស្របតាមគោលការណ៍អន្តរជាតិ និងវិធានសហប្រជាជាតិ សម្រាប់ការពារអនីតិជន ដែលត្រូវបានដកហូតសិទ្ធិសេរីភាព។
ប៉ុន្តែកិច្ចប្រជុំរដ្ឋសភា កាលពីព្រឹកថ្ងៃទី៤វិច្ឆិកា ឆ្នាំ២០១១ បានអនុម័តដល់ជំពូកទី៤ នៃសេចក្តីព្រាងច្បាប់ពន្ធនាគារ។ កិច្ចប្រជុំរដ្ឋសភា នឹងបន្តពិភាក្សាលើសេចក្តីព្រាងច្បាប់ពន្ធនាគារ នៅព្រឹកថ្ងៃច័ន្ទ ទី៧វិច្ឆិកា ឆ្នាំ២០១១៕
BY: RFI
No comments:
Post a Comment
yes