កងរាជអាវុធហត្ថក្រុងភ្នំពេញ នៅថ្ងៃទី៤ ខែវិច្ឆិកា ឆ្នាំ២០១១ បានចាប់ឃាត់ខ្លួនជនជាតិចិនដីគោកចំនួន ៩នាក់ ក្រោមបទចោទថា បានជួញដូរគ្រឿងញៀននៅក្នុងប្រទេសកម្ពុជា ដើម្បីនាំចេញទៅប្រទេសមួយចំនួនទៀតនៅក្នុងតំបន់។
៤-វិច្ឆិកា-២០១១៖ មន្ត្រីកងរាជអាវុធហត្ថក្រុងភ្នំពេញ កំពុងពិនិត្យវត្ថុតាង
ជាគ្រឿងញៀន ក្រោយចាប់ខ្លួនជនជាតិចិន ៩នាក់។
កងរាជអាវុធហត្ថកំពុងតែឃុំខ្លួនជនសង្ស័យទាំងនេះ ដើម្បីសាកសួរចម្លើយ និងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញ ចោទប្រកាន់ជាផ្លូវការនៅពេលឆាប់ៗនេះ។
ជនជាតិចិនដីគោកចំនួន ៩នាក់នោះ មានស្ត្រីចំនួន ២នាក់ និងបុរសចំនួន ៧នាក់ គឺអាជ្ញាធរចាប់ខ្លួនបាននៅខណ្ឌដង្កោ និងខណ្ឌ៧មករា នៅទីក្រុងភ្នំពេញ ក្រោយពីបានតាមដាន និងស្រាវជ្រាវរយៈពេលជិត ២ខែកន្លងមក។
ភស្តុតាងដែលរឹបអូសបាននោះមានដូចជា រថយន្តទំនើបឡិចស៊ីស (Lexus) ចំនួន ២គ្រឿង ម៉ូតូប្រដេញមួយគ្រឿង ម្សៅគ្រឿងញៀនចំនួន ២,៥គីឡូក្រាម ថ្នាំគ្រាប់ ១៤០គ្រាប់ អាវុធចំនួន ១ដើម គ្រឿងញៀនយ៉ាម៉ាទឹកកកមួយចំនួន និងកញ្ឆាជិត ៣ក្រាម។ គ្រឿងញៀនហេរ៉ូអ៊ីន (Heroin) ជិត ១ក្រាម។
ប្រធានមន្ទីរស្រាវជ្រាវ និងយុត្តិធម៌នៃកងរាជអាវុធហត្ថក្រុងភ្នំពេញ លោក ខេង សុវណ្ណ បានមានប្រសាសន៍ប្រាប់អ្នកកាសែតថា សមត្ថកិច្ចកំពុងតែបន្តការស្រាវជ្រាវរកបណ្ដាញដទៃទៀត៖ «នៅព្រះរាជាណាចក្រកម្ពុជាយើងជាកន្លែងសម្រាប់ឆ្លង (គ្រឿងញៀន)។ ថ្ងៃនេះខ្ញុំកំពុងតែកសាងសំណុំរឿងរហូតដល់ស្អែក ឬក៏ខានស្អែក បានខ្ញុំទើបបញ្ជូនទៅ (តុលាការរាជធានីភ្នំពេញ) ពីព្រោះ ៩នាក់ខ្ញុំធ្វើការកសាងតាមនីតិវិធីរបស់ខ្ញុំ។ អានេះនៅពេលដែលខ្ញុំបញ្ជូនសំណុំរឿង និងវត្ថុតាងទៅ គឺសិទ្ធិនៅលើតុលាការជាអ្នកសម្រេច»។
ប្រធានសមាគមសង្គ្រោះជនរងគ្រោះដោយសារគ្រឿងញៀន លោក មាស សុវណ្ណ បានមានប្រសាសន៍ថា លោកសាទរចំពោះការបង្ក្រាបនេះ៖ «ពួតដៃគ្នាទាំងថ្នាក់ជាតិ រហូតដល់ថ្នាក់មូលដ្ឋាននេះ ខ្ញុំយល់ឃើញថា ទៅមុខទៅមានការថយចុះ (គ្រឿងញៀន) អាហ្នឹងទៅមុខ ប៉ុន្តែលុះត្រាតែយើងហ្នឹងរួមដៃគ្នាក្នុងការទប់ស្កាត់អំពើប្រើប្រាស់ដែរ។ អ៊ីចឹងយើងរួមដៃគ្នាទប់ស្កាត់»។
នេះជាការបង្ក្រាបគ្រឿងញៀនទ្រង់ទ្រាយធំលើកទី៣ហើយ ក្រោយពីការចាប់ខ្លួនលោកឧត្ដមសេនីយ៍ឯក ម៉ឹក ដារ៉ា ប្រធានមន្ទីរប្រឆាំងគ្រឿងញៀននៅដើមខែមករា ឆ្នាំ២០១១ កន្លងទៅនេះ និងការចាប់ខ្លួនមនុស្សចំនួន ៤នាក់ នៅថ្ងៃទី១ ខែវិច្ឆិកា ថ្មីៗនេះ ក្នុងនោះមានមន្ត្រីយោធាចំនួន ២នាក់ មានលោក ឡាយ វីរៈ និងលោក ឃួន រឿន និងឈ្មួញគ្រឿងញៀន ២នាក់ទៀត៕
ពីវិទ្យុ អាស៊ីសេរី
No comments:
Post a Comment
yes