លោក ស៊ុំ ចន្ទគា ជាប្រធានសម្របសម្រួលសមាគមអាដហុក ប្រចាំខេត្តបន្ទាយមានជ័យ។ លោកបានបញ្ជាក់នៅថ្ងៃព្រហស្បតិ៍ ទី៣ ខែវិច្ឆិកា ថា ពលរដ្ឋទាំង ៨នាក់នោះ ត្រូវបានជនជាតិថៃ នាំពួកគេពីទីក្រុងបាងកក ទៅធ្វើការងារសំណង់នៅកោះមួយឈ្មោះថា កោះកាង៉ាន់ ស្ថិតនៅក្នុងខេត្តថារៈថានី របស់ថៃ។ ពួកគេត្រូវបានមេការជនជាតិថៃ កេងប្រវ័ញ្ចប្រាក់ឈ្នួលពួកគាត់អស់រយៈពេលបីខែមកហើយ។
លោក ស៊ុំ ចន្ទគា៖ «គាត់សុំអំពាវនាវសុំឲ្យខាងរដ្ឋាភិបាល ធ្វើយ៉ាងម៉េចឲ្យជួយយកពួកគាត់ត្រឡប់មកវិញ ព្រោះថា នៅកន្លែងហ្នឹងគឺថា ពួកគាត់អត់មានលុយអត់កាក់សម្រាប់ធ្វើដំណើរត្រឡប់មកវិញទេ ហើយប៉ះពាល់យ៉ាងខ្លាំងដល់សុវត្ថិភាពផ្ទាល់ខ្លួន ដោយសារពួកក្រុមជក់ម៉ាថ្នាំញៀននៅកន្លែងហ្នឹង ហើយផុយស្រួយដោយសារតែពួកគាត់នៅកន្លែងហ្នឹង លក់ដូរ ព្រោះថា ពួកគាត់ទៅលួចឆ្លងដែនដោយខុសច្បាប់ អត់មានលិខិតឆ្លងដែនត្រឹមត្រូវទេ»។
ទាក់ទិនបញ្ហានេះ សមាគមអាដហុក កំពុងធ្វើកិច្ចអន្តរាគមន៍ទៅក្រសួងការបរទេសខ្មែរ និងអង្គការអន្តរជាតិនានានៅក្នុងប្រទេសថៃ ដើម្បីចុះជួយរំដោះប្រជាពលរដ្ឋខ្មែរទាំង ៨នាក់នោះមកស្រុកខ្មែរវិញ។
ប្រជាពលរដ្ឋទាំង ៨នាក់ មានទីលំនៅស្ថិតក្នុងភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ ពួកគេបានរត់ភៀសខ្លួនទៅក្នុងប្រទេសថៃ ដោយសារតែមានការភ័យខ្លាចតុលាការខេត្តកំពង់ឆ្នាំង ចាប់ឃុំខ្លួន ក្នុងបញ្ហាទំនាស់ដីធ្លីជាមួយក្រុមហ៊ុនឯកជនមួយរបស់ភរិយាលោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល៕
ពីវិទ្យុ អាស៊ីសេរី
No comments:
Post a Comment
yes