អង្គការឃ្លាំមើលសិទ្ធិមនុស្ស (Human Rights Watch=HRW) នៅថ្ងៃទី១ ខែវិច្ឆិកា ឆ្នាំ២០១១ បានទទូចសុំឲ្យរដ្ឋាភិបាលកម្ពុជា កែសម្រួលបទបញ្ញត្តិមួយចំនួន ដើម្បីគ្រប់គ្រងលើក្រុមហ៊ុននាំពលករចេញទៅប្រទេសម៉ាឡេស៊ី ឲ្យបានល្អប្រសើរឡើង។
រថយន្តពេទ្យចូលដឹកសាកសពស្ត្រីពលករដែលស្លាប់នៅ
ក្នុងក្រុមហ៊ុននាំពលករទៅក្រៅប្រទេសឈ្មោះ ធី & ភី ខូអិធីឌី (T & P Co., Ltd.)
នៅក្នុងសង្កាត់ទឹកថ្លា រាជធានីភ្នំពេញ នៅថ្ងៃទី៦ ខែមីនា ឆ្នាំ២០១១។
ការស្នើនេះដោយសារតែគេបានរកឃើញថា មានស្ត្រី និងកុមារជាច្រើនពាន់នាក់ដែលទៅធ្វើការងារនៅប្រទេសម៉ាឡេស៊ីនោះ ទទួលបាននូវការការពារតិចតួចណាស់ពីការបង្ខាំងខ្លួនខុសច្បាប់នៅក្នុងមណ្ឌលហ្វឹកហ្វឺននៅកម្ពុជា។
អំពើរំលោភបំពានទាំងនោះមានដូចជា ក្រុមហ៊ុនជ្រើសរើសពលករបានបង្ខាំងពលករខុសច្បាប់ និងបិទសិទ្ធិសេរីភាពមិនឲ្យទាក់ទងជាមួយក្រុមគ្រួសារ។ គ្មានថ្នាំព្យាបាលនៅពេលធ្លាក់ខ្លួនឈឺ។ ពលកររងការគំរាមប្ដឹង និងចាប់ខ្លួនពីតំណាងក្រុមហ៊ុន បើសិនណាពលកររត់គេចខ្លួន ហើយពលករមួយចំនួនទៀតមិនបានទទួលប្រាក់ខែទេ។
កន្លងមកមានសេចក្ដីរាយការណ៍ជាបន្តបន្ទាប់មកថា ពលករកម្ពុជាតែងតែរងការបោកប្រាស់ និងកេងប្រវ័ញ្ចកម្លាំងពលកម្មគ្រប់ជំហាន។
នាយកផ្នែកច្បាប់ និងគោលនយោបាយរបស់អង្គការឃ្លាំមើលសិទ្ធិមនុស្ស ឈ្មោះ Human Rights Watch លោក ជេម រ៉ូស ( James Ross ) បានមានប្រសាសន៍នៅក្នុងសន្និសីទកាសែតនៅថ្ងៃទី១ ខែវិច្ឆិកា នៅសណ្ឋាគារកាំប៊ូឌីយ៉ាណា (Cambodiana Hotel) ថា លោកមានការខកចិត្តយ៉ាងខ្លាំងចំពោះបញ្ហាដែលបានកើតឡើងមកលើកម្មករបែបនេះ៖ «ចំណុចមួយនៃអនុសាសន៍របស់យើងជូនរដ្ឋាភិបាលកម្ពុជា គឺត្រូវការធ្វើការកែសម្រួលបទបញ្ញត្តិឲ្យបានល្អប្រសើរ ដើម្បីគ្រប់គ្រងលើក្រុមហ៊ុននាំចេញពលករនៅប្រទេសម៉ាឡេស៊ី»។
១-វិច្ឆិកា-២០១១៖ មន្ត្រីអង្គការឃ្លាំមើលសិទ្ធិមនុស្ស ឈ្មោះ
Human Rights Watch ធ្វើសន្និសីទកាសែតស្ដីពីបញ្ហាពលករកម្ពុជា
នៅសណ្ឋាគារកាំបូឌីយ៉ាណ។ RFA/Sok Serey
សកម្មជនការពារសិទ្ធិមនុស្សលីកាដូ លោក អំ សំអាត បានសម្ដែងការព្រួយបារម្ភថា ពលករកម្ពុជាមួយចំនួនបានដាច់ការទាក់ទងជាមួយក្រុមគ្រួសារកន្លងមក គឺមិនដឹងថា ពលករនោះនៅរស់ ឬស្លាប់ ឬមានគ្រោះថ្នាក់អ្វីក៏មិនដឹង។ រដ្ឋាភិបាលហាក់ដូចជាពុំមានយន្តការដោះស្រាយច្បាស់លាស់នៅឡើយដើម្បីជួយសង្គ្រោះ និងដោះស្រាយលើបញ្ហានេះ។
មន្ត្រីស៊ើបអង្កេតជាន់ខ្ពស់នៃមជ្ឈមណ្ឌលអប់រំច្បាប់សម្រាប់សហគមន៍ លោក ហ៊ុយ ពេជ្រសុវណ្ណ ដែលតែងតែតាមដានស្ថានការណ៍ពលករចំណាកស្រុកទៅប្រទេសម៉ាឡេស៊ី កន្លងមក បានមានប្រសាសន៍ថា នគរបាលប្រឆាំងការជួញដូរមនុស្ស និងការពារអនីតិជនកន្លងមកបានបង្ក្រាប និងចាប់ខ្លួនមនុស្សរបស់ក្រុមហ៊ុន ធី អែន ភី ( T&P ) ប៉ុន្តែប្រធានក្រុមហ៊ុននេះមិនទាន់បានចាប់ខ្លួននៅឡើយ។
លោកបន្តថា៖ «អាជ្ញាធរគួរតែបន្តធ្វើតទៅទៀត ដើម្បីរកមុខដែលទទួលខុសត្រូវធំ ទទួលខុសត្រូវមែនទែន។ មនុស្សតូចតាចក្លាយជាជនរងគ្រោះឲ្យទទួលទោសជំនួសអ្នកដែលបញ្ជាគាត់ឲ្យធ្វើ»។
អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន លោកឧត្ដមសេនីយ៍ត្រី ជីវ ផល្លី បានមានប្រសាសន៍ថា អាជ្ញាធរកំពុងតែស្វែងរកចាប់ខ្លួនប្រធានក្រុមហ៊ុន ធី អែន ភី ឈ្មោះ សម ពិសី ភេទប្រុស អាយុ ៤០ឆ្នាំ តាមដីកាចាប់ខ្លួនរបស់តុលាការខេត្តកំពង់ឆ្នាំង ក្រោមបទជួញដូរមនុស្ស និងបង្ខាំងមនុស្សខុសច្បាប់។
លោកសង្ស័យថា ជនសង្ស័យនេះកំពុងរត់គេចខ្លួននៅបរទេស៖«ទាក់ទងទៅនឹងក្រុមហ៊ុន ធី អែន ភី ហ្នឹង មកដល់ម៉ោងនេះអត់មានពលការិនីទៀតទេ បានន័យថា នៅក្នុងក្រុមហ៊ុន ខាងតុលាការបានឲ្យទៅផ្ទះអស់ហើយ។ ចំពោះអ្នកដែលពាក់ព័ន្ធ ដូចជាប្រធានក្រុមហ៊ុន យើងមានដីកាហើយ យើងកំពុងតែស្វែងរកចាប់ខ្លួនគាត់»។
ប្រធានសមាគមភ្នាក់ងារជ្រើសរើសពលករកម្ពុជា លោក អ៊ន ប៊ុនហាក់។ លោកបានមានប្រសាសន៍ស្វាគមន៍ចំពោះការលាតត្រដាងរបស់អង្គការឃ្លាំមើលសិទ្ធិមនុស្សនេះ៖ «ក៏ប៉ុន្តែខ្ញុំពេញចិត្តនឹងរបាយការណ៍មួយដែលថា ឲ្យសមាគមភ្នាក់ងារជ្រើសរើសពលករធ្វើការសហការឲ្យបានជិតដិតជាមួយសង្គមស៊ីវិល។ នេះហើយគឺជាចំណុចមួយដែលយើងគួរធ្វើការរួមគ្នា គ្មាននរណាម្នាក់ជាវីរជនជួយប្រជាជនខ្មែរតែម្នាក់ឯងនោះទេ»។
រហូតមកដល់ពេលនេះមានពលករកម្ពុជា សរុប ៥ម៉ឺននាក់ ធ្វើការងារនៅប្រទេសម៉ាឡេស៊ី ក្នុងនោះមានពលករចំនួនជាង ៣ម៉ឺននាក់ បម្រើការងារនៅតាមផ្ទះ។ បច្ចុប្បន្នមានក្រុមហ៊ុនជ្រើសរើសពលករសរុបចំនួន ៣៤ នៅកម្ពុជា។ ដោយឡែកក្រុមហ៊ុន ធី អែន ភី បានផ្អាកសកម្មភាពទាំងស្រុងហើយ ក្រោយពីលោកនាយករដ្ឋមន្រ្តី ហ៊ុន សែន បានចេញសារាចរចុះថ្ងៃទី១៥ ខែតុលា ឆ្នាំ២០១១ កន្លងទៅនេះ។ ប៉ុន្តែនៅមានក្រុមហ៊ុនជ្រើសរើសពលករដទៃទៀត នៅកំពុងតែដំណើរការជាធម្មតានៅឡើយ៕
ពីវិទ្យុ អាស៊ីសេរី
No comments:
Post a Comment
yes