ក្រុមអ្នករត់តាក់ស៊ី និងអ្នកដឹកទំនិញជាលក្ខណៈគ្រួសារតាមផ្លូវជាតិខេត្តកំពង់ធំ បានរអ៊ូរទាំ និងចោទប្រកាន់ថា សមត្ថកិច្ចចម្រុះ មានដូចជាមន្ត្រីបរិស្ថាន មន្ត្រីប៉ូលិសសេដ្ឋកិច្ច មន្ត្រីកងរាជអាវុធហត្ថ និងមន្ត្រីរដ្ឋបាលព្រៃឈើ បានដាក់កុងត្រូលជជុះចាំជំរិតទារលុយពីម្ចាស់រថយន្តដឹកទំនិញ ឬរថយន្តដឹកអ្នកដំណើរមានរូបភាពកាន់តែអាក្រក់។
លោកស្រី ចន្ទ ខឿន ជាពលរដ្ឋរស់នៅទីក្រុងភ្នំពេញ។ លោកស្រីបានឲ្យដឹងនៅរសៀលថ្ងៃទី៣០ ខែវិច្ឆិកា ថា រូបគាត់បានទិញផ្ទះឈើទ្រុឌទ្រោម ១ខ្នង ពីខេត្តកំពង់ធំ រុះដឹកតាមរថយន្តមកជួសជុលផ្ទះដែលខូចខាត នៅភ្នំពេញ ក្នុងតម្លៃទាប។ ប៉ុន្តែលោកស្រីថ្លែងថា គួរឲ្យសោកស្ដាយត្រូវបានសមត្ថកិច្ចចម្រុះខេត្តកំពង់ធំ ដែលបានដាក់កុងត្រូលជជុះជាង ១០កន្លែង តាមផ្លូវជាតិលេខ៦ បានឃាត់រថយន្តរបស់គាត់ គំរាមឲ្យបង់លុយជូនពួកគេក្នុង ១ប៉ុស្តិ៍ចាប់ពី ២ម៉ឺនរៀល ទៅ ២០ម៉ឺនរៀល សរុបអស់ទឹកប្រាក់ជិត ១លានរៀលមុននឹងបានមកដល់ផ្ទះ។
លោកស្រី ចន្ទ ខឿន ឲ្យដឹងបន្ថែម៖ «១កន្លែងគេទារ ១០ម៉ឺន ២០ម៉ឺន បើសុំគេទៅបាន ២ម៉ឺន ៣ម៉ឺន និងកន្លែងខ្លះ ៦ម៉ឺន (រៀល)។ ដឹកឈើផ្ទះចំណាស់ជិត ៦០ឆ្នាំ»។
លោកស្រីបញ្ជាក់ថា បទបញ្ជាលុបបំបាត់កុងត្រូលជជុះរបស់លោកនាយករដ្ឋមន្ត្រី ហ៊ុន សែន មានតែនៅលើបបូរមាត់ និងនៅលើក្រដាសទេ ព្រោះមន្ត្រីក្រោមឱវាទរបស់លោកមិនយកត្រចៀកស្តាប់ និងមិនអនុវត្តតាមនោះទេ។ ជាក់ស្តែងដូចជាករណីកុងត្រូលជជុះ កំពុងធ្វើសកម្មភាពក្នុងមូលដ្ឋានស្រុកបារាយណ៍ និងស្រុកសន្ទុក ក្នុងឃុំប្រាសាទ ជាដើម។
ទាក់ទងកុងត្រូលជជុះនេះដែរ ក្រុមអ្នកបើករថយន្តដឹកអ្នកដំណើរ ឬរថយន្តតាក់ស៊ី ក៏បានឲ្យដឹងដែរថា កុងត្រូលជជុះជ្រកក្រោមស្លាកត្រួតពិនិត្យច្បាប់ចរាចរណ៍ជើងគោក ពិតជាកើតមានអនាធិបតេយ្យនៅមូលដ្ឋានខេត្តកំពង់ធំ និងតាមខេត្តក្រុងមួយចំនួនក្នុងប្រទេសកម្ពុជា ពិតមែន។
ក្រុមអ្នករត់តាក់ស៊ី បានសំណូមពរទៅប្រមុខដឹកនាំឲ្យជួយត្រួតពិនិត្យ និងអង្កេតចំពោះសកម្មភាពមន្ត្រីក្រោមឱវាទរបស់ខ្លួន ជុំវិញប្រសិទ្ធភាពនៃការអនុវត្តបទបញ្ជាលុបបំបាត់កុងត្រូលជជុះឡើងវិញ បើសិនលោក ហ៊ុន សែន មានចេតនាលុបបំបាត់កុងត្រូលជជុះមែននោះ។
ទាក់ទងបញ្ហានេះ លោក ជន អៀត ជានាយប៉ុស្តិ៍នគរបាលឃុំប្រាសាទ ស្រុកសន្ទុក ខេត្តកំពង់ធំ មានប្រសាសន៍ថា មន្ត្រីរបស់លោកមិនបានចូលរួមប្រព្រឹត្ត ឬដាក់កុងត្រូលជជុះតាមផ្លូវសាធារណៈដូចពលរដ្ឋអះអាងទេ។ ប៉ុន្តែលោកទទួលស្គាល់ថា នៅមូលដ្ឋាននេះពិតជាមានកម្លាំងចម្រុះចុះដាក់ប៉ុស្តិ៍ត្រួតពិនិត្យយានយន្តបើកឆ្លងកាត់ពិតមែន តែត្រង់ថា មន្ត្រីទាំងនោះតម្រូវឲ្យម្ចាស់រថយន្តដឹកទំនិញបង់លុយឲ្យពួកគេ ឬយ៉ាងណាលោកមិនបានជ្រាបទេ។
លោក ជន អៀត បន្ថែម៖ «កម្លាំងខ្ញុំជាកម្លាំងប៉ុស្តិ៍ មិនបានទៅពាក់ព័ន្ធកម្លាំងគេទេ។ កម្លាំងគេ គេមានបេសកកម្មពីថ្នាក់ខេត្តក៏មិនដឹង»។
ទោះជាបែបនេះក្តី លោក ដន រស្មី ជាប្រជាពលរដ្ឋរស់នៅស្រុកបារាយណ៍ ខេត្តកំពង់ធំ លោកបានទទួលស្គាល់ថា កុងត្រូលជជុះពិតជាកើតមានអនាធិបតេយ្យក្នុងខេត្តកំពង់ធំ ពិតមែន។ លោក បទបញ្ជាលុបបំបាត់កុងត្រូលជជុះរបស់លោក ហ៊ុន សែន មន្ត្រីថ្នាក់ក្រោមលោកមិនអនុវត្តតាមនោះទេ ហើយប្រមុខដឹកនាំគួរពិនិត្យទៅលើប្រសិទ្ធភាពមន្ត្រីរបស់ខ្លួន ដែលមិនអនុវត្តតាមបទបញ្ជាឲ្យមានប្រសិទ្ធភាពនោះ។
លោក ដន រស្មី បន្ថែម៖ «សមត្ថកិច្ចគេយកលេសបង្ក្រាបបទល្មើស ប៉ុន្តែទន្ទឹមបង្ក្រាបបទល្មើសហ្នឹង ដូចទៅបង្កបទល្មើស ធ្វើជាមុខរបរ។ ទៅយកលុយកាក់ពីប្រជាពលរដ្ឋណាក្រីក្រស្លូតត្រង់។ រីឯឡានដឹកឈើមានកង់បីជួយធំបានធ្វើសកម្មភាពដោយសេរី។ ប៉ុន្តែសំរាប់ពលរដ្ឋដឹកឈើលំនៅឋានចាស់ៗ ឬដឹកតាមរ៉ឺម៉ក ពួកសមត្ថកិច្ចចេញមុខបង្ក្រាប និងចាប់ឲ្យបង់លុយមិនលើកលែងទេ គឺចាប់ឲ្យបង់លុយឲ្យពួកគេ»។
ទាក់ទងបញ្ហានេះ លោកនាយករដ្ឋមន្ត្រី ហ៊ុន សែន ប៉ុន្មានឆ្នាំមកនេះ បានប្រកាស និងមានចាក់ផ្សាយតាមកញ្ចក់ទូរទស្សន៍ វិទ្យុ និងបណ្ដាញសារព័ត៌មានមួយចំនួនទៀត មានទាំងឯកជន និងរដ្ឋ ដាក់បទបញ្ជាឲ្យថ្នាក់ដឹកនាំតាមខេត្ត ក្រុង ក្រោមឱវាទ ឲ្យលុបបំបាត់កុងត្រូលជជុះដែលកើតមានក្នុងមូលដ្ឋានរបស់ខ្លួនឲ្យបានជាស្ថាពរ។
បន្ថែមលើនេះ លោកក៏បានព្រមានដកតំណែងមន្ត្រីដឹកនាំតាមខេត្តក្រុងទាំងឡាយណាដែលមិនអនុវត្តតាមបទបញ្ជាលុបបំបាត់កុងត្រូលជជុះឲ្យមានប្រសិទ្ធភាពនោះទេ។
ទោះយ៉ាងណា ប្រជាពលរដ្ឋបានអះអាងថា កុងត្រូលជជុះបានបន្តកើតមានតាមផ្លូវសាធារណៈយ៉ាងអនាធិបតេយ្យ និងគ្មានការបង្ក្រាប ឬទប់ស្កាត់ពីស្ថាប័នផ្នែកណាមួយទប់ស្កាត់នោះទេ៕
អាស៊ីសេរី
No comments:
Post a Comment
yes