ថ្លែងនៅក្នុងសវនាការនៃតុលាការខ្មែរក្រហមនៅពេលថ្មីៗនេះ លោក នួន ជា បានបង្ហើបថា វៀតណាមមានបំណងត្រួតត្រាប្រទេសកម្ពុជាជាយូរមកហើយ។ ការចង់ត្រួតត្រាប្រទេសកម្ពុជារបស់អ្នកដឹកនាំវៀតណាមនេះ មានតាំងពីបក្សកុម្មុយនិស្តកម្ពុជាទើបតែកើតមាន រហូតដល់បក្សកុម្មុយនិស្តកម្ពុជាបានទទួលជ័យជម្នះត្រួតត្រាប្រទេស និងចុងក្រោយរលាយទៅវិញ។
ក្នុងសម័យតស៊ូបដិវត្តន៍ បក្សកុម្មុយនិស្តវៀតណាមមានបង្កប់មនុស្សរបស់គេនៅគ្រប់កន្លែងនៅប្រទេសកម្ពុជា ហើយបានបណ្ដុះបណ្ដាលជនកម្ពុជាមួយចំនួនឲ្យស្រឡាញ់គោរពវៀតណាម និងបម្រើផលប្រយោជន៍របស់ប្រទេសវៀតណាម។
លោក នួន ជា បានលើកឡើងថា អ្នកដឹកនាំប្រទេសវៀតណាម មានមូលហេតុជាច្រើនក្នុងការចង់កាន់កាប់គ្រប់គ្រងប្រទេសកម្ពុជា និងឡាវ នៅក្នុងសហព័ន្ធឥណ្ឌូចិន។
ជាបន្តមកទៀតក្នុងពេលប្រយុទ្ធដណ្ដើមកាន់កាប់ក្រុងភ្នំពេញ ក្នុងឆ្នាំ១៩៧៥ ពីរបបលោកសេនាប្រមុខ លន់ នល់ លោក នួន ជា បានរៀបរាប់ថា អ្នកដឹកនាំវៀតណាម បាននិយាយចំអកឲ្យអ្នកដឹកនាំបក្សកុម្មុយនិស្តកម្ពុជា ថាមិនមានសមត្ថភាពក្នុងការវាយយកក្រុងភ្នំពេញ និងត្រូវតែមានចំណងមិត្តភាពជាមួយវៀតណាម និងចូលរួមក្នុងសហព័ន្ធឥណ្ឌូចិន ដែលមានប្រទេសវៀតណាមជាអ្នកដឹកនាំ។
ក្រោយពេលបក្សកុម្មុយនិស្តកម្ពុជាបានគ្រប់គ្រងប្រទេសក្នុងខែមេសា ឆ្នាំ១៩៧៥ បង្កើតរបបកម្ពុជាប្រជាធិបតេយ្យ។ លោក នួន ជា បានឲ្យដឹងថា មានការចរចាតឹងតែងជាមួយវៀតណាម លើបញ្ហាព្រំដែន និងបញ្ហាជាច្រើនទៀត។ តែអ្នកដឹកនាំវៀតណាម មិនបានទទួលយល់ព្រមតាមការលើកឡើងរបស់អ្នកដឹកនាំរបបកម្ពុជាប្រជាធិបតេយ្យឡើយ។
តាមលោក នួន ជា អនុប្រធានបក្សកុម្មុយនិស្តកម្ពុជា លោកបានឲ្យដឹងថា ក្រោយឆ្នាំ១៩៧៥ អ្នកដឹកនាំវៀតណាមបានបង្កបញ្ហាជាច្រើនជាមួយរបបកម្ពុជាប្រជាធិបតេយ្យ ដោយមានការវាយប្រយុទ្ធរវាងកងទ័ពប្រទេសទាំង២ តាមព្រំដែននៃប្រទេសទាំងពីរ និងមានការលូកដៃរបស់វៀតណាមក្នុងការធ្វើរដ្ឋប្រហារផ្ដួលរំលំរបបកម្ពុជាប្រជាធិបតេយ្យទៀតផង តែលោកមិនបានបញ្ជាក់អំពីពេលវេលាច្បាស់លាស់ទេ។
លោក នួន ជា បានលើកឡើងថា វៀតណាមក្រៅពីបង្កប់មនុស្សរបស់ខ្លួននៅក្នុងបក្ស ក្នុងជួរកម្មាភិបាលគ្រប់ជាន់ថ្នាក់របស់របបកម្ពុជាប្រជាធិបតេយ្យ អ្នកដឹកនាំវៀតណាមបានបង្កប់មនុស្សរបស់គេនៅក្នុងកងទ័ព ហើយជំរុញឲ្យអសកម្មក្នុងការប្រយុទ្ធ និងមានការរត់ចោលជួរចេញពីរបបកម្ពុជាប្រជាធិបតេយ្យ។
មកទល់បច្ចុប្បន្ន លោក នួន ជា បានអះអាងថា អ្នកដឹកនាំប្រទេសវៀតណាម នៅតែតាមដានគ្រប់គ្រងប្រទេសតាមរយៈសមាគមអាណិកជនវៀតណាមនៅកម្ពុជាទៀតផង។
ការលើកឡើងរបស់លោក នួន ជា ជាសាធារណៈបានបង្ហាញនូវហេតុការណ៍មួយចំនួនដែលកើតឡើងនៅក្នុងរបបកម្ពុជាប្រជាធិបតេយ្យ និងបំពេញចន្លោះប្រហោងសៀវភៅប្រវត្តិសាស្ត្រអំពីហេតុការណ៍ទាំងអស់នោះ។ ជាមួយនោះដែរ លោក នួន ជា ចង់បង្ហាញថា វិបត្តិកើតមាននៅប្រទេសកម្ពុជាដោយសារប្រទេសវៀតណាម។ បញ្ហាទាំងនោះរួមទាំងការសម្លាប់រង្គាលប្រជាពលរដ្ឋខ្មែរក្នុងរបបកម្ពុជាប្រជាធិបតេយ្យផងដែរ។
លោកបណ្ឌិត ឡៅ ម៉ុងហៃ អ្នកវិភាគឯករាជ្យបានមានប្រសាសន៍ថា លោកបានយល់ដឹងថែមទៀតតាមរយៈការលើកឡើងនោះ។ លោកបានមានប្រសាសន៍ថា បើសិនជាការលើកឡើងនោះជាការពិត វាជាមេរៀនឲ្យអ្នកដឹកនាំកម្ពុជា មានការប្រុងប្រយ័ត្នចំពោះអ្វីដែលកើតឡើងរវាងប្រទេសកម្ពុជា និងវៀតណាម ក្នុងពេលកន្លងមក។
ចំពោះបញ្ហាសមាគមអាណិកជនវៀតណាមនៅកម្ពុជា លោក បណ្ឌិត ឡៅ ម៉ុងហៃ បានមានប្រសាសន៍ថា វាពិតជាមានការទាក់ទងរវាងសមាគមនោះជាមួយបក្សកុម្មុយនិស្តវៀតណាម។ តែត្រង់ថា ទំនាក់ទំនងកម្រិតណានោះ លោកមិនបានដឹងជាក់លាក់ទេ។
ចំពោះ លោក ឡាត់ គី ដែលជាអ្នកតាមដានសាលាក្ដីខ្មែរក្រហមរបស់សមាគមការពារសិទ្ធិមនុស្សឈ្មោះអាដហុក (Adhoc)។ លោកបានមានប្រសាសន៍ថា ការលើកឡើងរបស់លោក នួន ជា ទាក់ទងជាមួយប្រទេសវៀតណាម និងអ្នកដឹកនាំវៀតណាមនោះ គ្រាន់តែជាលេសដើម្បីគេចចេញពីការទទួលខុសត្រូវក្នុងនាមគាត់ជាអតីតអ្នកដឹកនាំជាន់ខ្ពស់ក្នុងរបបខ្មែរក្រហមប៉ុណ្ណោះ។
លោក ឡាត់ គី បានទទួលស្គាល់ថា ការលើកឡើងនោះមានការពិតខ្លះទាក់ទងបញ្ហាសមាគមអាណិកជនវៀតណាមនៅកម្ពុជា។ តែលោកមិនជឿថា គ្រប់ការប៉ុនប៉ងរបស់បក្សកុម្មុយនិស្តវៀតណាម សុទ្ធតែបានទទួលជោគជ័យនោះទេ។
លោក ឡៅ ម៉ុងហៃ មិនបានឯកភាពចំពោះមតិលើកឡើងថា ការលើកឡើងរបស់លោក នួន ជា ជាការគេចការទទួលខុសត្រូវនោះទេ។
មន្ត្រីអ្នកនាំពាក្យក្រសួងមហាផ្ទៃ និងមន្ត្រីស្ថានទូតវៀតណាមនៅកម្ពុជា មិនអាចទាក់ទងសុំមតិអត្ថាធិប្បាយទាក់ទងការលើកឡើងរបស់លោក នួន ជា នោះបានទេ។
ការលើកឡើងរបស់លោក នួន ជា នោះ នៅក្នុងពេលគាត់ថ្លែងការពារខ្លួនក្នុងសាលាក្ដីខ្មែរក្រហម កាលពីថ្ងៃទី២២ វិច្ឆិកា កន្លងទៅ។ លោក នួន ជា បានសន្យាថា គាត់នឹងឆ្លើយបំភ្លឺថែមទៀតនៅពេលណាសហព្រះរាជអាជ្ញាសាលាក្ដីខ្មែរក្រហមចោទសួរគាត់បន្ថែមនៅពេលខាងមុខ។ លោក នួន ជា ជាជនជាប់ចោទមួយរូបក្នុងចំណោមជនជាប់ចោទមេខ្មែរក្រហម ៤រូប ក្នុងសំណុំរឿង០០២ ក្នុងការទទួលខុសត្រូវក្នុងរបរប្រល័យពូជសាសន៍ ប៉ុល ពត កាន់អំណាចពីឆ្នាំ១៩៧៥ ដល់ឆ្នាំ១៩៧៩ ដែលបណ្ដាលឲ្យមនុស្សជិត ២លានស្លាប់៕
អាស៊ីសេរី
No comments:
Post a Comment
yes