ខេត្តកំពង់ឆ្នាំង ៖ កម្មករសំណង់ប្រមាណ២០០នាក់ដែលកំពុងធ្វើការសាងសង់រោងចក្រមួយដែលមានទីតាំងក្នុងភូមិសាស្ត្រភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ តាមបណ្តោយផ្លូវជាតិលេខ៥ បាននាំគ្នាធ្វើកូដកម្មតវ៉ាដល់ក្រុមហ៊ុនម៉ៅការសាងសង់របស់ជនជាតិចិន ដែលពុំព្រមបើកប្រាក់ខែឱ្យពួកគេ ។ ហេតុការណ៍នេះបានក្លាយជាហិង្សាដែលកម្មករម្នាក់បានរងរបួសដោយសារការធាក់របស់មេកា ។ កូដកម្មបានផ្ទុះឡើងកាលពីវេលាមោង១២និង៣០នាទីថ្ងៃត្រង់ថ្ងៃទី២ កុម្ភៈ។
ក្រុមកម្មករសំណង់ទាំងនោះបានតវ៉ាថា ពួកគេធ្វើការក្នុងមួយថ្ងៃ៩ម៉ោងគឺព្រឹក ពីម៉ោង៧ដល់ម៉ោង១១និង៣០នាទី និងរសៀលពីម៉ោង១ដល់ម៉ោង៥និង៣០នាទីល្ងាច រួមទាំងងថ្ងៃសៅរ៍ និងថ្ងៃអាទិត្យ ក៏គ្មានឈប់សម្រាកដែរ ។ ក្រៅពីធ្វើការលើសម៉ោងពួកគេត្រូវបាត់ប្រាក់ប្រចាំថ្ងៃទៀត ។ មេជាងក្នុងមួយថ្ងៃអ្នកម៉ៅកាសន្យាឱ្យ៦ដុល្លារ ប៉ុន្តែបើកបានតែ៥ដុល្លារ ឬស្មើ២ម៉ឺនរៀល ឯកូនជាង១៥.០០០រៀលបើកបានតែ១៣.០០០រៀលប៉ុណ្ណោះ ប៉ុន្តែរហូតមកដល់ថ្ងៃទី២ កុម្ភៈ ពួកគាត់មិនទាន់បានបើកប្រាក់ទាំងនេះនៅឡើយគឺពេញមួយខែមករា ។
លោកម៉ៅ ប៊ុនថា អធិការស្រុកសាមគ្គីមានជ័យ បានដឹកនាំកម្លាំងទៅពិនិត្យមើលកន្លែងកើតហេតុ ហើយបានចូលទៅសួរនាំដល់ក្រុមអ្នកម៉ៅការជនជាតិចិនទាំងនោះ ប៉ុន្តែមិនបានលទ្ធផលអ្វីទេ៕
កោះសន្តិភាព
No comments:
Post a Comment
yes