នៅក្នុងពេលរង់ចាំការប្រកាសសាលក្រមស្ថាពររបស់តុលាការកំពូលអំពីសំណុំរឿង ០០១ អតីតជនរងគ្រោះក្នុងគុកទួលស្លែងមួយរូប លោក ជុំ ម៉ី ថ្លែងថា លោកមិនអាចអត់អោនឱ្យ កាំង ហ្កេកអ៊ាវ ហៅ ឌុច បានទេ ទោះក្នុងកាលៈទេសៈណាក៏ដោយ។
អតីតអ្នកទោសមន្ទីរ ស-២១ លោក ជុំ ម៉ី បានថ្លែងដូច្នេះ នៅក្នុងអំឡុងពេលដែលជនរងគ្រោះក្នុងរបបខ្មែរក្រហម ជាដើមបណ្ដឹងរដ្ឋប្បវេណីក្នុងសំណុំរឿង ០០១ ចំនួន ៩០រូប មកជួបជុំគ្នានៅបរិវេណសារមន្ទីរប្រល័យពូជសាសន៍ទួលស្លែង នៅរសៀលថ្ងៃទី ២ កុម្ភៈ ឆ្នាំ ២០១២៖ «ខ្ញុំថាបងប្អូនខ្ញុំនិយាយហើយនិយាយទៀតថា ទឹកភ្នែក ឌុច ប៉ុន្មានដំណក់ហ្នឹង មិនអាចយកមកលុបលាងទឹកភ្នែកប្រជាជនរាប់លាននាក់បានទេ។ ការសុំទោស ឌុច ហ្នឹងជាលេសរបស់វាទេ»។
ការជួបជុំរបស់ដើមបណ្ដឹងរដ្ឋប្បវេណីក្នុងសំណុំរឿង ០០១ គឺជាការជួបជុំ ដើម្បីត្រៀមចិត្តចាំស្ដាប់លទ្ធផលនៃការប្រកាសសាលក្រមស្ថាពររបស់តុលាការកំពូលលើការផ្ដន្ទាទោស កាំង ហ្កេកអ៊ាវ ហៅ ឌុច ដែលនឹងត្រូវប្រកាសនៅថ្ងៃទី ៣ ខែកុម្ភៈ ឆ្នាំ ២០១២។
អតីតប្រធានគុកទួលស្លែង ឬមន្ទីរ ស-២១ លោក កាំង ហ្កេកអ៊ាវ ហៅ ឌុច ត្រូវបានសាលាដំបូងផ្ដន្ទាទោសដាក់គុក ៣៥ ឆ្នាំពីបទឧក្រិដ្ឋកម្មប្រឆាំងមនុស្សជាតិ និងរំលោភអនុសញ្ញាក្រុងហ្សឺណែវ ឆ្នាំ ១៩៤៩។ ជនរងគ្រោះមិនសុខចិត្តនឹងការសម្រេចនេះ ហើយប្ដឹងទៅតុលាការកំពូលឱ្យដាក់គុក ឌុច មួយជីវិត ឬយ៉ាងតិចណាស់ ៤៥ ឆ្នាំ។ សេចក្ដីសម្រេចចុងក្រោយនឹងត្រូវប្រកាសនៅថ្ងៃស្អែកនេះ។
អតីតអ្នកទោសគុកទួលស្លែងមួយរូបទៀត លោក ប៊ូ ម៉េង បន្ថែមថា បើតុលាការកំពូលសម្រេចផ្ដន្ទាទោស ឌុច ឱ្យនៅដដែល លោកមិនអាចទទួលយកបានឡើយ៖ «ទាំងមេធាវីទាំងអស់ និងព្រះរាជអាជ្ញាថា មួយជីវិតនៅ ៤៥ ឆ្នាំ។ អូខេខ្ញុំទទួលយកបាន។ បើថាខុសពីហ្នឹងខ្ញុំអត់ទទួលទេ។ ៣៥ (ឆ្នាំ) ខ្ញុំអត់ទទួលទេ។ ទាល់តែ ៤៥ ឆ្នាំ បានឆ្នាំទទួល»។
លោក ជុំ ម៉ី ថ្លែងថា បើតុលាការកំពូលតម្កល់ការផ្ដន្ទាទោស ឌុច ដាក់គុករយៈពេល ៣៥ ឆ្នាំ លោកថាជាការសម្រេចមិនយុត្តិធម៌ ហើយក៏មិនអាចនាំឱ្យមានការផ្សះផ្សាចិត្តបានទេដែរ។
អ្នកស្រី ហាវ សោភា ដែលបាត់បង់ឪពុកម្ដាយនៅគុកទួលស្លែង ថ្លែងដោយក្ដីសង្ឃឹមថា សាលក្រមស្ថាពរនៅថ្ងៃទី ៣ កុម្ភៈ តុលាការនឹងផ្ដល់យុត្តិធម៌ដល់ជនរងគ្រោះ៖ «នាងខ្ញុំសុំឧទ្ទិសដល់វិញ្ញាណក្ខន្ធជនរួមជាតិ ដែលបានបាត់បង់នៅទួលស្លែង សូមឱ្យអស់លោក លោកស្រីដែលស្លាប់ មានឪពុកខ្ញុំ គឺឪពុក ហាវ ហាន ដែលស្លាប់នៅទីនេះ សូមឱ្យឪពុកខ្ញទទួលយកយុត្តិធម៌។ សូមឱ្យឪពុកដឹងថាកូន ដែលនៅរស់នេះមិនព្រងើយកន្តើយទេ»។
អ្នកស្រី ស៊ិន ស៊ីណែត ដែលឪពុកស្លាប់នៅគុកទួលស្លែងនេះដែរ បានអំពាវនាវដល់វិញ្ញានក្ខន្ធឪពុករបស់អ្នកស្រីឱ្យរង់ចាំទទួលយកយុត្តិធម៌ពីតុលាការ៖ «ថ្ងៃស្អែកនេះជាថ្ងៃបញ្ចេញនូវយុត្តិធម៌សម្រាប់ខ្មែរដែលបានបាត់បង់។ នាងខ្ញុំសប្បាយរីករាយដោយគិតថា តុលាការមានយុត្តិធម៌ រកយុត្តិធម៌ដល់ជនរងគ្រោះ ទាំងរូបនាងខ្ញុំ ទាំងជនរងគ្រោះទូទាំងប្រទេស ដែលបានបាត់បង់ទាំងអស់»។
ក្នុងការជួបជុំគ្នារបស់ជនរងគ្រោះ ដើម្បីត្រៀមចិត្តទទួលសេចក្ដីសម្រេចចុងក្រោយរបស់តុលាការកំពូល នៅថ្ងៃទី ៣ កុម្ភៈ ក៏មានការណែនាំរបស់វេជ្ជបណ្ឌិតផ្នែកចិត្តសាស្ត្រនូវវិធីសាស្ត្រទប់ចិត្តមួយចំនួន សម្រាប់ទប់ទល់នឹងស្ថានភាពខកចិត្តណាមួយ នៅពេលប្រកាសសាលក្រមនោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អាស៊ីសេរី
No comments:
Post a Comment
yes