រាជធានីភ្នំពេញ ៖ លោកយស បូវណ្ណៈ ដែលធ្លាប់ជាតារាសម្តែងជើងចាស់មានប្រជាប្រិយភាពមួយរូបប្រចាំប្រទេសកម្ពុជា ហើយបានបោះបង់ចោលអាជីពរបស់ខ្លួន ដើម្បីទៅរស់នៅសហរដ្ឋអាមេរិកអស់រយៈពេលជិត១៨ឆ្នាំមកហើយនោះ ពេលនេះលោកកំពុងធ្វើដំណើរវិលត្រឡប់មកកាន់ប្រទេសកម្ពុជាយ៉ាងតក់ក្រហល់ ដើម្បីចូលរួមធ្វើបុណ្យសពម្តាយរបស់លោកដែលបានទទួលអនិច្ចកម្មថ្មីៗនេះ ។
ទាក់ទិនទៅនឹងការវិលត្រឡប់មកវិញនេះត្រូវបានក្មួយប្រុសបង្កើតរបស់លោកយស បូវណ្ណៈ បានប្រាប់ឱ្យដឹងថា លោកយស បូវណ្ណៈបានចាកចេញពីប្រទេសកម្ពុជានៅឆ្នាំ១៩៩៤ និងបានរៀប
អាពាហ៍ពិពាហ៍ជាមួយភរិយា ជាអាណិកជនខ្មែរ រស់នៅសហរដ្ឋអាមេរិក ហើយទទួលបានចំណងដៃបុត្រី៣នាក់ ។ លោកយស បូវណ្ណៈ នឹងធ្វើដំណើរមកដល់ប្រទេសកម្ពុជានៅវេលាម៉ោង១២ថ្ងៃត្រង់ ទី៣ កុម្ភៈ ២០១២ គឺថ្ងៃស្អែកនេះ ។
ក្មួយប្រុសរបស់លោកយស បូវណ្ណៈ បានឱ្យដឹងទៀតថា ទោះបីជាលោកបូវណ្ណៈ បោះបង់អាជីពជាតារាសម្តែងនៅប្រទេសកំណើតក៏ពិតមែន ប៉ុន្តែលោកក៏បានបន្តអាជីពរបស់ខ្លួននៅសហរដ្ឋអាមេរិកពាក់ព័ន្ធនឹងសិល្បៈផងដែរ ដោយលោកបានធ្វើជាមេប្រយោគជ្រើសរើសតារាចម្រៀង ទៅច្រៀងនៅសហរដ្ឋអាមេរិក ក្រៅពីនេះលោកក៏បានប្រកបការងារផ្សេងៗជាច្រើនទៀត ។
ក្មួយប្រុសរបស់លោកយស បូវណ្ណៈ បានបន្ថែមទៀតថា កាលដែលលោកបូវណ្ណៈត្រឡប់មកប្រទេសកម្ពុជាយ៉ាងតក់ក្រហល់បែបនេះគឺដោយសារតែលោកយាយដែលត្រូវជាម្តាយបង្កើតរបស់លោកបូវណ្ណៈ បានទទួលមរណភាព កាលពីវេលាម៉ោង១២និង៣០រំលងអធ្រាត្រឈានចូលថ្ងៃទី២ កុម្ភៈ យប់មិញនេះ ដោយរោគគារពាធក្នុងជន្មាយុ៧៤ឆ្នាំ ។ នៅពេលដែលធ្វើពិធីបូជាសពរួចហើយលោកបូវណ្ណៈប្រហែលជាឆាប់វិលត្រឡប់ទៅសហរដ្ឋអាមេរិកវិញ ព្រោះលោកមានការងារច្រើននៅទីនោះ ម្យ៉ាងលោកមិនចង់ឃ្លាតឆ្ងាយយូរពេកពីភរិយានិងកូនៗរបស់លោកទេ ៕
កោះសន្តិភាព
No comments:
Post a Comment
yes