ភ្នំពេញៈ ពលរដ្ឋរងគ្រោះ ក្នុងតំបន់បឹងកក់ប្រមាណជាង ៧០ នាក់ បានប្រមូលផ្ដុំគ្នា នៅមុខសាលាដំបូងរាជធានីកាលពីថ្ងៃម្សិលមិញ ដោយអំពាវនាវ សុំឲ្យតុលាការជួយអន្តរាគមន៍ ដោះលែង តំណាងរបស់ពួកគេចំនួន ១៣ នាក់ ដែលនគរបាល បានចាប់ឃាត់ខ្លួន កាលពីថ្ងៃអង្គារ។
អ្នកស្រី លី ចាន់ណារី អាយុ ៣៩ ឆ្នាំ តំណាងពលរដ្ឋ ១៨ គ្រួសារ នៅភូមិ ១ សង្កាត់ស្រះចក ខណ្ឌដូនពេញ ដែលកាលពីចុងឆ្នាំ ២០១០ ក្រុមហ៊ុនស៊ូកាគូអ៊ីន របស់លោកឡាវ ម៉េងឃីន សមាជិកព្រឹទ្ធសភា គណបក្សប្រជាជនកម្ពុជា បានបូមខ្សាច់កប់ពន្លិចផ្ទះ និងចម្ការដំណាំរបស់គាត់ ដោយគ្មានសំណងអ្វីទាំងអស់នោះ បានប្រាប់ភ្នំពេញ ប៉ុស្តិ៍ថា ពួកគាត់ នាំគ្នាមកប្រមូលផ្ដុំនៅមុខសាលាដំបូងរាជធានីភ្នំពេញ ដើម្បីទាមទារឲ្យតុលាការ ដោះលែងស្ត្រីទាំង ១៣ នាក់ ឲ្យមានសេរីភាពឡើងវិញ។ អ្នកស្រីបានបន្តថា៖«យើងខ្ញុំបានទទួលព័ត៌មានមកថា ពួកគាត់ត្រូវបានអាជ្ញាធរខណ្ឌដូនពេញ ចោទប្រកាន់ពីបទញុះញុងឲ្យយើងខ្ញុំទាំង ១៨ គ្រួសារ មកទន្ទ្រានកាន់កាប់ដីក្រុមហ៊ុនដោយខុសច្បាប់»។
អ្នកស្រីបន្ថែមថា៖«ការចោទប្រកាន់នេះ វាពិតជាអយុត្តិធម៌ខ្លាំងណាស់ ចំពោះពួកគាត់ ដែលបានចូលរួមគាំទ្រតាមការអំពាវនាវរបស់ពួកយើងខ្ញុំទាំង ១៨ គ្រួសារ ដែលបានសម្រេចចិត្តធ្វើការសាងសង់ផ្ទះ លើអតីតដីផ្ទះរបស់ខ្លួន បន្ទាប់ពីក្រុមហ៊ុនស៊ូកាគូអ៊ីន បានបូមខ្សាច់កប់លុប និងរំលោភយកកាន់កាប់ជិត២ ឆ្នាំដោយគ្មានសំណង នឹងដំណោះស្រាយអ្វីទាំងអស់នោះ»។
ជាមួយគ្នានោះ លោកដួង ឈើត អាយុ ៤៤ ឆ្នាំ ដែលបានស្រែកយំរហូតដល់សន្លប់ នៅពេលដែលក្រុមសមត្ថកិច្ចប្រមាណ ២០០ នាក់ បានធ្វើការរារាំង និងដកហូតយកឈើ និងសម្ភារសំណង់មួយចំនួនរបស់គាត់ នៅពេលដែលគាត់ចូលទៅសង់ផ្ទះ នៅលើដីដែលជាអតីតផ្ទះរបស់គាត់ កាលពីព្រឹកថ្ងៃអង្គារនោះ បាននិយាយថា គាត់នឹងធ្វើអត្តឃាត បើសិនជាអាជ្ញាធរ មិនដោះលែងស្ត្រីទាំង ១៣ នាក់ និងមិនព្រមដោះស្រាយបញ្ហាដីធ្លីរបស់ពួកគាត់ទេនោះ។ លោកថ្លែងថា៖«ខ្ញុំនឹងធ្វើអត្តឃាតខ្លួនឯង នៅមុខសាលារាជធានីបើសិនជាពួករដ្ឋអំណាចទាំងនេះ មិនអើពើដោះស្រាយបញ្ហាដីធ្លី នឹងផ្ទះសម្បែងឲ្យយើងខ្ញុំទេ»។
ស្ត្រីម្នាក់ ក្នុងចំណោម ១៣ នាក់ ដែលកំពុងជាប់ឃុំ នៅឯស្នងការដ្ឋាននគរបាលរាជធានី អ្នកស្រី ហេង មុំ បានប្រាប់ភ្នំពេញ ប៉ុស្តិ៍ តាមទូរស័ព្ទ កាលពីរសៀលម្សិលមិញថា ពួកគាត់ ទំនងជាត្រូវសមត្ថកិច្ចឃុំខ្លួន ក្នុងរយៈពេលមិនតិចជាង ៤៨ម៉ោងទេ មុនពេលត្រូវបញ្ជូនទៅតុលាការរាជធានី ឬមួយយ៉ាងណានោះទេ។
អ្នកស្រីថ្លែងថា៖ «លោកសុខ សម្បត្តិ អភិបាលខណ្ឌដូនពេញ បានដាក់ការចោទប្រកាន់ថា យើងខ្ញុំបានធ្វើការញុះញង់ពលរដ្ឋ ១៨ គ្រួសារក្នុងភូមិ១ ឲ្យទៅសាងសង់ផ្ទះ និងទន្ទ្រានរំលោភកាន់កាប់ដីក្រុមហ៊ុនស៊ូកាគូដោយខុសច្បាប់»។
អ្នកស្រីបានបន្តថា៖«យើងខ្ញុំក៏បានបដិសេធនៅចំពោះមុខសមត្ថកិច្ចរួច ហើយ នៅពេលដែលពួកគេបានធ្វើការសាកសួរថា យើងខ្ញុំមិនបានធ្វើយ៉ាងដូច្នេះទេ ហើយនេះជាការចោទប្រកាន់ទាំងបំពាន»។
លោកសុខ សម្បត្តិ អភិបាលខណ្ឌដូនពេញ មិនអាចទំនាក់ទំនងសុំការបំភ្លឺបានទេ កាលពីម្សិលមិញ។ ចំណែកលោកទូច ណារ៉ុថ ស្នងការនគរបាលរាជធានីបានថ្លែងថា ការចោទប្រកាន់ ឬយ៉ាងណានោះ មិនមែនជាសមត្ថកិច្ចរបស់នគរបាលទេ គឺអាស្រ័យលើព្រះរាជអាជ្ញា អមសាលាដំបូងរាជធានី។ ទោះជាបែបណា លោកបានប្រាប់ថាការដែលនគរបាល ចាប់ឃាត់ខ្លួនស្ត្រីក្នុងតំបន់បឹងកក់ទាំង ១៣ នាក់ កាលពីថ្ងៃអង្គារនោះ គឺមកពីពួកគាត់ ជេរប្រមាថដល់កម្លាំងសមត្ថកិច្ច។ លោកថ្លែងថា៖«ពួកគាត់ជេរម្រ៉ាយ សមត្ថកិច្ចនគរបាលយើងខ្ញុំខ្លាំងពេក»។
លោកអំ សំអាត ទីប្រឹក្សាបច្ចេកទេសអង្គការសិទ្ធិមនុស្សលីកាដូ បាននិយាយថា ការចោទប្រកាន់របស់អាជ្ញាធរខណ្ឌដូនពេញ គឺជាការលាបពណ៌ដ៏អាក្រក់មួយ ទៅលើប្រជាពលរដ្ឋក្នុងតំបន់បឹងកក់ ខណៈអាជ្ញាធរខ្លួនឯង មិនបានប្រឹងប្រែងដោះស្រាយបញ្ហាឲ្យមានតម្លាភាព និងយុត្តិធម៌នោះ។
រហូតដល់ម៉ោង ៦ ល្ងាចម្សិលមិញ ស្ត្រីទាំង ១៣ នាក់ នៅមិនទាន់ត្រូវបានដោះលែងនៅឡើយទេ៕
No comments:
Post a Comment
yes