លោក លាង សុខជឿន ដែលត្រូវបានដោះលែងបន្ទាប់ពីផុតកំណត់ទោស ពីរឆ្នាំក្នុងពន្ធនាគារ។ រូបថត ម៉េង គីមឡុង
កណ្តាលៈ មន្រ្តីតុលាការម្នាក់ បានអះអាងថា តុលាការខេត្តកណ្តាលកាលពីថ្ងៃម្សិលមិញ បានដោះលែងអតីតបុគ្គលិក អង្គការលីកាដូម្នាក់ពីពន្ធនាគារបន្ទាប់ពីបានផុតកំណត់ទោសក្នុង ពន្ធនាគារ។
លោក អ៊ុក គឹមសិទ្ធិ ព្រះរាជអាជ្ញាអមតុលាការខេត្តកណ្តាល បានថ្លែងថា លោក លាង សុខជឿន វ័យ៣០ឆ្នាំ អតីតបុគ្គលិករត់សំបុត្ររបស់អង្គការលីកាដូ ត្រូវដោះលែងពីពន្ធនាគារខេត្តកណ្តាលកាលពីព្រឹកថ្ងៃទី៣០ ខែឧសភា បន្ទាប់ពីផុតកំណត់ទោសពីរឆ្នាំនៅក្នុងពន្ធនាគារ។
លោកប្រាប់ថា៖«គាត់ ត្រូវបានដោះលែងនៅថ្ងៃនេះព្រោះគាត់ បានបំពេញអាណត្តិទោសនៅក្នុងពន្ធនាគាររួចហើយ»។
លោកបញ្ជាក់បន្តថា លោក សុខជឿន ត្រូវបានផ្តន្ទាទោសដោយតុលាការខេត្តតាកែវឲ្យជាប់ទោសពីរឆ្នាំ កាលពីឆ្នាំ២០១០ ក្រោមការចោទពីបទ«ញុះញង់ពលរដ្ឋឲ្យប្រព្រឹត្តបទឧក្រិដ្ឋ»នៅ ក្នុងខេត្តតាកែវ។
លោក ហម ស៊ុនរិទ្ធ មេធាវីការពារលោក សុខជឿន បានថ្លែងថា កូនក្តីលោកត្រូវនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃចាប់ខ្លួន ពីផ្ទះលោកនៅខណ្ឌសែនសុខ រាជធានីភ្នំពេញ កាលពីថ្ងៃទី២៩ ខែឧសភា ឆ្នាំ២០១០ពីបទចោទថា ជាប់ពាក់ព័ន្ធពីបទចែកចាយខិត្តប័ណ្ណជាង១៧០០សន្លឹក ក្នុងបំណងប្រមាថថ្នាក់ដឹកនាំប្រទេស និងសម្តេចតា សីហនុ នៅខេត្តតាកែវ។ លោកត្រូវចាប់ខ្លួនផ្អែកលើចម្លើយ ថាច់ វណ្ណៈ ជាជនសង្ស័យក្នុងចំណោមពីរនាក់ដែលត្រូវចាប់ខ្លួននៅខេត្តតាកែវ។ អ្នកទាំងពីរមានលោក ថាច់ វណ្ណៈ និងលោក ថាច់ ឡេ ពួកគេគឺជាខ្មែរកម្ពុជាក្រោម។
លោកអះអាងបន្តថា លោក សុខជឿន ត្រូវជំនុំជម្រះដោយតុលាការខេត្តតាកែវ ក្រោមការចោទប្រកាន់ពីបទ«ផ្សព្វផ្សាយព័ត៌មានមិនពិត»។ ប៉ុន្តែលោកបានប្តឹងឧទ្ធរណ៍ និងត្រូវសាលាឧទ្ធរណ៍ចោទពីបទ«ញុះញង់ពលរដ្ឋឲ្យប្រព្រឹត្ត បទឧក្រិដ្ឋ»វិញ។
លោកបញ្ជាក់បន្តថា លាង សុខជឿន ថាច់ វណ្ណៈ និងលោក ថាច់ ឡេ ត្រូវផ្តន្ទាទោសដោយតុលាការខេត្តតាកែវ ឲ្យជាប់ពន្ធនាគារពីរឆ្នាំនិងពិន័យប្រាក់២លានរៀល ម្នាក់។ លោក ថាច់ គួង ហ្វុង មេគំនិតចែកចាយខិត្តប័ណ្ណដែលគេចខ្លួន ក៏ត្រូវផ្តន្ទាទោសកំបាំងមុខឲ្យជាប់ពន្ធនាគារបីឆ្នាំដែរ។
លោក ថ្លែងបន្តថា៖ «ការចាប់ខ្លួននិងការដាក់គុកលោក សុខជឿន វាអយុត្តិធម៌ណាស់ ព្រោះគាត់មិនបានប្រព្រឹត្តបទល្មើសដូចការចោទប្រកាន់»។
លោក លាង សុខជឿនកាលពីម្សិលមិញថ្លែងថា លោកសប្បាយចិត្តដែលត្រូវគេដោះលែង ប៉ុន្តែលោកមានអារម្មណ៍ថា វាអយុត្តិធម៌ សម្រាប់រូបលោក។
លោកប្រាប់ភ្នំពេញ ប៉ុស្តិ៍ តាមទូរស័ព្ទថា ៖ «ខ្ញុំសប្បាយចិត្ត ដែលខ្ញុំត្រូវគេដោះលែងពីពន្ធនាគារនៅថ្ងៃនេះ ប៉ុន្តែខ្ញុំខកចិត្តជាខ្លាំងនឹងការចាប់ខ្លួននិងការដាក់គុកខ្ញុំ ព្រោះខ្ញុំមិនបានប្រព្រឹត្តអ្វីខុសឬបានល្មើសដូចការចោទ ប្រកាន់ទេ»។ លោកស្នើថា ៖ «ដើម្បីការពារជនស្លូតត្រង់ដទៃទៀត ពីការចាប់ខ្លួនឬផ្តន្ទាទោសមិនត្រឹមត្រូវដូចរូបខ្ញុំនេះ ខ្ញុំសូមអំពាវនាវដល់សម្តេចនាយករដ្ឋមន្ត្រី ហ៊ុន - សែន សុំឲ្យគ្រប់គ្រងឲ្យតឹងរ៊ឺងនិងកែទម្រង់ប្រព័ន្ធតុលាការ»។
លោកស្រី ពុង ឈីវកេកប្រធានអង្គការលីកាដូ ថ្លែងថា អង្គការលីកាដូនឹងផ្តល់ការងារចាស់ជូនលោក សុខជឿន ភ្លាមៗនៅពេលលោកចូលមកធ្វើការបាន។
លោកស្រីមានប្រសាសន៍ថា៖
លោកស្រីមានប្រសាសន៍ថា៖
«ទោះជាលោក សុខជឿនត្រូវតុលាការផ្តន្ទាទោសនិងដាក់ពន្ធនាគារពីរឆ្នាំក៏ ដោយ ក៏យើងនៅតែចាត់ថាគាត់គ្មានកំហុស និងជាមនុស្សល្អម្នាក់។ យើងមិនបានរើសអើងគាត់ទេ។ យើង នឹងផ្តល់ការងារចាស់ឲ្យគាត់វិញ នៅពេលគាត់អាចមកធ្វើការបាន»៕ NR
No comments:
Post a Comment
yes