ស្លាកស្នាមដែលស្ត្រីបម្រើខ្មែរម្នាក់រងទារុណនៅឯម៉ាឡេសីុ។ រូបថត សហការី
ភ្នំពេញៈ ស្ត្រីជំនួយការមេផ្ទះខ្មែរម្នាក់ត្រូវបានថៅកែប្តីប្រពន្ធវាយធ្វើបាបជិតមួយឆ្នាំនៅក្នុងប្រទេសម៉ាឡេស៊ី។ មន្ត្រីស្ថានទូតខ្មែរបានជួយអន្តរាគមន៍ហើយប្តីប្រពន្ធជនជាតិម៉ាឡេស៊ីនេះត្រូវប៉ូលិសចាប់ខ្លួនបញ្ជូនទៅតុលាការបន្ទាប់ពីរឿងនេះបែកធ្លាយ។
លោក ឆាយ កុសល មន្ត្រីកុងស៊ុលនៃស្ថានទូតកម្ពុជាប្រចាំប្រទេសម៉ាឡេស៊ីបានថ្លែងប្រាប់ថា ស្ត្រីជំនួយការមេផ្ទះខ្មែរឈ្មោះ ជា ផល្លា អាយុ២៨ឆ្នាំ ត្រូវថៅកែវាយធ្វើបាបយ៉ាងធ្ងន់ធ្ងរជាច្រើនខែក្នុងពេល២ឆ្នាំដែលនាងធ្វើជាអ្នកបម្រើក្នុងគ្រួសារមួយនេះ។
លោកបញ្ជាក់ថា៖ «ឃើញបែបនេះ ខ្ញុំអាណិតខ្មែរណាស់។នាងត្រូវគេវាយធ្វើបាបហួសនិស្ស័យ យើងឈឺចាប់ណាស់ពេលឃើញទិដ្ឋភាពបែបនេះ»។
លោក ឆាយ កុសល បានឲ្យដឹងទៀតថា ស្ថានទូតបានរៀបចំឯកសារជួយអន្តរាគមន៍ទៅតុលាការហើយ ដើម្បីឲ្យតុលាការចាត់ការរឿងនេះតាមច្បាប់ ហើយថា ថៅកែរបស់នាងត្រូវប៉ូលិសម៉ាឡេស៊ីចាប់ខ្លួននិងត្រូវតុលាការចោទប្រកាន់ហើយដែរ។ បច្ចុប្បន្ន ជា ផល្លា នៅសម្រាកព្យាបាលក្នុងមន្ទីរពេទ្យមួយនៅក្នុងទីក្រុងគូឡាឡំពួ។
លោកអះអាងថា នៅក្នុងខែឧសភានេះស្ថានទូតខ្មែរបានជួយស្ត្រីជំនួយការមេផ្ទះជាង១០នាក់ បន្ទាប់ពីពួកគេជួបបញ្ហាហើយរត់មកឲ្យស្ថានទូតជួយ។
យោងតាមកាសែត ឌឺស្តា(The Star)របស់ម៉ាឡេស៊ីបានឲ្យដឹងថា ជា ផល្លា ត្រូវថៅកែនាងវាយនឹងដប ស្បែកជើង កាំបិត ជញ្ជីង ឆ្នាំងអ៊ុត បន្ទះដែក កៅអីជ័រ និងធុង...ចាប់តាំងពីថ្ងៃទី១៦ ខែសីហា ឆ្នាំ២០១១ ដល់ទី២៤ ខែឧសភា មុននេះ។
តាមកាសែតដដែលនេះ ជនសង្ស័យជាប្តីមានឈ្មោះ Tan Mong Huwai ជាជាងកាត់សក់និងប្រពន្ធ Eng Lay Sang ជាស្ត្រីមេផ្ទះ។ ប្តីប្រពន្ធទាំងពីរមានអាយុ៣៦ឆ្នាំដូចគ្នា និងមានកូនពីរនាក់អាយុ១០-១១ឆ្នាំ។
តាមកាសែតឌឺស្តាដដែល ថា ករណីនេះ ប្រសិនបើតុលាការរកឃើញថា ពួកគេមានកំហុសពិតមែន នោះពួកគេអាចនឹងត្រូវជាប់ពន្ធនាគារដល់២០ឆ្នាំ។
ប្តីប្រពន្ធទាំងពីរត្រូវប៉ូលិសម៉ាឡេស៊ីចាប់ខ្លួននិងត្រូវតុលាការធ្វើការចោទប្រកាន់កាលពីថ្ងៃអង្គារកន្លងទៅ។ស្ត្រីរងគ្រោះ ជា ផល្លា បានចេញទៅធ្វើការនៅម៉ាឡេស៊ីតាមរយៈក្រុមហ៊ុនផ្គត់ផ្គង់កម្លាំងពលកម្មកម្ពុជា(Cambodian Labor Supply)។ បុគ្គលិកម្នាក់របស់ក្រុមហ៊ុននេះបានអះអាងថា ក្រុមហ៊ុនបានទទួលដំណឹងនេះដែរហើយបានឲ្យភ្នាក់ងារនៅម៉ាឡេស៊ីជួយធ្វើអន្តរាគមន៍៕
No comments:
Post a Comment
yes