ប្រជាពលរដ្ឋនៅខេត្តកំពង់ឆ្នាំង កាន់តែច្រើនឡើង បានមកដាក់បណ្ដឹងសុំឲ្យអង្គការ អាដហុក (Adhoc) ការពារសិទ្ធិមនុស្សក្នុងខេត្តនេះ ជួយស្វែងរកកូនចៅពួកគាត់ដែលធ្វើការនៅប្រទេសម៉ាឡេស៊ី ចប់អាណត្តិ ២ឆ្នាំហើយ តែមិនឃើញត្រឡប់មកវិញ។
អ្នកស្រី ហែម សុអុន ម្ដាយបង្កើតរបស់ពលការិនី យ៉ូត ស្រីចាន់ ដែលទៅធ្វើការនៅប្រទេសម៉ាឡេស៊ី ផ្តល់បទសម្ភាសន៍ កាលពីថ្ងៃទី៨ ខែមិថុនា ឆ្នាំ២០១២។
គ្រួសារពលការិនីដែលទៅធ្វើការនៅប្រទេសម៉ាឡេស៊ី (Malaysia) ជាច្រើននាក់ នៅឯទីជនបទក្នុងខេត្តកំពង់ឆ្នាំង បានបាត់ដំណឹងកូនចៅគាត់ជាង ២ឆ្នាំមកហើយ ពុំមានការទាក់ទងមកគ្រួសារវិញសោះ។ អ្នកស្រី ហែម សុអុន អាយុ ៥១ឆ្នាំ ជាប្រជាពលរដ្ឋនៅភូមិចំបក់ប្រាសាទ ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ឲ្យដឹងនៅព្រឹកថ្ងៃទី៨ មិថុនា ថា កូនស្រីគាត់ឈ្មោះ យូត ស្រីចាន់ អាយុ ១៩ឆ្នាំ បានចេញទៅធ្វើការនៅប្រទេសម៉ាឡេស៊ី កាលពីថ្ងៃទី៧ ខែកុម្ភៈ ឆ្នាំ២០១០ តាមរយៈក្រុមហ៊ុន ធី.អែន.ភី (T&P)។ គាត់ថា តាំងពីថ្ងៃចេញទៅ រហូតមកដល់ថ្ងៃនេះ គាត់មិនដែលបានទទួលដំណឹងពីកូនគាត់សោះ។
ឥឡូវក្រុមហ៊ុននេះ បានបិទទ្វារទៀត ធ្វើឲ្យគាត់កាន់តែព្រួយបារម្ភខ្លាំងឡើង ព្រោះមិនដឹងថា ត្រូវធ្វើយ៉ាងណា ទើបគាត់មកសុំឲ្យអង្គការ អាដហុក ជួយគាត់៖ «ខ្ញុំបារម្ភខ្លាចកូនមានគ្រោះថ្នាក់ ព្រោះឃើញអ្នកគេមកវិញខ្លះ ទៅជាឆ្កួតលីលាលែងដឹងអីអញ្ចឹង។ ហេតុនេះហើយ ទើបខ្ញុំមកសុំឲ្យអង្គការ និងរាជរដ្ឋាភិបាលជួយរកកូនខ្ញុំឲ្យវាមកវិញ...»។
ស្រដៀងគ្នានេះដែរ អ្នកស្រី ឈួន គឹមលន អាយុ ៥៧ឆ្នាំ នៅភូមិជរ ឃុំប្រស្និប ស្រុករលាប្អៀ បានឲ្យដឹងថា ក្មួយស្រីគាត់ឈ្មោះ ស៊ឹម ឡៃហុង អាយុ ២៥ឆ្នាំ បានបាត់ដំណឹងជាង ២ឆ្នាំមកហើយ ពុំមានការទាក់ទងមកគ្រួសារវិញសោះ៖ «ខ្ញុំមិនដឹងថា ក្មួយខ្ញុំសុខទុក្ខយ៉ាងណា។ អញ្ចឹងហើយ ទើបខ្ញុំមកពឹងអង្គការ អាដហុក ឲ្យជួយរក...»។
វិទ្យុអាស៊ីសេរីមិនអាចទាក់ទងសុំការបំភ្លឺពីក្រុមហ៊ុន ធី.អែន.ភី បានទេ នៅល្ងាចថ្ងៃទី៨ មិថុនា នេះ ដោយក្រុមហ៊ុននេះ បានបិទទ្វារឈប់ដំណើរការរយៈពេលជាង ១ឆ្នាំមកហើយ។
ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ឆ្នាំង គឺលោក ពៅ ស៊ីថា បានមានប្រសាសន៍ថា លោកពុំទាន់ទទួលបានព័ត៌មានពីបញ្ហានេះទេ ដោយគ្រួសារដែលបាត់ដំណឹងកូនទាំងនោះ ពុំបានមកទាក់ទងជាមួយមន្ទីរការងារ និងបណ្ដុះបណ្ដាលវិជ្ជាជីវៈខេត្តនៅឡើយ៖ «មានវិធីច្រើនណាស់ ដែលយើងអាចជួយគាត់បាន។ ប៉ុន្តែគាត់ត្រូវមកជួបខ្ញុំសិន ដើម្បីយើងសាកសួរព័ត៌មានលំអិតពីគាត់ ដើម្បីមានការងាយស្រួលក្នុងការស្វែងរក...»។
យ៉ាងនេះក្ដី លោក យ៉ា ណាវុធ ជានាយកប្រតិបត្តិអង្គការ ខារ៉ាម កម្ពុជា (CARAM Cambodia) ដែលជាអង្គការមួយតាមឃ្លាំមើល និងជួយសម្របសម្រួលពលករ-ពលការិនីខ្មែរ ដែលទៅធ្វើការឯប្រទេសក្រៅ។លោកបានសំណូមពរឲ្យប្រជាពលរដ្ឋទាំងនោះ មកដាក់ពាក្យបណ្ដឹង ដើម្បីលោកមានមូលដ្ឋានក្នុងការជួយស្រាវជ្រាវ ដើម្បីជួយសង្គ្រោះ។
លោក យ៉ា ណាវុធ៖ «ករណីខ្លះ យើងកំពុងដំណើរការដោះស្រាយ។ ការតាមរកជនរងគ្រោះ មិនមែនជាការងាយទេ បើសិនជាជនរងគ្រោះត្រូវជាប់ក្នុងពន្ធនាគារ អាហ្នឹងយើងស្រួលរកទេ តែបើត្រូវគេជួញដូរទៅដាក់នៅផ្ទះបន ឬចុះទូកនេសាទនោះ គឺយើងមានការលំបាក។ លុះត្រាតែគ្រួសារជនរងគ្រោះ មកដាក់ពាក្យបណ្ដឹងនៅអង្គការខ្ញុំ ដើម្បីខ្ញុំសាកសួររកប្រភព ឬបើគ្រួសារជនរងគ្រោះមានព័ត៌មានជាក់លាក់ ទើបសង្ឃឹមថា អាចរកឃើញ...»។
មន្ត្រីសម្របសម្រួលសមាគម អាដហុក ការពារសិទ្ធិមនុស្ស ខេត្តកំពង់ឆ្នាំង គឺលោក សំ ច័ន្ទគា បានឲ្យដឹងថា គិតចាប់ពីខែមករា មកដល់ខែមិថុនា ឆ្នាំ២០១២ លោកទទួលបានពាក្យបណ្ដឹងជាផ្លូវការចំនួន ៦៨ករណី អំពីការបាត់ដំណឹងកូនចៅ ឬសាច់ញាតិរបស់ពួកគាត់។ ក្នុងនោះមាន ២១ករណី គឺជាពលករធ្វើការតាមទូកនេសាទ។ លោកថា កន្លងទៅ អង្គការ អាដហុក បានធ្វើអន្តរាគមន៍បានជោគជ័យដោយមានពលការិនី ១១នាក់ និងពលករចុះទូកនេសាទ ២នាក់ បានវិលត្រឡប់មកលំនៅដ្ឋានវិញ៕
No comments:
Post a Comment
yes