រាជធានីភ្នំពេញ ៖ យោងតាមសេចក្តីប្រកាសព័ត៌មានមួយរបស់សាលារាជធានីភ្នំពេញចុះថ្ងៃទី២១ សីហា ឆ្នាំ២០១២ ឱ្យដឹងថា សាលារាជធានីភ្នំពេញមានរថយន្តចាស់ៗចំនួន៩គ្រឿងដែលត្រូវលក់ចេញជាដែកអេតចាយ ដោយដាក់ដេញថ្លៃជាសាធារណៈតែមិនបានឱ្យដឹងថានឹងដាក់តម្លៃប៉ុន្មាននោះទេ ។
សាលារាជធានីភ្នំពេញឱ្យដឹងទៀតថា យោងតាមលិខិតលេខ៤៧១៨ សហវ.ទរ ចុះថ្ងៃទី១៣ កក្កដា ឆ្នាំ២០១២ របស់ក្រសួងសេដ្ឋកិច្ច និងហិរញ្ញវត្ថុ សាលារាជធានីភ្នំពេញមានកិត្តិយសជូនដំណឹងដល់ក្រុមហ៊ុន អ្នកម៉ៅការ និងអាជីវករទាំងអស់ឱ្យបានជ្រាបថា សាលារាជធានីភ្នំពេញមានបំណងដាក់ឱ្យដេញថ្លៃសាធារណៈលក់ដែកអេតចាយនៃរថយន្តខូចគុណភាពចំនួន៩គ្រឿង ដែលនឹងប្រព្រឹត្តទៅនាថ្ងៃទី៣ កញ្ញា ឆ្នាំ២០១២ ចាប់ពីម៉ោង២និង៣០នាទីរសៀលនៅសាលារាជធានីភ្នំពេញ ។
ទោះជាយ៉ាងណាសាលារាជធានីភ្នំពេញមិនបានបញ្ជាក់ពីប្រភេទ ឬទំហំនៃរថយន្ត ឬក៏ម្ចាស់កម្មសិទ្ធិជានរណា ឬក៏ជារបស់សាលារាជធានីផ្ទាល់នោះទេ ។ គេមានការកត់សម្គាល់ថា មានរថយន្តខ្លះដែលបានបង្កគ្រោះថ្នាក់បុកបំផ្លាញសម្បត្តិសាធារណៈត្រូវបាននាំយកទៅរក្សាទុកនៅក្រោមការគ្រប់គ្រងរបស់សាលារាជធានីភ្នំពេញ ដើម្បីឱ្យម្ចាស់ចូលខ្លួនដោះស្រាយសងសំណងខូចខាត តែម្ចាស់ខ្លះមិនបានចូលខ្លួនទេ ព្រោះតែរថយន្តខូចខាតធ្ងន់ ហើយការសងនោះក៏មិនអាចទៅរួចក៏ទុកចោលតែម្តងទៅ ៕
No comments:
Post a Comment
yes