កំពង់ចាម ៖ សកម្មភាពដឹកជញ្ជូនឈើចូលតាមដេប៉ូខុសច្បាប់និងឆ្លងកាត់ខេត្តកំពង់ចាមកំពុងកើតមានយ៉ាងគគ្រឹកគគ្រេងដោយមិនមានសមត្ថកិច្ច ជំនាញរដ្ឋបាលព្រៃឈើខេត្តកំពង់ចាមណាមួយមានចិត្តចេញបង្ក្រាបទាល់តែសោះឡើយ គឺសំងំរាប់ក្បាលកាណូតឬឡានយកលុយតែម្តង។ បច្ចុប្បន្ននេះ គេសង្កេតឃើញភាពអនាធិបតេយ្យនៃការដឹកជញ្ជូនឈើចូលដេប៉ូលក់ឈើនៅឃុំហាន់ជ័យស្រុកកំពង់សៀមដែលមាន ឈើអារគ្រប់ប្រភេទរួមទាំងឈើប្រណិត ល្មើសច្បាប់ផងនោះភាគច្រើនឈ្មួញដឹកតាមកាណូតមកពីខេត្តក្រចេះយកមកលក់នៅតាមដេប៉ូនោះគឺមិនមាន សមត្ថកិច្ចជំនាញរដ្ឋបាលព្រៃឈើខេត្តកំពង់ចាមធ្វើការបង្ក្រាបនោះទេ។
ម្ចាស់ដេប៉ូដែលប្រកបរបរលក់ឈើនៅឃុំហាន់ជ័យស្រុកកំពង់សៀមមានឈ្មោះ ប៉េង សៀ ឈ្មោះ គា ឈ្មោះ ឡៃ សង ឈ្មោះ ញ៉ ឈ្មោះ តាឈង និងកូន តាឈង ហើយអ្វីដែលក្រុមគាត់អាចប្រកបមុខរបរនេះបាន គេសង្ស័យថាមានការបែងចែកផលប្រយោជន៍ជូនលោក ទឹម សុខុម នាយសង្កាត់រដ្ឋបាលព្រៃឈើកំពង់ចាមដែលពូកែខាងការរូសនិងរកប្រាក់ទៅជូនលោក ប្រាក់ ណូម៉ា ជាមេព្រៃធំជាងគេនៅខេត្តកំពង់ចាម។ ដោយឡែកចំពោះ ភាពអនាធិបតេយ្យនៃការដឹកជញ្ជូន ឈើប្រណិតដូចជាឈើគ្រញូងឆ្លងកាត់លើស្ពានគីហ្សូណាសឹងរាល់យប់ ចាប់ពីម៉ោង ១០និង១៥នាទី ព្រឹក និង ចាប់ពីម៉ោង ១២ យប់ មានរថយន្តប្រភេទកាមរីហើម និង លុចស៊ីស ៤៧០ , ធុនត្រា, ឆេរលេច្ស ពី៤ ទៅ៧គ្រឿង បើកដង្ហែរគ្នានៅលើស្ពានគីហ្សូណា មិនឃើញមន្ត្រីអាជ្ញាធរ និងជំនាញរដ្ឋបាលព្រៃឈើខេត្តកំពង់ចាមយកចិត្តទុកដាក់បង្ក្រាបទេ។
លោក ប្រាក់ ណូម៉ា នាយខណ្ឌរដ្ឋបាលព្រៃឈើខេត្តកំពង់ចាមកំពុងសម្ងំមិនមានវិធានការបង្ក្រាបការដឹកជញ្ជូនឈើខុសច្បាប់នោះទេ។ សព្វថ្ងែនេះមន្ត្រីជំនាញរដ្ឋបាលព្រៃឈើខេត្តកំពង់ចាមក្រោមការគ្រប់គ្រងដោយលោក ប្រាក់ ណូម៉ា បានចាត់តាំងបងើ្កតក្រុមចម្រុះដើម្បីទប់ស្កាត់បទល្មើសព្រៃឈើ ដោយមានលោក តយ ចាន់ផល នាយរងសង្កាត់រដ្ឋបាលព្រៃឈើស្រុកកងមាសដែលជាមនុស្សជំនិតរបស់លោក ប្រាក់ ណូម៉ា ជាប្រធាន លោក ឃី ចាន់សាវ៉ន ហៅ ចាម នាយរងសង្កាត់រដ្ឋបាលព្រៃឈើស្រុកចំការលើ និងលោក សួរ ដាវី នាយរងផ្នែករដ្ឋបាលព្រៃឈើត្រើយស្ដាំទទូលបន្ទុកស្រុកចំការលើ ប្រចាំការនៅចំណុចក្នុងភូមិសាស្ត្រត្រើង រួមព្រំប្រទល់បីស្រុកជាប់គ្នា និងលោក ទឹម សុខុម នាយសង្កាត់រដ្ដបាលព្រៃឈើកំពង់ចាមប៉ុន្តែគេសង្កេតឃើញថាចាប់តាំងពីថ្ងៃបង្កើតរហូតពេលនេះមិនមានបង្ក្រាបបានម្តងសោះឡើយ ឃើញតែបទល្មើសសកម្មភាពដឹកឈើគ្រញូងខុសច្បាប់ឆ្លងកាត់ខេត្តកំពង់ចាមកាន់តែគគ្រឹកគគ្រេង។
ឈ្មួញរកស៊ីដឹកឈើកគ្រញូងមានដូចជា ពៅ សក់បាស់, លី ឈុនអាង ប្អូន លី ឈុនអ៊ូរ ឈ្មោះលីឡាយ ក្មួយ លី ឈុនអ៊ូរ និង លី ឈុនអ៊ូរដែលល្បីខាងរកស៊ីដឹកឈើឆ្លងកាត់ខេត្តកំពង់ចាមមានទីលំនៅផ្លូវបំបែកត្រើងនិងឈ្មោះ ឡាយ កូនឧកញ៉ានៅស្រុកមេមត់។ លោក ប្រាក់ ណូម៉ា មានការចាត់តាំងបងើ្កតក្រុមចម្រុះដើម្បីទប់ស្កាត់បទល្មើសព្រៃឈើ ប៉ុន្តែមិនបាន បង្ក្រាបអ្វីទេ ក្រៅពីបង្កើតប៉ុស្តិ៍ជជុះរកលុយចិញ្ចឹមឆ្នាំងបាយលោក ប្រាក់ ណូម៉ា ហើយប៉ុស្តិ៍ជជុះទាំងនេះនៅពេលមានប្រជាពលរដ្ឋដឹកអុសដឹកធ្យូងតាមរឺម៉កគឺមិនដែលអនុគ្រោះនោះ ឡើយបើមិនបង់លុយជូនក្រុមចម្រុះនោះទេគឺគេធ្វើការឃាត់ទុក។
ដោយឡែកសម្រាប់ក្រុមឈ្មួញសម្រុកដឹកឈើចេញពីខេត្តកំពង់ធំ ឆ្លងកាត់មុខស្នាក់ការរដ្ឋបាលព្រៃឈើស្រុកចំការលើ ស្រុកំពង់សៀម ក្រុងកំពង់ចាម ស្រុកត្បូងឃ្មុំ ស្រុកពញាក្រែក ស្រុកមេមត់ជាច្រើនកន្លែងក្នុងទឹកដីខេត្តកំពង់ចាម បន្តទៅកាន់កាន់ប្រទេសវៀតណាមយ៉ាងរលូនល្អគ្មានការបង្ក្រាប ក៏ដោយសារតែភាពអសកម្មរបស់ជំនាញមេព្រៃ ទើបក្រុមឈ្មួញអាចដឹកឈើខុសច្បាប់តាមតែអំពើចិត្ត ។ មន្ត្រីរដ្ឋបាលព្រៃឈើនៅខេត្តកំពង់ចាមដែលសុំមិនបញ្ចេញឈ្មោះបានអោយដឹងថា លោក តយ ចាន់ផល នាយរងសង្កាត់រដ្ឋបាលព្រៃឈើស្រុកកងមាសគឺជាមនុស្សជំនិត របស់លោក ប្រាក់ ណូម៉ា និងជាអ្នករកលុយជូនលោក ប្រាក់ ណូម៉ា អោយតែតំបន់ណាមានលុយ គឺឃើញលោក តយ ចាន់ផល ចេញមុខជានិច្ច៕
No comments:
Post a Comment
yes