ភ្នំពេញ ៖ បុរសជនជាតិវៀតណាមមិនចេះនិយាយភាសាខ្មែរម្នាក់ត្រូវបានកំលាំងសន្តិសុខផ្សារធំថ្មីនិងកំលាំងប៉ូលិសមូលដ្ឋានសហការគ្នាចាប់បង្ក្រាបភ្លាមៗបន្ទាប់ពីឭសូរសម្លេងស្រែកអោយជួយអន្តរាគមន៍ពីសំណាក់អាជីវករលក់គ្រឿងអលង្ការក្នុងផ្សារធំថ្មី១តូបដែលត្រូវបុរសជនជាតិវៀតណាមរូបនោះចូលបន្លំបាញ់ស្ព្រាយដាក់ភ្នែកក្នុងគោលបំណងប្លន់យកគ្រឿងអលង្ការប៉ុន្តែមិនបានសម្រេចឡើយព្រោះស្ថិតក្នុងចំណោមមនុស្សអ៊ូអរក្នុងផ្សារ។
ហេតុការណ៍ប្លន់មិនបានសម្រេចនោះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី១១ខែសីហាឆ្នាំ២០១២នៅតូបលក់គ្រឿងអលង្ការលេខF1006ក្នុងបរិវេណផ្សារធំថ្មី សង្កាត់ផ្សារថ្មីទី១ ខណ្ឌដូនពេញ។
សមត្ថកិច្ចបានអោយដឹងថាជនសង្ស័យដែលត្រូវចាប់បង្ក្រាបបានភ្លាមៗនោះឈ្មោះហ្វៀង យ៉ាំងតាំ ភេទប្រុសអាយុ៤៣ឆ្នាំទើបនិងមកពីប្រទេសវៀតណាមនៅថ្ងៃកើតហេតុនេះតែម្តងនិងត្រូវបានដកហូតវត្ថុតាងរួមមានដបបំពងស្ព្រាយ១ ម៉ាស់បិតមុខ១ ស្កុត១ដុំនិង កាំបិតកៃ១។
ក្មេងស្រីជនរងគ្រោះ២នាក់ម៉ីងនិងក្មួយដែលត្រូវជនល្មើសបាញ់ស្ព្រាយដាក់ភ្នែកនិងមុខម៉ាត់នោះឈ្មោះ ឆ ប៉េងហ៊ុយ អាយុ២២ឆ្នាំ និងក្មួយឈ្មោះ ប៊ូ ហ្កិចឡេង អាយុ៧ឆ្នាំពួកគេទាំង២នាក់មានទីលំនៅក្នុងសង្កាត់ផ្សារកណ្តាលទី១ ខណ្ឌដូនពេញ មិនបានបាត់បង់ទ្រព្យសម្បត្តិអ្វីឡើយហើយក៏មិនរងរបួសធ្ងនធ្ងរដល់ខ្លួនប្រាណនោះទេ។
បើតាមការអោយដឹងពីក្មេងស្រីរងគ្រោះ២នាក់មីងនិងក្មួយបានបំភ្លឺប្រាប់សមត្ថកិច្ចមូលដ្ឋានបានអោយដឹងថានៅមុនពេលកើតហេតុពួកនាងបានមកលក់ដូរគ្រឿងអលង្ការជំនួសម្តាយរបស់នាងខណៈគាត់មិននៅពេលនោះស្រាប់តែឃើញជនល្មើសម្នាក់បានដើរចូមមកតូបរស់នាងដែលនឹកស្មានថាជាភ្ញៀវមករកទិញគ្រឿងអលង្ការពេលនោះជនល្មើសក៏បានដកបំពង់ជ័រចេញពីហោប៉ៅមកបាញ់ថ្នាំអ្វីម្យ៉ាងដាក់មុខរបស់ពួកនាងធ្វើអោយស្រវាំងមើលអ្វីមិនច្បាស់ហើយពួកនាងក៏ស្រែកឆោឡោអោយគេជួយតែម្តង។
បើតាមការអោយដឹងពីអាជីវករលក់ដូរជិតខាងកន្លែងកើតហេតុបាននិយាយគ្រប់ៗគ្នាថាមុនដំបូងក្នុងហេតុការណ៍នោះគេនឹកស្មានថាក្មេងស្រីទាំង២នាក់នោះត្រូវគេជះទឹកអាស៊ីតដាក់ប្រហែលជារលាករលួយពេញខ្លួនប្រាណបាត់ទៅហើយតែតាមការពិតនោះមិនមែនករណីជះទឹកអាស៊ីតដាក់នោះទេគឺជាករណីប៉ុនប៉ងប្លន់ទូមាសទៅវិញ នោះសំណាងល្អហើយដែលជនល្មើសធ្វើសកម្មភាពនោះត្រូវបានសមត្ថកិច្ចចាប់បង្ក្រាបបានទាន់ពេលវេលាដែលធ្វើអោយជនរងគ្រោះមិនបានបាត់បង់អ្វីឡើយ។
ប្រភពព័ត៌មានបានបន្តទៀតថាក្នុងហេតុការណ៍នោះជនល្មើសត្រូវបានសមត្ថកិច្ចវ៉ៃខ្នោះទៅសួរនាំមិនចេះនិយាយភាសារខ្មែរឡើយហើយសមត្ថកិច្ចក៏បានរកអ្នកបកប្រែដោយជនល្មើសសារភាពថាខ្លួនគេគ្មានលុយទើបមកដល់ពីប្រទេសវៀតណាមនាព្រឹកកើតហេតុនេះទើបចូលក្នុងផ្សារធំថ្មីនេះដើម្បីប្លន់យកគ្រឿងអលង្ការគេដោយប្រើ ស្ព្រាយដែលរូបគេបានទិញពីប្រទេសវៀតណាមយកមកធ្វើជាអាវុធដើម្បីបាញ់ដាក់ភ្នែកជនរងគ្រោះអោយងងឹតមើលអ្វីមិនឃើញងាយនិងធ្វើសកម្មភាពប្លន់តែរូបគេធ្វើមិនបានសម្រេចទើបសមត្ថកិច្ចចាប់ខ្លួនបានតែម្តង។
ប្រភពព័ត៌ខ្លះទៀតនិយាយថាជនជាតិវៀតណាមរូបនោះហាក់បីដូចជាព្រហើនខ្លាំងណាស់ហ៊ានធ្វើសកម្មភាពក្នុងកណ្តាលផ្សារធំថ្មីក្នុងចំណោមហ្វូងមនុស្សជាច្រើននាក់ចេញចូលដែលនឹកស្មានថាវាងាយនិងធ្វើសកម្មបានសម្រេចហើយមើលទៅ។
សមត្ថកិច្ចមូលដ្ឋានបានបញ្ជាក់ថាជនសង្ស័យត្រូវឃាត់ខ្លួនសួរនាំដើម្បីកសាងសំណុំរឿងបញ្ជូនទៅតុលាការ។ចំណែកក្មេងស្រីរងគ្រោះទាំង២នាក់ត្រូវបានបញ្ជូនទៅទេព្យឯកជនដើម្បីព្យាបាលប៉ុន្តែមិនមានស្ថានភាពធ្ងន់ធ្ងរឡើយហើយម្យ៉ាងវិញទៀតទ្រព្យសម្បត្តិគ្រឿងអលង្ការរបស់ជនរងគ្រោះមិនមានការបាត់បង់ឡើយ៕រស្មី
No comments:
Post a Comment
yes