បន្ទាប់ពីរលកពាក្យសម្តីដែលធ្វើឲ្យបេះដូងបុរសមួយចំនួនគ្រាំគ្រាព្រោះតែទទួលដំណឹងថា ឈិត សុវណ្ណបញ្ញា បានភ្ជាប់ពាក្យជាមួយបុរសម្នាក់កាលពីរំលងប៉ុន្មានខែថ្មីៗនោះ នៅពេលនេះ មានការនិយាយពីមាត់មួយទៅមាត់មួយថា តារាចម្រៀងស្រស់សោភាល្បីមធ្យមរបស់រស្មីហង្សមាសរូបនោះ គ្រោងនឹងដើរចូលរោងការហើយនៅពេលដ៏ខ្លីខាងមុខ។
ឈិត សុវណ្ណបញ្ញា បានឈរជើងនៅផលិតកម្មរស្មីហង្សមាសមិនតិចឆ្នាំទេ តែទោះបីជានាងមិនបានក្រសោបភាពល្បីល្បាញបានខ្លាំងក្លាក្តី ក៏នាងជាតារាមានមុខមាត់ម្នាក់ផងដែរ និងរមែងទទួលបានការងារសិល្បៈច្រើន មិនចាញ់អ្នកឈរលំដាប់កំពូលដែរ។ ដោយឡែកបើក្រឡេកមើលប្រជាប្រិយភាពរបស់នាងនៅក្រៅប្រទេសវិញ ក៏មិនអន់ដែរ ពោលគឺនាងតែងទទួលបានឱកាសចេញទៅសម្តែងច្រៀងនៅឯនាយសមុទ្រជាញឹកញាប់។ ជាក់ស្តែងបន្ទាប់ពីសម្តែងនៅប្រទេសកាណាដាកាលពីឆ្នាំ២០១១ កាលពីប៉ុន្មានខែមុនក្នុងឆ្នាំ២០១២នេះ នាងទើបតែត្រឡប់មកពីសហរដ្ឋអាមេរិកវិញ ជាមួយនឹងពាក្យចចាមអារាមស្នេហាទៀតផង តែទោះជាយ៉ាងណា នាងតែងបដិសេដថាគ្មាននោះទេ។
គួររំឭកថា ក្នុងអំឡុងពេលនៃការសម្តែង-ច្រៀងនៅប្រទេសកាណាដា ប្រភពនៅទីនោះ បានឲ្យដឹងថា ឈិត សុវណ្ណបញ្ញា ត្រូវបានបុរសម្នាក់រៀបចំធ្វើពិធីខួបកំណើតធំដុំមួយឲ្យនាងដោយមានអញ្ជើញភ្ញៀវចូលរួមរាប់រយនាក់ទៀតផង ហើយក្រោយពេលដែលនាងត្រឡប់មកដល់ស្រុកខ្មែរនេះ ក៏មានព័ត៌មានខ្សឹបខ្សៀវពីបងប្អូនខ្មែររស់នៅប្រទេសកាណាដាថា បុរសម្នាក់នោះ នឹងជិះយន្តមកស្រុកខ្មែរតាមក្រោយ នៅចុងឆ្នាំ២០១១នេះ ដើម្បីសុំចូលចែចូវនាងទៀតផង ហើយនៅពេលត្រឡប់មកពីអាមេរិកក៏មានពាក្យស្រដៀងគ្នានេះដែរថា នាងមានអ្នកចោមរោមតាមស្រឡាញ់ច្រើន។
ប៉ុន្តែនៅពេលថ្មីៗនេះ ការលេចឮពីការត្រៀមចូលរោងការរបស់នាងបានលេចឡើងផុលផុសខ្លាំងតែម្តង ពោលគឺមានគេនិយាយថា គ្រួសាររបស់នាងជាអ្នករៀបចំទុកដាក់ឲ្យនាង ស្របគ្នានឹងអ្វីដែលគេម្នាក់ៗមួយរយៈចុងក្រោយនេះ កត់សម្គាល់ឃើញថា ឈិត សុវណ្ណបញ្ញា មានការតុបតែងខ្លួន និងបញ្ចុះទម្ងន់យ៉ាងចំឡែកនោះ។
អ្នកសិល្បៈមួយចំនួនបានបង្ហើបឲ្យដឹងនៅពេលនាងឡើងច្រៀងលើឆាកតន្ត្រីរបស់ស្ថានីយទូរទស្សន៍បាយ័នក្នុងកម្មវិធី តន្ត្រីយុវវ័យកាលពីសប្តាហ៍មុនថា ពួកគេតែងឮថា ឈិត សុវណ្ណបញ្ញា នឹងចូលរោងការនៅពេលខាងមុខនេះ តែនោះមិនដឹងជាការពិតប៉ុន្មានភាគរយឡើយ ព្រោះអ្នកសិល្បៈតែងសួរគ្នាពីរឿងនេះ ហើយ ឈិត សុវណ្ណបញ្ញា ក៏ចេះតែញញឹមញញែមមិនព្រមនិយាយអ្វីនោះ។
ការបង្ហើបពីដំណឹងតារាចម្រៀង ឈិត សុវណ្ណបញ្ញា ត្រៀមចូលរោងការនោះ ក៏ស្របគ្នានឹងការលើកឡើងរបស់ប្រព័ន្ធផ្សព្វផ្សាយមួយចំនួនផងដែរ។ ពួកគេបានរៀបរាប់ថា នាងកំពុងរៀបចំខ្លួនដើម្បីទទួលយកគម្រោងអាពាហ៍ពិពាហ៍ដែលនឹងឈានមកដល់ឆាប់ៗនេះ។ ប៉ុន្តែទោះជាយ៉ាងណា ការលើកឡើងទាំងប៉ុន្មានដូចជាមិនអាចជម្រះមន្ទិលរបស់ទស្សនិកជនបាន១០០ភាគរយនៅឡើយ ព្រោះ ឈិត សុវណ្ណបញ្ញា តែងធ្វើការបដិសេធនាពេលកន្លងមក ហើយនៅពេលសុំសាកសួរនាងក្នុងពេលជួបមុខផ្ទាល់ ឈិត សុវណ្ណបញ្ញា ក៏រារែកមិនព្រមទម្លាយ ហើយប្រកែកមិនព្រមនិយាយនោះ។
នៅពេលសុំសម្ភាសន៍នាងពាក់ព័ន្ធនឹងការលើកឡើងថានាងគ្រោងចូលរោងការក្នុងជំនួបមួយនៅស្ថានីយទូរទស្សន៍បាយ័ន ឈិត សុវណ្ណបញ្ញា បាននិយាយប្រកែកថា៖«អត់ទេបង អត់ទេ! រឿងហ្នឹងខ្ញុំមិនអាចនិយាយបានទេ។ បើចង់ដឹងទាល់តែសួរក្រុមហ៊ុន»។
ដោយឡែកឪពុករបស់តារាចម្រៀងរូបនេះក៏មិនអាចទាក់ទងសុំការបំភ្លឺបានដែរដោយសារគ្មានអ្នកលើកទូរស័ព្ទ។
នៅពេលដែល ឈិត សុវណ្ណបញ្ញា ឆ្លើយបែបនេះ ទស្សនិកជនបានសម្តែងនូវចម្ងល់ថា តើរឿងខ្លួននាងរៀបការក្រុមហ៊ុនរស្មីហង្សមាសជាអ្នករៀបចំឲ្យឬយ៉ាងណា? តែទស្សនិកជនមួយចំនួនទៀតបានឆ្លើយថា នោះគ្រាន់តែជាការដោះសាររបស់នាងដើម្បីគេចពីការសម្ភាសន៍តែប៉ុណ្ណោះ៕
No comments:
Post a Comment
yes