ទាហានឈុតខ្មៅថៃ
ប្រជាពលរដ្ឋខ្មែរ៤នាក់ក្នុងចំណោម១៩នាក់បានរងរបួសនិងបាត់ខ្លួនកាលពីព្រឹកថ្ងៃអង្គារ បន្ទាប់ពីពួកគេត្រូវទាហានឈុតខ្មៅថៃប្រមាណជា២០នាក់ដេញបាញ់ខណៈពេលដែលពួកគេឆ្លងដែនពីខេត្តបន្ទាយមានជ័យចូលអូសឈើក្រញូងនៅក្នុងខេត្តសូរិន្ទក្នុងទឹកដីប្រទេសថៃ។
លោកឈួតថា នាយសេនាធិការនគរបាលស្រុកថ្មពួកខេត្តបន្ទាយមានជ័យបានមានប្រសាសន៍ប្រាប់កាសែតភ្នំពេញ ប៉ុស្តិ៍ ថាប្រជាពលរដ្ឋខ្មែរសរុបចំនួន១៩នាក់រស់នៅក្នុងឃុំបន្ទាយឆ្មារស្រុកថ្មពួកបានលួចចូលទៅអូសឈើក្រញូងនៅក្នុងទឹកដីថៃប្រហែលជា១គីឡូម៉ែត្រពីព្រំដែននៅវេលាម៉ោងជិត ១២រំលងអធ្រាត្រឈានចូលព្រឹកថ្ងៃអង្គារ ពេលនោះពួកគេត្រូវបានទាហានឈុតខ្មៅថៃប្រមាណជា២០នាក់បាញ់រះធ្វើឲ្យពួកគេរត់ យកប្រាសអាយុរៀងៗខ្លួន។
លោកឈួតថាបានមានប្រសាសន៍បញ្ជាក់ថា “ពួកគេត្រូវបាញ់ពេលកំពុងតែអូសឈើក្រញូងចូលដីខ្មែរទាំងកណ្តាលអាធ្រាត្រ។ គ្មានអ្នកណាម្នាក់ត្រូវគ្រាប់កំាភ្លើងទេតែ៣នាក់បានរបួសដោយសាររត់បុកដើមឈើនិងថ្ម ហើយរមៀលធ្លាក់ពីលើភ្នំដែងរែក។ រីឯម្នាក់ទៀតកំពុងបាត់ខ្លួន”។
លោកឈួតថា បានបន្ថែមថាទាហានឈុតខ្មៅថៃបានរឹបអូសយកឈើក្រញូងនោះទាំងអស់។ ពួកគេបានមក កន្លែងកើតហេតុនោះម្តងទៀតដើម្បីពិនិត្យនិងបានបាញ់បង្អើលជាច្រើនគ្រាប់កាលពីថ្ងៃអង្គារក្រែងលូ អ្នកលួចកាប់ឈើពួននៅក្បែរៗនោះ។
មន្ត្រីនគរបាលរូបនេះបានមានប្រសាសន៍បន្តថាក្នុងចំណោមប្រជាពលរដ្ឋទាំង១៩នាក់នោះមានមេក្លោងម្នាក់ឈ្មោះ វ៉ុនវ៉ន អាយុ៤២ឆ្នាំរស់នៅក្នុងភូមិប្រសាទត្បែង ឃុំបន្ទាយឆ្មារហើយរហូតមកដល់ពេលនេះមេក្លោងរូបនេះកំពុងលាក់ខ្លួន។
លោកឈួតថា បានថ្លែងថា“ឈ្មោះវ៉ុន វ៉នហ្នឹងជាអ្នកដឹកនាំប្រជាពលរដ្ឋឲ្យទៅអូសឈើក្រញូង។ គេកំពុង លាក់ខ្លួននៅក្នុងព្រៃភ្នំដងរែកខ្លាចសមត្ថកិច្ចយើងចាប់ខ្លួន។ សមត្ថកិច្ចយើងកំពុងស្វែងរកគេនិងពលរដ្ឋផ្សេងទៀត ដើម្បីសួរនាំពីរឿងនេះ”។ លោកក៍បានអះអាងផងដែរថាកាលពីពីរសប្តាហ៍មុនក៍មានហេតុការទាហានថៃបាញ់អ្នក ចូលព្រៃអូសឈើក្រញូងបែបនេះដែរ។
ទាក់ទងទៅនឹងបញ្ហានេះលោកអ៊ុក កែវរតនៈអ្នកនាំពាក្យសាលាខេត្តបន្ទាយមានជ័យបានអះអាងថាមន្ត្រីអគ្គកុលស៊ុលខ្មែរនៅប្រទេសថៃកំពុងធ្វើការស្រាវជ្រាវរកជនដៃដល់ដែលបានបាញ់ប្រហារលើពលរដ្ឋខ្មែរដែលឆ្លងដែនខុសច្បាប់ចូលទឹកដីថៃព្រោះថាការបាញ់បែបនេះវាខុសទៅនឹងកិច្ចព្រមព្រៀងដែលអាជ្ញាធរកម្ពុជានិងថៃបានចុះជាមួយគ្នា។
លោកអ៊ុកកែវរតនៈបានថ្លែងបញ្ជាក់ថា “អគ្គកុលស៊ុលខ្មែរយើងកំពុងធ្វើការលើរឿងបាញ់នេះ។ យើងបានលើក ឡើងពីបញ្ហានេះជាមួយនឹងភាគីថៃរាល់កិច្ចប្រជុំទាំងអស់តែនៅតែកើតមានការបាញ់បែបនេះទៀត”។
លោកបានមានប្រសាសន៍បន្តថារាល់ការឆ្លងដែនចូលដីថៃខុសច្បាប់សុទ្ធតែមានមេខ្យល់ទាំងអស់ហើយវាពិបាកសម្រាប់សមត្ថកិច្ចនិងអាជ្ញាធរខ្លាំងណាស់ព្រោះថានៅខេត្តបន្ទាយមានជ័យមានច្រករបៀងរាប់មិនអស់ដែលប្រជាពលរដ្ឋលួចឆ្លងដែនបាន។
យោងតាមរបាយការណ៍របស់ការិយាល័យទំនាក់ទំនងកម្ពុជា-ថៃដែលបានចេញផ្សាយនៅ ដើមខែសីហានេះបានអោយដឹងថានៅ៦ខែដើមឆ្នាំ២០១២នេះមានពលរដ្ឋខ្មែរចំនួន៣៨នាក់ត្រូវបានទាហានថៃបាញ់ស្លាប់ពេលឆ្លងដែនកាប់ឈើខុសច្បាប់ហើយ១០នាក់ផ្សេងទៀតរងរបួស១៩៤នាក់ត្រូវបានជាប់ពន្ធ័នាគាហើយម្នាក់បាត់ខ្លួន។ក្រៅពីនោះមានអ្នកកាប់ឈើចំនួន៤៦នាក់ផ្សេងទៀតក៍ត្រូវបានដោះលែងពីប្រទេសថៃផងដែរ។
No comments:
Post a Comment
yes