សាលាដំបូងខេត្តកណ្តាល កោះហៅប្រធានសហភាពសហជីពកម្ពុជាលោក រ៉ុង ឈុន ដើម្បីសាកសួរនៅថ្ងៃទី១១ ខែកញ្ញា ឆ្នាំ២០១២នេះ ក្រោមបណ្តឹងរបស់ថៅកែរោងចក្រតៃយ៉ាង ពីបទញុះញង់កម្មករឲ្យកូដកម្ម និងបរិហារកេរ្តិ៍។
ដីកាកោះរបស់សាលាដំបូងខេត្តកណ្តាលនេះ គឺចេញដោយព្រះរាជអាជ្ញា លោក ទេព មុនិន្ទ កាលពីថ្ងៃទី២៧ ខែសីហា។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថាលោកស្វាគមន៍ចំពោះពាក្យបណ្តឹងរបស់អគ្គនាយកនៃសហគ្រាសតៃយ៉ាង។ លោកបន្ថែមថា លោកមុននឹងធ្វើបាតុកម្មលោកបានជូនដំណឹងទៅស្ថាប័នពាក់ព័ន្ធផងដែរ ៖”យើងគិតថា វាអត់មានមូលដ្ឋានរឹងមាំអីទេបណ្ដឹងនេះ ពីព្រោះបើយើងមើលទៅផ្លូវច្បាប់ យើងមានសិទ្ធិគ្រប់គ្រាន់ក្នុងការធ្វើការទាមទារតាមរយៈកូដកម្ម បាតុកម្ម ដោយសន្តិវិធី។ ហើយការដែលយើងធ្វើនេះ យើងបានជូនដំណឹងទៅក្រុមហ៊ុន អាជ្ញាធរពាក់ព័ន្ធគ្រប់លំដាប់ថ្នាក់ ។ដូច្នេះវាអត់មានបញ្ហាអីទេ យើងស្វាគមន៍រាល់បញ្ហា យើងនឹងហ៊ានប្រឈមអ្វីដែលយើងបានធ្វើ។ យើងហ៊ានទទួលខុសត្រូវពីព្រោះយើងគ្រាន់តែប្រើតួនាទី ការពារអ្នកទុនខ្សោយ ការពារយុត្តិធម៌ដល់អ្នកទន់ខ្សោយ ។
ព្រះរាជអាជ្ញាសាលាដំបូងខេត្តកណ្តាល លោក អ៊ុក គឹមសិទ្ធិ ដែលដឹងរឿងនេះដែរ មានប្រសាសន៍ថា តុលាការគ្រាន់តែកោះហៅលោក រ៉ុង ឈុន ឲ្យចូលបំភ្លឺ ហើយតុលាការមិនទាន់កំណត់ថាមានទោស ឬមិនមានទោសនោះទេ ៖”យើងអត់អាចបកស្រាយថា ខុសឬត្រូវ គ្រាន់តែកោះហៅ គាត់មកបញ្ជាក់ដើម្បីមកបំភ្លឺទាក់ទិននឹងបណ្ដឹងហ្នឹងទេ។ អញ្ចឹងគេមិនអាចសន្មត់ជាមុន កោះហ្នឹងខុសអីយ៉ាងម៉េច អាស្រ័យលើការបំភ្លឺរបស់គាត់” ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ កត់សំគាល់ថា ក្រុមហ៊ុនកំពុងតែប្រើប្រាស់តុលាការ ដែលគេរិះគន់ថាមិនឯករាជ្យនោះ ដើម្បីគំរាមកំហែងសិទ្ធិសេរីភាពក្នុងការបញ្ចេញមតិស្របច្បាប់ ៖”ជាការគំរាមកំហែងគាត់រួចមកតាំងពីដើមមកក្រុមហ៊ុន រោងចក្រ ក្រសួង ហើយនិងមន្ត្រីនានា តែងតែប្រើប្រាស់ប្រព័ន្ធតុលាការដើម្បីគំរាមកំហែងសហជីព ហើយនិងមន្ត្រីសិទ្ធិមនុស្ស។ ខ្ញុំមើលទៅការប្រើប្រាស់តុលាការជារឿងមួយអត់ប្លែកទេ។ ប៉ុន្តែជារឿងមួយសោកស្ដាយដែរ ដែលយើងមិនអាចឈានទៅ មុខរៀបចំប្រព័ន្ធតុលាការមួយឲ្យបានត្រឹមត្រូវ”។
កន្លងមកលោក រ៉ុង ឈុន ធ្លាប់ដឹកនាំកម្មកររោងចក្រតៃយ៉ាង ទាមទារប្រាក់អត្ថប្រយោជន៍ផ្សេងៗពីក្រុមហ៊ុន ដោយអះអាងថា ក្រុមហ៊ុនប្តូរឈ្មោះថ្មី ដោយមិនផ្តល់ប្រាក់សំណងតាមច្បាប់ការងារ៕
No comments:
Post a Comment
yes