អាជីវករលក់បង្កង និងអាហារសមុទ្រជាច្រើនទៀតនៅផ្សារធំថ្មី។
រដ្ឋាភិបាលកំពុងបង្កើនការព្រលែងបង្កងទៅក្នុងបឹងធម្មជាតិ
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទកំពុងបង្កើនបរិមាណផលបង្កងធម្មជាតិតាមរយៈការព្រលែង កូនបង្កងទៅក្នុងបឹងធម្មជាតិ ដើម្បីផ្តត់ផ្គង់តម្រូវការរបស់ប្រជាពលរដ្ឋ និងទីផ្សារក្នុងស្រុក។
តាមតួលេខពីរដ្ឋបាលជលផល បង្ហាញថា ក្នុងរយៈពេលជាង២ខែមកនេះ គេបានលែងកូនបង្កងទៅក្នុងបឹងធម្មជាតិបានជិតកន្លះលានកូនហើយ ក្នុងចំណោម៧លានកូននៃផែនការរដ្ឋបាលជលផលដែលនឹងលែងនៅក្នុង ឆ្នាំ២០១២នេះ។
តាមការប៉ាន់ប្រមាណបរិមាណផលដែលនឹងទទួលបានពីការលែងកូនបង្កង៧លាន ក្បាល នឹងទទួលបានមកវិញប្រមាណ៧០តោន ពោលគឺ៥ភាគរយដែលសល់ពីការខូចខាតបន្ទាប់ពីព្រលែងទៅក្នុងបឹង។ នេះបើតាមការអះអាងពីមន្ត្រីជលផល។
លោក ណៅ ធួក អគ្គនាយករដ្ឋបាលជលផលនៃក្រសួងកសិកម្ម រុក្ខាប្រមាញ់និងនេសាទ បានឲ្យដឹងថា៖ «យើងបានប្រមូលមេពូជបង្កងបានច្រើនណាស់ហើយ។ យើងបានលែងនៅអាងត្រពាំងថ្ម២០ម៉ឺនកូន។ ពេលនេះយើងមានកូនបង្កងដែលអាចលែងបានចំនួនជិត៤០ម៉ឺនកូនទៀត តែត្រូវរង់ចាំពេលវេលាសមស្រប»។
ការព្រលែងកូនបង្កងទៅក្នុងបឹងធម្មជាតិជាផែនការដើម្បីបង្កើន ផលបង្កងទឹកសាប ដែលមានការធ្លាក់ចុះយ៉ាងខ្លាំង ដោយសារកំណើននៃបទល្មើសខុសច្បាប់ និង កំណើនប្រជាជន។
កូនបង្កងដែលនឹងត្រូវព្រលែងច្រើនជាងគេគឺស្ថិតនៅក្នុងខេត្ត កំពង់ឆ្នាំង ព្រោះបង្កងអាចនឹងចល័តទៅកាន់ខេត្តឆ្ងាយៗទៀត មានដូចជាកំពង់ចាមរហូតដល់ស្ទឹងត្រែង។ ក្នុងចំនួន១លានកូនដែលបានភ្ញាស់រួច នៅសល់ប្រមាណចន្លោះពី៣ម៉ឺនទៅ១០ម៉ឺនកូនប៉ុណ្ណោះ។
បទល្មើសនេសាទជាមូលហេតុធ្វើឲ្យផលនេសាទធ្លាក់ចុះហើយរហូតមកទល់សព្វថ្ងៃបទល្មើសនេសាទនៅតែមានជាហូរហែ។
លោក ណៅ ធួក បញ្ជាក់ថា សកម្មភាពល្មើសទំាងនោះនឹងមិនអាចលុបបានទាំងស្រុងទេ។ លោកបន្តថា៖ «បទល្មើសនេះមិនអាចឲ្យអស់រលីងបានទេ ព្រោះមនុស្សរស់នៅនឹងទឹក។ ខ្ញុំប្រដូចថា បើយើងធ្វើឲ្យអស់ចោរនៅទីក្រុងភ្នំពេញ បទល្មើសនេសាទក៏អស់ដែរ»។ លោកបន្ថែមថា ការបង្ក្រាបបទល្មើសនេសាទមានពី៥ទៅ២០ករណីជារៀងរាល់ថ្ងៃ។
ក្រៅពីផែនការព្រលែងក្នុងបឹងទឹកសាប កសិករមួយចំនួនក៏បានបង្កើនការចិញ្ចឹមតាមគ្រួសារ និងកសិដ្ឋានរបស់ខ្លួនដែរ។
កសិករ ព្រំ វ៉ាត រស់នៅស្រុកអង្គរបុរី ខេត្ដ តាកែវ បាននិយាយថា លោកបានភ្ញាស់កូនបង្កងនៅវគ្គទី១ បានចំនួន២៤ម៉ឺន ហើយពេលនេះលោកកំពុងរៀបចំភ្ញាស់កូនបង្កងពី៥០ម៉ឺនទៅ៦០ម៉ឺនកូន ទៀត ដើម្បីបំពេញតាមតម្រូវការបញ្ជាទិញរបស់កសិករ។
ព្រំ វ៉ាត សង្កេតឃើញថា បង្កងទឹកសាបនៅខេត្តតាកែវ ហាក់មានចំនួនច្រើនជាងឆ្នាំមុន។ បច្ចុប្បន្នបង្កងមានតម្លៃចាប់ពី២៣ដុល្លារ ទៅ៣០ ដុល្លារក្នុងមួយគីឡូក្រាម។ នេះបើតាម លោក ព្រំ វ៉ាត។
លោក ខៀវ សំ ជាកសិករភ្ញាស់កូនបង្កងប្រមាណ២ម៉ឺនទៅ៣ម៉ឺនកូនក្នុងមួយឆ្នាំ សម្រាប់លក់ នៅស្រុកត្រាំកក់ ខេត្ដតាកែវ បាននិយាយថា ឆ្នាំនេះលោកមិនបានភ្ញាស់កូនបង្កងលក់ដូចកាលពីឆ្នាំមុនៗទៀតទេ ព្រោះពុំមានកសិករបញ្ជាទិញសម្រាប់យកទៅចិញ្ចឹមបន្ត។
លោកបន្តថា៖ «ការភ្ញាស់កូនបង្កងលក់ទុកលក់គឺត្រូវការដើមទុនច្រើន បើមិនមានអ្នកបញ្ជាទិញមុនទេ វានាំឲ្យខាត»។
ថ្មីៗនេះរដ្ឋាភិបាលក៏បានអំពាវនាវដល់ប្រជាកសិករ ឲ្យបង្កើនការចិញ្ចឹមបង្កងតាមបែបវារីវប្បកម្ម ដើម្បីបំពេញតម្រូវការក្នុងស្រុក ក៏ជាការបង្កើនបរិមាណផលសម្រាប់នាំចេញផងដែរ។
កម្ពុជាបាននាំចេញផលនេសាទទាំងកែច្នៃ និងមិនទាន់កែច្នៃ ប៉ុន្តែភាគច្រើននាំចេញផលិតផលមិនទាន់កែច្នៃ៕
No comments:
Post a Comment
yes