គំនរឈើហ៊ុប នៅក្នុងក្រុមហ៊ុនដីសម្បទាននៅខេត្តក្រចេះ
ភ្នំពេញៈ រាជរដ្ឋាភិបាលកម្ពុជា បានធ្វើអនុបយោគលើផ្ទៃដីទំហំ ២៣១៨២ ហិកតាទៀតស្ថិតក្នុងស្រុកចំនួន ៣ ក្នុងខេត្តព្រះវិហារ ឲ្យទៅក្រុមហ៊ុនឯកជនចំនួន ៣ ដើម្បីធ្វើការវិនិយោគ ដាំដំណាំកៅស៊ូ និងដំណាំកសិ-ឧស្សាហកម្ម ដោយយោងតាមចំណុចទី ៤ នៃបទបញ្ជា ០១ បប ស្តីពីវិធានការ ពង្រឹងនិងបង្កើនប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច ។ នេះបើយោងទៅតាមសៀវភៅរាជកិច្ចដែលចេញផ្សាយពីទីស្តីការគណៈរដ្ឋ មន្ត្រី ថ្ងៃទី ៨ ខែសីហា ឆ្នាំ ២០១២។
លោក នាយរដ្ឋមន្ត្រី ហ៊ុន សែន បានចុះហត្ថលេខាចំនួន ៣ ដង ផ្តល់ដីនោះដែលស្ថិតក្នុងស្រុកសង្គមថ្មី ស្រុកគូលែន និងស្រុករវៀង ខេត្តព្រះវិហារ ប្រគល់ទៅឲ្យក្រុមហ៊ុន ធ្វើការវិនិយោគ ដំណាំកៅស៊ូ និងដំណាំកសិ-ឧស្សាហកម្ម។ នេះបើយោងតាមអនុក្រឹត្យ ស្តីពីការធ្វើអនុប្រយោគរបស់រាជរដ្ឋាភិបាលចុះថ្ងៃទី ៣ ខែសីហា ឆ្នាំ ២០១២។
នៅក្នុងមាត្រាទីពីរ នៃអនុក្រិត្យរដ្ឋាភិបាលនេះ បានបង្ហាញថា ផ្ទៃដីដែលត្រូវបានធ្វើអនុបយោគដូចកំណត់ក្នុងមាត្រាមួយ នៃអនុក្រឹត្យនេះ ត្រូវសិ្ថតក្រោមការចាត់ចែងនីតិវិធីបន្ត ដោយក្រសួងកសិកម្ម ជាអាជ្ញាធរកាន់កាប់ទ្រព្យសម្បត្តិរបស់រដ្ឋ និងក្រសួងសេដកិច្ច និងហិរញ្ញវត្ថុ ជាអាជ្ញាធរគ្រប់គ្រងទ្រព្យសម្បត្តិរបស់រដ្ឋ ព្រមទាំងមានកិច្ចសហការជាមួយក្រសួងស្ថាប័នពាក់ព័ន្ធ និងអាជ្ញាធរដែនដី ស្របតាមច្បាប់ និងគោលការណ៍របស់រាជរដ្ឋាភិបាល។ នៅក្នុងរាជក្រឹត្យបានបញ្ជាក់ថា៖ «បទប្បញ្ញត្តិទាំងឡាយណា ដែលមានខ្លឹមសារ ផ្ទុយពីអនុក្រឹត្យនេះ ត្រូវទុកជានិរាករណ៍»។
ក្រុមហ៊ុនចំនួន ៣ ដែលទទួលបានដីសម្បទានសេដ្ឋកិច្ច ពីរដ្ឋាភិបាលនោះ មានដូចជាក្រុមហ៊ុន Green Choice (Cambodia) Co., Limited ទទួលបានដីចំនួន ៧៨៦៣ ហិកតា ស្ថិតនៅក្នុងភូមិសាស្ត្រ ស្រុកសង្គមថ្មី និងស្រុករវៀង។ ក្រុមហ៊ុនអេមិណិន អ៊ីលីត (ខេមបូឌា) ខូអិលធីឌី ទទួលបានដីចំនួន ៧៣៥៩ហិកតា ស្ថិតក្នុងស្រុកគូលែន និងក្រុមហ៊ុន Distinct Harvest (Cambodia) Co., Ltd ទទួលបានដីចំនួន ៧៩៦០ ហិកតា សិ្ថតក្នុងស្រុកសង្គមថ្មី និងស្រុករវៀង។
លោក ច័ន្ទ សារុន រដ្ឋមន្ត្រី ក្រសួងកសិកម្ម បានបដិសេធ ពុំធ្វើការអត្ថាធិប្បាយទេ កាលពីម្សិលមិញ ដោយមានប្រសាសន៍ថា លោកជាប់រវល់ភ្ញៀវ។ រីឯលោក អ៊ិត ណូឌី រដ្ឋលេខាធិការ ក្រសួងនេះ ពុំអាចទំនាក់ទំនង សុំអត្ថាធិប្បាយបានឡើយ។
កាលពីថ្ងៃទី ៧ ខែឧសភាលោកនាយករដ្ឋមន្ត្រី បានចេញសេចក្តីប្រកាស ផ្អាកជាបន្ទាន់ និងគ្មានកាលកំណត់នូវការផ្តល់ដីសម្បទានសេដ្ឋកិច្ច ឲ្យទៅក្រុមហ៊ុនឯកជនហើយបានអំពាវនាវឲ្យពិនិត្យមើលឡើងវិញនូវដី សម្បទាន ដែលមានស្រាប់ទាំងអស់។ នៅថ្ងៃទី ១៤ មិថុនា លោក ហ៊ុន សែន បានថ្លែងជាសាធារណៈ បញ្ជាឲ្យអាជ្ញាធរទូទាំងប្រទេស ធ្វើការវាស់វែងបែងចែកដីធ្លី ឲ្យប្រជាពលរដ្ឋ ដែលមានទំនាស់ដីធ្លី ជាមួយក្រុមហ៊ុនព្រៃសម្បទាន ដីសម្បទានសេដ្ឋកិច្ច ហើយធ្វើយ៉ាងយូរបំផុតរយៈពេល៦ ខែ។
ប៉ុន្តែ នៅក្នុងចំណុចទី ៤ នៃបទបញ្ជា ០១ បប ស្តីពីវិធានការពង្រឹង និងបង្កើនប្រសិទ្ធភាព នៃការគ្រប់គ្រងសម្បទានដីសេដ្ឋកិច្ច បានកំណត់ថា ចំពោះសម្បទានដីសេដ្ឋកិច្ច ដែលបានទទួលការអនុញ្ញាត ជាគោលការណ៍ ពីរាជរដ្ឋាភិបាលរួចហើយ មុនថ្ងៃចេញបទបញ្ជានេះ ត្រូវបន្តអនុវត្តតាមគោលការណ៍ច្បាប់ និងនីតិវិធីជាធរមាន។
គេមិនដឹងថា តើចំនួនដីសម្បទានដែលបានទទួលការអនុញ្ញាតជាគោលការណ៍រួចហើយ ពីរដ្ឋាភិបាលមានចំនួនប៉ុន្មាននោះទេ។
សង្គមស៊ីវិល និងគណបក្សប្រឆាំង ដូចពេលមុនៗដែរ គឺមិនគាំទ្រឡើយចំពោះការផ្តល់ដីសម្បទានសេដ្ឋកិច្ច ទៅឲ្យក្រុមហ៊ុនឯកជន ជាអ្វីដែលពួកគេ បានលើកឡើងជាដដែលៗថា បានធ្វើឲ្យអន្តរាយដល់ធនធានធម្មជាតិ និងវិបត្តិសង្គមផ្សេងៗ ខណៈដែលទីតាំងនៃការផ្តល់ដីសម្បទានទាំងនោះ ខ្លះជាដីព្រៃស្រោង ឬជាដីស្រែចម្ការរបស់ប្រជាពលរដ្ឋ ដែលជាញឹកញាប់ធ្វើឲ្យកើតមានជម្លោះ។
លោក អំ សំអាត មន្ត្រីស៊ើបអង្កេតជាន់ខ្ពស់ អង្គការសិទ្ធិមនុស្សលីកាដូ បានថ្លែងថា ក្នុងនាមសង្គមស៊ីវិល លោកនៅតែមានការព្រួយបារម្ភ ចំពោះការបន្តផ្តល់ដីសម្បទានសេដ្ឋកិច្ច ពីសំណាក់រដ្ឋាភិបាល ឲ្យទៅក្រុមហ៊ុនឯកជន នៅខណៈពេលដែលរដ្ឋាភិបាល បានសម្រេចផ្អាកជាបណ្តោះអាសន្នទៅហើយ បើទោះបីជាការបន្តផ្តល់នេះ យោងទៅតាមចំណុចទី ៤ នៃបទបញ្ជា ០១ ក្តី។ លោកបន្តថា៖ «យើងមិនដឹងថា តើនៅមានក្រុមហ៊ុនប៉ុន្មានទៀត ដែលកំពុងបន្តនីតិវិធីនោះទេ។ ដូច្នេះវាធ្វើឲ្យមតិសាធារណជនយល់ច្រឡំថារដ្ឋាភិបាល នៅតែបន្តផ្តល់ដីឲ្យក្រុមហ៊ុនឯកជន ហើយធ្វើឲ្យបទបញ្ជា ០១ គ្មានប្រសិទ្ធភាព»។
លោក យឹម សុវណ្ណ អ្នកនាំពាក្យគណបក្ស សមរង្ស៊ី បានថ្លែងថា រដ្ឋាភិបាលគួរតែបញ្ឈប់ការផ្តល់ដីសម្បទានឲ្យទៅក្រុមហ៊ុនឯកជន ពីព្រោះវាគ្មានបានផលប្រយោជន៍អ្វីនោះទេ ក្រៅអំពីបង្កឲ្យមានការរំលោភសិទ្ធិមនុស្ស និងវិបត្តិសង្គម។
លោកបន្តថា៖ «រដ្ឋាភិបាលគេមានអំណាច ធ្វើអ្វីតាមតែចិត្ត ប៉ុន្តែប្រជាពលរដ្ឋ គួរតែវិនិច្ឆ័យ អំពីទង្វើរបស់រដ្ឋាភិបាល»។
យោងតាមរបាយការណ៍ប្រចាំឆ្នាំ របស់អង្គការសិទ្ធិមនុស្សអាដហុក ដែលបានចេញផ្សាយកាលពីខែមីនា បានឲ្យដឹងថា នៅក្នុងឆ្នាំ ២០១១ រាជរដ្ឋាភិបាល បានផ្តល់ដីសម្បទានសេដ្ឋកិច្ច ប្រមាណ ២ ២៧៦ ៣៤៩ ហិកតា ទៅដល់ក្រុមហ៊ុនឯកជនចំនួន២២៥ ក្រុមហ៊ុន ក្នុងនោះផ្ទៃដីចំនួន ២/៣ បានកាត់ចេញពីដីការពារដោយព្រះរាជក្រឹត្យ៕
No comments:
Post a Comment
yes