កណ្ដាល ៖ ផ្សារព្រែកតាមាក់កំពុងក្លាយជាផ្សារអនាធិបតេយ្យមួយគ្មានការគ្រប់គ្រង ច្បាស់លាស់ ហើយបរិស្ថានស្មោគគ្រោកគ្មានសណ្ដាប់ធ្នាប់ បើទោះបីជាផ្សារមួយនេះមានការដេញភាស៊ីត្រឹមត្រូវតាមក៏ដោយ តែអាជ្ញាធរពាក់ព័ន្ធមួយចំនួនកំពុងតែឈរអោបដៃមើលដោយមិនគិតគូរពីផលប៉ះពាល់ចំពោះសណ្ដាប់ធ្នាប់ផ្សារក៏ដូចជាអាជីវករ ជាពិសេសប្រជាពលរដ្ឋដែលរស់នៅជុំវិញផ្សារឡើយ ។ សព្វថ្ងៃនេះផ្សារព្រែកតាមាក់បានក្លាយទៅជាទីផ្សារមួយដែលពោរពេញដោយក្លិនស្អុយ និងខ្វះការទទួលខុសត្រូវពីអាជ្ញាធរជាពិសេសនោះលោក គង់ សោភ័ណ្ឌ ដែលជាមេបាក្នុងការប្រមូលលុយកាក់ពីផ្សារមួយនេះតែម្ដង ។
អាជីវករផ្សារព្រែកតាមាក់ជាច្រើនបានរអ៊ូរទាំចំពោះអាជ្ញាធរស្រុកខ្សាច់កណ្ដាល ជាពិសេសមន្ដ្រីពាក់ព័ន្ធមួយចំនួនដែលមិនបានបើកភ្នែកមើលពីការលំបាករបស់ពួកគេនោះឡើយ។ រាល់ពេលធ្លាក់ភ្លៀងម្ដងៗផ្សារព្រែកតាមាក់ស្ទើរតែក្លាយទៅជាទឹកជំនន់ ហើយកាកសំណល់ដែលផុសចេញពីលូនោះជះក្លិនស្អុយអសោចន៍ ធ្វើឱ្យប៉ះពាល់ដល់សុខភាពរបស់អាជីវករ ក៏ដូចជាអតិថិជនមួយចំនួនដែលបានមកទិញម្ហូបអាហារផងដែរ ។
ប៉ុន្ដែសព្វថ្ងៃនេះពេលមានភ្លៀងធ្លាក់ម្ដងៗ ប្រជាពលរដ្ឋទូទៅលែងចង់ធ្វើដំណើរមកកាន់ផ្សារព្រែកតាមាក់ទៀតហើយ ព្រោះពួកគេទាំងនោះយល់ថា ពិបាកធ្វើដំណើរចេញចូល ក៏ដូចជាមានក្លិនឆ្អេះឆ្អាបស្អុយបែកផ្សែង គ្មានសណ្ដាប់ធ្នាប់និងអនាម័យឡើយ។ ចំណែកឯអតិថិជនមួយចំនួនដែលបានធ្វើដំណើរមកកាន់ផ្សារព្រែកតាមាក់នេះ តែងតែរិះគន់ដោយមិនសំចៃមាត់ថា មកពីពួកអាជា្ញធរមិនយកចិត្ដទុកដាក់កែលម្អ ទើបផ្សារមួយនេះក្លាយទៅភក់ជ្រាំនិងមានក្លិនស្អុយយ៉ាងនេះ។
អ្នករិះគន់ទាំងនោះមិនបានសំដៅលើអ្នកទារភាស៊ីផ្សារនោះទេគឺ សំដៅទៅលើអ្នកដែលយកលុយពីការដេញថ្លៃផ្សារនេះ ក្នុងមួយឆ្នាំៗរាប់លានរៀល។ តើអស់លោកទាំងនោះយកលុយទៅណាបានជាមិនធ្វើការជួសជុលកែលំអរផ្សារនេះឱ្យមានសោភណ្ឌភាព និងមានបរិស្ថានល្អសម្រាប់ប្រជាពលរដ្ឋជិតឆ្ងាយដែលពួកគេមកទិញទំនិញនៅក្នុងផ្សារនេះ ឬប្រហែលលុយទាំងនោះអស់លោកថ្នាក់ដឹកនាំស្រុកយកទៅចែកគ្នាចិញ្ចឹមស្រីក្មេងអស់ហើយបានជាទុកឱ្យអាជីវករក៏ដូចជាប្រជាពលរដ្ឋដែល មានលំនៅដ្ឋាននៅជុំវិញផ្សារដេកហិតក្លិនស្អុយឆ្អេះឆ្អាបភាយចេញពីលូយ៉ាងគម្រក់បែបនេះ។
អាជីវករផ្សារព្រែកតាមាក់បាននិយាយថា ផ្សារព្រែកតាមាក់ជាផ្សាររបស់រដ្ឋប្រាដកមែន តែស្ថិតក្រោមការគ្រប់គ្រងរបស់អាជ្ញាធរមានអំណាចតែម្នាក់ប៉ុណ្ណោះ។ ការចាត់តាំងលក់តូបម្ដងៗតែងតែបង្កការលំបាកដល់អាជីវករស្ទើរគ្រប់ពេលវេលា ព្រោះថា តូបដែលនៅចំពីមុ ឬចំច្រកសេដ្ឋកិច្ច គឹលោក សឹង្ហ គីលីម ដែលជាអភិបាលរងស្រុកខ្សាច់កណ្ដាលបានកាក់ទុកលក់ខ្លួនឯងយកតម្លៃរាប់ពាន់ដុល្លារឯណោះ ដោយមិនធ្វើការចាប់ឆ្នោតឱ្យមានភាពស្មើរគ្នាឡើយ ។ ក្រោយពេលលក់តូបបានលុយ និងដេញថ្លៃភាស៊ីផ្សារនេះរួចមក អស់លោកទាំងនោះយកលុយ ទៅចែកគ្នាដាក់ហោប៉ៅរៀងៗខ្លួនធ្វើព្រងើយ។
ប្រជាពលរដ្ឋមិនសប្បាយចិត្តទាល់តែសោះនៅពេលដែល អាជ្ញាធរលែងចាប់អារម្មណ៍ក្នុងការកែលម្អរផ្សារមួយនេះ បើទោះបីជាលូស្ទះសំរាមគរស្អុយ ភ្លៀងធ្លាក់លិចផ្សារក៏ដោយក៏គ្មាននរណាឈឺក្បាលវិលមុខអ្វីដែរ ព្រោះគិតថា ពួកគេយកលុយរួចហើយទៅរវីរវល់ធ្វើស្អីទៀតហើយផ្សារមួយនេះក្លាយទៅជាស្អីក៏ពួកគេមិនចាប់អារម្មរណ៍។ ចំពោះប្រពលរដ្ឋ អាជីវករឬអតិថិជនដែលបរិហារិះគន់រាល់ថ្ងៃ ក៏មន្ត្រីទាំងនោះលែងឈឺដែរ ដោយសារតែអស់លោកថ្នាក់ដឹកនាំស្រុកខ្សាច់កណ្ដាលមួយចំនួនដឹកនាំស្រុកនេះ ស្បែកមុខឡើងក្រាស់ទៅហើយ។
ដោយឡែកលោកមេឃុំព្រែកតាមាក់ដែលទើបតែឡើងថ្មីបានប្រាប់វរជនខ្មែរតាមទូរស័ព្ទថា លោកបានដឹងច្បាស់ណាស់ថា ផ្សារព្រែកតាមាក់មានក្លិនស្អុយមិនអាចទ្រាំបាន មានប្រជាពលរដ្ឋច្រើនណាស់បានសំណូពរឱ្យគាត់ធ្វើការកែលំអរនិងជួយដោះស្រាយប្រព័ន្ធលូដើម្បីដោះទឹកចេញ។ តែពេលនេះគាត់ទើបតែឡើងថ្មី គាត់មិនទាន់ដឹងថា ផ្សារព្រែកតាមាក់នេះជាប់ពន្ធអាកររបស់ឃុំដែរឬអត់ ។ លោក ជា ស្រ៊ុន បានបញ្ជាក់ទៀតថា លោកនឹងធ្វើគម្រោងទៅកាន់ស្រុកដើម្បីធ្វើការពិភាក្សាគ្នាអំពីការកែលំអរក៏ដូចជាធ្វើអនាម័យជុំវិញផ្សារព្រែកតាមាក់នេះ។ព្រោះថា សូម្បីតែលុយមួយរយមួយរៀលក៏ត្រូវធ្វើគម្រោងដែរ ។
លោក ជា ស្រ៊ុន បានបញ្ជាក់ថា ឃុំប្រាកដជាធ្វើតែមិនដឹងពេលណា ឱ្យពិតប្រាកដនោះទេប៉ុន្ដែប្រជាពលរដ្ឋទូទៅឆ្ងល់ថា លុយដែលដេញថ្លៃភាស៊ីពីផ្សារនេះរាប់សិបលានរៀលក្នុងមួយឆ្នាំៗតើអាជ្ញាធរ យកទៅណា ហើយលុយលក់តូបបានរាប់ម៉ឺនដុល្លារយកទៅទុកឯណាបាត់ហើយ ឬក៏ពួកគេយកលុយនេះទៅចែកគ្នាចាយអស់ហើយ បានជាមិនអើពើចំពោះការស្ដាប្រព័ន្ធលូ និងកែលំអរបរិស្ថានអនាម័យ ឱ្យមានសោភណ្ឌភាព ដើម្បីទាក់ទាញអតិថិជនខាងក្រៅឱ្យមកទិញទំនិញក្នុងផ្សារនេះ ។ លុយដែលបានមកពីផ្សារព្រែកតាមាក់ក្នុងមួយឆ្នាំៗមិនតិចជាង៣០-៤០លានរៀលនោះទេ ដែលបានពីការដេញភាស៊ីផ្សារ ដេញភាស៊ីកង់ម៉ូតូ និងលុយប្រមូលបានពីការលក់តូបនីមួយៗ។
តើលុយទាំងនេះត្រូវបង់ចូលរដ្ឋទាំងស្រុងឬបង់ចូលហោប៉ៅរបស់លោក គង់ សោភ័ណ្ឌ និងមន្ដ្រី របស់ខ្លួន បានជាមិនចេះឆ្ងល់រឿងផ្សារព្រែកតាមាក់ពេលនេះយ៉ាងម៉េចហើយ។ កត្ដាដែលមិនអើពើរបស់អាជ្ញាធរស្រុកបែបនេះគេអាចទុកថា ជាអំពើពុករលួយបំផ្លាញជាតិផងដែរ។ ព្រោះថាផ្សារព្រែកតាមាក់នេះកើតមានរាប់សិបឆ្នាំមកហើយ មិនដែលឃើញរីកចម្រើនត្រង់ណាឡើយបានត្រឹមតែលឹបលជាប់គាំងរហូត ៕
No comments:
Post a Comment
yes