ដំរីឈ្មោលដែលធ្លាប់អុកឡុកអ្នកភូមិ ត្រូវបានក្រុមអ្នកជំនាញចាប់ពីស្រុកបទុមសាគរ
នាំមកកាន់សួនសត្វភ្នំតាម៉ៅ
តាកែវៈ សត្វដំរីព្រៃឈ្មោលមួយក្បាល ដែលក្រុមអ្នកភូមិនិង អាជ្ញាធរស្រុកបទុមសាគរ ខេត្តកោះកុងអះអាងថា បានអុកឡុក បំផ្លិចបំផ្លាញផលដំណាំ និង ជាន់អ្នកភូមិម្នាក់ស្លាប់កាលពីបួនខែមុន ដែលក្រុមជំនាញការសត្វព្រៃ មកពីអង្គការសម្ព័ន្ធភាពសត្វព្រៃនិងរដ្ឋបាលព្រៃឈើ បង្ក្រាបចាប់បានកាលថ្ងៃសៅរ៍នោះត្រូវបានគេបញ្ជូនយកមកដល់សួន សត្វភ្នំតាម៉ៅ ដោយសុវត្ថិភាពហើយ កាលពីយប់រំលងអ្រធាត្រ ឆ្លងចូលថ្ងៃអង្គារម្សិលមិញនេះ។
លោក រត្ន័ ប៊ុនធឿន មន្ត្រីអភិរក្សសត្វព្រៃនៃរដ្ឋបាលព្រៃឈើ បានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្រុមការងាររបស់លោក បានដឹកនាំសត្វដំរីព្រៃឈ្មោលមួយក្បាល ដែលធ្វើឲ្យអ្នកភូមិភ័យខ្លាចនិងខឹងសម្បា នាពេលកន្លងមកនោះ មកដល់ឧទ្យានសួនសត្វភ្នំតាម៉ៅ ស្ថិតក្នុងខេត្តតាកែវ ដោយសុវត្តិភាពហើយ កាលពីយប់រំលងអ្រធាត្រ ឆ្លងចូលថ្ងៃអង្គារម្សិលមិញនេះ។
លោកបានថ្លែងថា៖ «បច្ចុប្បន្ន វាកំពុងស្ថិតនៅក្នុងទ្រុងសុវត្ថិភាពមួយ នៅក្នុងឧទ្យានសួនសត្វភ្នំតាម៉ៅនេះ»។
លោកបានបញ្ជាក់ទៀតថា ដំរីព្រៃមួយក្បាលនេះ មានដុះភ្លុកពីរ មានទម្ងន់ប្រមាណ ២,៥តោន និងមានអាយុប្រហែលជា១៥ឆ្នាំ ទៅ១៦ឆ្នាំប៉ុណ្ណោះ ។ ដំរីឈ្មោលនេះត្រូវបានគេរំពឹងថា នឹងផ្ដល់នូវការតបស្នងមួយដ៏ប្រសើរបំផុតសម្រាប់ក្រុមអភិរក្ស សត្វព្រៃ នាពេលអនាគត ពោលគឺ វានឹងជួយទាក់ទាញនូវភ្ញៀវទេសចរមកទស្សនានៅសួនសត្វភ្នំតាម៉ៅ នឹងអាចធ្វើការបង្កាត់ពូជជាមួយដំរីញីបីក្បាល ដែលទើបពេញក្រមុំនៅក្នុងឧទ្យានមួយនេះ។
ទោះជាបែបណាក្ដី ក្រុមអ្នកភូមិនិងអាជ្ញាធរស្រុកបទុមសាគរ ខេត្តកោះកុង បាននិយាយថា កន្លងមក សត្វដំរីព្រៃមួយក្បាលនេះធ្លាប់បានបំផ្លិចបំផ្លាញផលដំណាំ សម្លាប់សត្វពាហនៈ និងរំខានដល់ការធ្វើចរាចរណ៍ឆ្លងកាត់ផ្លូវជាតិលេខ៤៨ និងធ្លាប់ជាន់អ្នកភូមិវ័យ៥០ឆ្នាំម្នាក់ស្លាប់ថែមទៀតផង។
លោក ឃៀង យីង ជំទប់ទី១ឃុំអណ្ដូងទឹក ស្រុកបទុមសាគរ បានប្រាប់ភ្នំពេញ ប៉ុស្តិ៍ កាលពីម្សិលមិញថា កាលពីបួនខែមុន ប្អូនប្រុសជីទួតមួយរបស់គាត់ម្នាក់ឈ្មោះ អ៊ូ ហឿន អាយុ៥០ឆ្នាំ ត្រូវសត្វដំរីព្រៃមួយក្បាលនេះជាន់ និងបានបុកនឹងភ្លុករបស់វាបណ្ដាលឲ្យស្លាប់ភ្លាមៗនៅកណ្ដាលព្រៃ ខណៈពួកគាត់ប្រមាណ៦នាក់ ទៅរកចាក់ជ័ររ៉ុង (ជ័រចុង)នៅក្នុងតំបន់ព្រៃឧទ្យានជាតិបទុមសាគរនោះ។
លោកបានថ្លែងថា៖ «ចាប់ពីពេលនោះមក អ្នកភូមិរបស់យើងខ្ញុំមានការភ័យខ្លាចណាស់ ព្រោះវាតែងតែចេញមកអុកឡុកបំផ្លិចបំផ្លាញផលដំណាំ និងសម្លាប់គោអ្នកភូមិយើង»។
ភរិយារបស់ជនរងគ្រោះ ដែលត្រូវសត្វដំរីព្រៃមួយក្បាលនេះជាន់និងបុកនឹងភ្លុកស្លាប់ អ្នកស្រីហិន យ៉េង បានប្រាប់ភ្នំពេញ ប៉ុស្តិ៍តាមទូរស័ព្ទកាលពីម្សិលមិញថា គាត់អរណាស់នៅពេលដែលឃើញគេចាប់ដំរី ដែលគាត់អះអាងថា បានសម្លាប់ប្ដីគាត់កាលពីបួនខែមុនដោយជោគជ័យ។
អ្នកស្រីថា៖ «គឺពិតជាអាមួយក្បាលហ្នឹងហើយ ដែលវាបានសម្លាប់ប្ដីខ្ញុំ»។
ចំណែក លោក ហេង សាវឿន អធិការស្រុកបទុមសាគរ ក៏បានរៀបរាប់ប្រាប់ភ្នំពេញ ប៉ុស្តិ៍នូវរឿងរ៉ាវស្រដៀងគ្នាអំពីប្រវត្តិអុកឡុករបស់សត្វដំរីព្រៃមួយក្បាលនេះដែរថា កាលពីប៉ុន្មានឆ្នាំមុន គាត់នឹងអ្នកភូមិជាច្រើននាក់ទៀត ធ្លាប់ឃើញវាដើរជាហ្វូងចំនួន៦ក្បាល ប៉ុន្តែវាមិនដែលបានបង្កការភ័យខ្លាចអីនោះទេ។
លោកប្រាប់ឲ្យដឹងទៀតថា នៅក្នុងឆ្នាំនេះហ្វូងដំរីព្រៃទាំងនោះមិនបានបង្ហាញខ្លួននៅតាម ព្រៃរបោះក្បែរភូមិទៀតទេលើកលែងតែអាឈ្មោលមួយក្បាលនេះប៉ុណ្ណោះ ហើយគ្មាននរណាម្នាក់បានដឹងថា តើហ្វូងរបស់វាពីមុននោះទៅទីណានោះទេ?
លោកថ្លែងថា៖«នៅប៉ុន្មានខែចុងក្រោយនេះគេឃើញតែអាឈ្មោលមួយក្បាលនេះប៉ុណ្ណោះ ហើយវត្តមានរបស់វាម្ដងៗ ដូចជាមានគំនុំអ្វីមួយជាមួយនឹងអ្នកភូមិ និងអ្នកដំណើរដែលឆ្លងកាត់ផ្លូវជាតិលេខ ៤៨ »។
លោកបញ្ជាក់ថា៖ «កន្លងមក វាបានកម្ទេចរថយន្តអ្នកដំណើរសរុបជិត១០គ្រឿង គោបីក្បាល និងផលដំណាំអ្នកស្រុកជាច្រើនគ្រួសារ ហើយកាលពីបួនប្រាំខែមុនមានគេរាយការណ៍ថាអ្នកភូមិម្នាក់ដែល រុកព្រៃរកជ័រ ត្រូវវាជាន់និងបុកនឹងភ្លុកស្លាប់»។
លោកប្រាប់ឲ្យដឹងថា នៅថ្ងៃដែលក្រុមជំនាញសត្វព្រៃមកចាប់វានោះ គឺវាចេញមកអុកឡុកនៅតាមបណ្ដោយផ្លូវជាតិលេខ៤៨ ម្ដងទៀតនិងបង្កការស្ទះចរាចរណ៍អស់ពេលជាច្រើនម៉ោង ហើយក្រោយពីក្រុមជំនាញការសត្វព្រៃទាំងនោះប្រើថ្នាំសណ្ដំបាញ់ទៅ លើវា ភ្លាមនោះវាបានដើរចូលទៅក្នុងព្រៃប្រមាណជា២០០ម៉ែត្រ ពីផ្លូវជាតិទើបបានដួលសន្លប់។ លោកបន្តថា ដោយសារមានភ្លៀងធ្លាក់ជាប់ៗគ្នារយៈបីបួនថ្ងៃនេះទើបក្រុមជំនាញសត្វព្រៃ ពន្យារពេលក្នុងការដឹកនាំសត្វដំរីនោះទៅកាន់សួនសត្វភ្នំតាម៉ៅ ព្រោះផ្លូវព្រៃពិបាកចូលរថយន្ត។
លោក អន ភារៈ អភិបាលស្រុកបទុមសាគរបាននិយាយថា ជាការល្អប្រសើរណាស់ ដែលក្រុមជំនាញសត្វព្រៃចាប់ដំរីព្រៃមួយក្បាលនេះយកទៅដាក់នៅសួន សត្វភ្នំតាម៉ៅ។ លោកថ្លែងថា៖ «ពេលនេះអ្នកភូមិនិងបាត់ភ័យខ្លាច ហើយទំនងជាគ្មានដំរីព្រៃផ្សេងទៀតមកបង្កភាពចលាចលនៅក្នុង តំបន់នេះទៀតទេ»៕
No comments:
Post a Comment
yes