លោកកែវ គង់ អធិការនគរបាលក្រុងបាវិត ជាក្រុងដែលមានការបាញ់កម្មករកាលពីខែកុម្ភៈ
ស្វាយរៀងៈ មន្ត្រីនគរបាលក្រុងបាវិតម្នាក់ ត្រូវបានដាក់ឲ្យស្ថិតនៅក្រោមការស៊ើបអង្កេតរបស់តុលាការ ក្នុងសំណុំរឿងបាញ់កម្មករ ៣ នាក់ ឲ្យរងរបួស នៅក្នុងការតវ៉ាមួយ កាលពីខែកុម្ភៈ ដែលជនសង្ស័យ ជាអតីតអភិបាលក្រុងបាវិត ឈូក បណ្ឌិតមិនដែលត្រូវបាននគរបាលចាប់ឃុំខ្លួនទាល់តែសោះ រហូតមកដល់ពេលនេះ។
លោកប្រាជ្ញ រឹម ស្នងការនគរបាលខេត្តស្វាយរៀងថ្លែងថា លោក ស ចន្ថា នាយផ្នែកព្រហ្មទណ្ឌអធិការដ្ឋាននគរបាលក្រុងបាវិត ត្រូវបានលោកចៅក្រម ប៉ិច ឈឿត ដែលជាប្រធានតុលាការខេត្តស្វាយរៀង ដាក់ឲ្យស្ថិតក្នុងការឃុំគ្រងនៃស្ថាប័នតុលាការ ដោយសារមានជាប់សង្ស័យ ក្នុងករណីបាញ់កម្មការិនី ៣ រូបនៅរោងចក្រកៅវ៉េនាក្រុងបាវិត កាលពីខែកុម្ភៈ។ លោកថា៖«យើងទើបតែទទួលលិខិត កាលពីអាទិត្យមុន ឲ្យគាត់ស្ថិតនៅក្រោមការត្រួតពិនិត្យពីតុលាការ។ តែគាត់មិនស្ថិតនៅក្នុងការបាញ់ប្រហារនេះទេ គឺស្ថិតនៅឆ្ងាយណាស់ ប្រហែលពី ៥០០ ទៅ ៦០០ ម៉ែត្រឯណោះ។ គេឲ្យនៅក្រៅឃុំ ប៉ុន្តែពេលទៅណាមកណា ត្រូវប្រាប់គេ»។
លោកប្រាជ្ញ រឹម បញ្ជាក់ថា៖ « ប៉ូលិសខ្ញុំ មិនភិតភ័យទេ ព្រោះជារឿងចាស់ ហើយគាត់អត់បានប្រព្រឹត្តផង បើករណីថ្មី ទើបយើងប្លែក»។ លោកឲ្យដឹងថា ករណីនេះ លោក ស ចន្ថា បានចូលបំភ្លឺជាមួយព្រះរាជអាជ្ញា និងចៅក្រមកាលពីខែកក្កដា។
លោក ស ចន្ថា មិនអាចសុំការបំភ្លឺបានទេ កាលពីម្សិលមិញ។
លោក កែវ គង់ អធិការនគរ-បាលក្រុងបាវិត ថ្លែងថា លោកមិនបានដឹង អំពីការចោទប្រកាន់ ពីស្ថាប័នតុលាការមកលើលោក ស ចន្ថា ឡើយ តែលោកបញ្ជាក់ថា «លោក ស ចន្ថា នៅតែមកធ្វើការដូចធម្មតា»។
លោក ឈូក បណ្ឌិត អតីតអភិ-បាលក្រុងបាវិត គឺជាជនសង្ស័យម្នាក់ ដែលត្រូវបានគេរាយការណ៍ថា បានដកកាំភ្លើងបាញ់កម្មករ ឲ្យរងរបួសធ្ងន់ ៣ នាក់ នៅក្នុងការតវ៉ាមួយកាលពីខែកុម្ភៈ ប៉ុន្តែយ៉ាងណាក៏ដោយ ជនសង្ស័យរូបនេះ មិនដែលត្រូវបានចាប់ឃុំខ្លួននោះទេ។ បើទោះបីជាគ្រាប់កាំភ្លើង បានទៅទម្លុះដើមទ្រូងកម្មករ ពីខាងមុខធ្លាយដល់ខាងក្រោយក្តី ក៏លោកឈូក បណ្ឌិត ក្រោយមក ត្រូវបានតុលាការខេត្តស្វាយរៀង ធ្វើការចោទប្រកាន់ ត្រឹមតែពីបទបង្ករបួសស្នាមដោយអចេតនាតែប៉ុណ្ណោះ ដែលបទចោទនេះ បានធ្វើឲ្យមជ្ឈដ្ឋាននានាជាច្រើន បានធ្វើការរិះគន់យ៉ាងខ្លាំងពីប្រព័ន្ធច្បាប់នៅកម្ពុជា។
លោក ជិន លីដា មេធាវីអង្គការសិទ្ធិមនុស្សលីកាដូ ដែលការពារក្តីឲ្យកម្មការិនីរងគ្រោះទាំងបីនាក់ បានថ្លែងថា ទាំងព្រះរាជអាជ្ញា និងចៅក្រមស៊ើបសួរ បានបញ្ចប់ការសាកសួរ ចំពោះកូនក្តីរបស់លោករួចហើយ ប៉ុន្តែមិនទាន់បានកំណត់ថ្ងៃបើកសវនាការនៅឡើយទេ។ លោកនិយាយថា៖ «តាមច្បាប់ បើការស៊ើបអង្កេតយូរពេក ក្នុងរយៈពេល១ឆ្នាំ ភាគីក្នុងសំណុំរឿង អាចស្នើតុលាការសុំបិទការស៊ើបអង្កេត និងកំណត់ពេលសវនាការ»៕
No comments:
Post a Comment
yes