ភ្នំពេញ ៖ លោកកែប ជុតិមា អភិបាលរាជធានីភ្នំពេញកាលពីព្រឹកថ្ងៃទី២៨ ខែសីហា ឆ្នាំ២០១២ បានធ្វើដំណើរមកពិនិត្យមើលទីតាំងស្ពានអាកាសស្ទឹងមានជ័យ ដោយលោកកែប ជុតិមា បានណែនាំដល់មន្ត្រីជំនាញឲ្យមើលថ្ងៃខែជ្រើសរើសយកថ្ងៃល្អដើម្បីបើកការដ្ឋានសាងសង់ស្ពានអាកាសស្ទឹងមានជ័យដែលសាលារាជធានីភ្នំពេញគ្រោងនឹងធ្វើឡើងនាអំឡុងពាក់កណ្ដាលខែកញ្ញា ឆ្នាំ២០១២ខាងមុខនេះក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោហ៊ុន សែន។
ក្នុងឱកាសអញ្ជើញទៅពិនិត្យស្ថានភាពនិងភូមិសាស្ត្រដែលត្រូវសាងសង់ស្ពានអាកាសនេះដែរ លោកកែប ជុតិមាបានជំរុញឲ្យអាជ្ញាធរដែនដីមន្រ្តីពាក់ព័ន្ធខិតខំដោះស្រាយផលប៉ះពាល់ដែលនៅសេសសល់ឲ្យបានឆាប់រហ័ស។ ជាមួយគ្នានេះស្លាកផ្សាយពាណិជ្ជកម្ម ឬប៉ាណូផ្សេងៗត្រូវរុះរើចេញឲ្យបានទាន់ពេលវេលា។ លោកអភិបាលបានបញ្ជាក់ថា នៅពេលបើកការដ្ឋានសាងសង់ស្ពានអាកាសស្ទឹងមានជ័យយើងនឹងបើកការដ្ឋានស្ថាបនាផ្លូវបេតុង២ខ្សែអមប្រឡាយមេបឹងសាឡាងប៉ែកខាងត្បូងស្ពានស្ទឹងមានជ័យដល់ស្ពានថ្មមុខមន្ទីរពេទ្យមិត្តភាពកម្ពុជា-សូវៀតដើម្បីសំរួលចរាចរលើកំណាត់ផ្លូវលេខ២៧១នៅពេលស្ពានអាកាសចាប់ផ្តើមសាងសង់។
ស្ពានអាកាសស្ទឹងមានជ័យគឺជាស្ពានអាកាសទី៣បន្ទាប់ពីស្ពានអាកាសក្បាលថ្នល់និងស្ពានអាកាស៧មករា(ពេទ្យលោកសង្ឃ)ក្នុងរាជធានីភ្នំពេញ ដើម្បីរំដោះចរាចរដែលតែងកកស្ទះជាញឹកញាប់តាមច្រកផ្លូវសំខាន់ៗក្នុងទីក្រុងស្របពេលដែលចំនួនប្រជាពលរដ្ឋនិងមធ្យោបាយធ្វើដំណើរកើនឡើងឥតឈប់ឈរ៕
No comments:
Post a Comment
yes