ភ្នំពេញៈ ក្រុមអ្នកភូមិរស់នៅលើផ្ទះដែលស្ថិត ក្នុងតំបន់បឹងទំពុន នៅរាជធានីភ្នំពេញ កំពុងតែព្រួយបារម្ភនឹងការបណ្តេញចេញដែលអាចនឹងចាប់ ផ្តើមក្នុងពេលឆាប់ៗ ខណៈដែលសកម្មភាពបូមខ្សាច់បំពេញបឹងភាគខាងត្បូងរាជធានីមានសភាពកាន់តែខ្លាំងក្លាឡើងនោះ។
លោក គង់ សុភ័ក្រ្ត អាយុ ៣១ ឆ្នាំជាអ្នកភូមិត្នោតជ្រំ២ ខណ្ឌមានជ័យ បាននិយាយថា ៖ «ខ្ញុំមិនដឹងទេ ថាតើហេតុអីបានពួកគេបូមខ្សាច់លុបបឹង។ ប៉ុន្តែ ខ្ញុំគ្រាន់តែឮថា ពួកគេគ្រោងសាងសង់ផ្សារទំនើប និងសង់ផ្លូវ»។
នាប៉ុន្មានខែថ្មីៗនេះ គ្រឿងចក្រធុនធ្ងន់បានដំណើរការនៅតំបន់បឹងភាគខាងត្បូងរាជធានី នេះ។ ការបូមខ្សាច់បានបង្កើនសកម្មភាពកាន់តែខ្លាំងឡើងៗ ហើយកម្មករ ក្នុងនោះ មានម្នាក់ដែលប្រាប់កាលពីម្សិលមិញថា គាត់មកពីវៀតណាម បានធ្វើការជាប្រចាំនៅទីនោះ។
លោក កៀង សុខ អ្នកភូមិសង្កាត់ចាក់អង្រែលើ ភូមិព្រែកតាគង់ ដែលនៅក្បែរនោះបាននិយាយថា ៖ «ខ្ញុំព្រួយបារម្ភអំពីការបណ្តេញចេញ»។ «យើងគ្មានប័ណ្ណកម្មសិទិ្ធទេ តែយើងមានលិខិតបញ្ជាក់តូចមួយ ដែលចេញពីអាជ្ញាធរក្រុងថា យើងបានរស់នៅទីនេះ តាំងពីឆ្នាំ ១៩៨៤ មក»។
ក្រោមសំណើគម្រោងអភិវឌ្ឍន៍ឆ្នាំ ២០១១ ហៅថា AZ Town ផ្លូវនានា ក្នុងនោះ មានមហាវិថីហ៊ុន សែន ប្រវែងទទឹង ៦០ ម៉ែត្រ នឹងរត់កាត់បឹង។
AZ Town និងមហាវិថីហ៊ុនសែន ត្រូវអភិវឌ្ឍដោយក្រុមហ៊ុន ៤ គឺក្រុមហ៊ុន AZ Group ក្រុមហ៊ុន ING Holdings ក្រុមហ៊ុន Daun Penh Construction Group និងក្រុមហ៊ុន SMEC International ។ នេះបើយោងតាមឯកសារដែល ភ្នំពេញ ប៉ុស្តិ៍ ទទួលបាន។ ក្រុមហ៊ុនទាំងនេះមិនអាចធ្វើការទាក់ទងសុំការអត្ថាធិប្បាយ បានទេ កាលពីម្សិលមិញ។
លោក សុខ លីដា អ្នកគ្រប់គ្រងគម្រោងស្រាវជ្រាវដីធ្លី និងសិទិ្ធលំនៅដ្ឋាននៅសមាគមធាងត្នោត បានថ្លែងថា អង្គការរបស់លោកបានរកឃើញសហគមន៍ក្រីក្រចំនួន ២៨ ដែលអាចរងការប៉ះពាល់ពីការអភិវឌ្ឍនៅតំបន់បឹងមួយនេះ។
លោក បានបញ្ជាក់ថា ៖ «ផ្អែកតាមទិន្នន័យបោះពុម្ពផ្សាយក្នុងឆ្នាំ ២០០៩ ក្នុងការស្ទង់មតិ ៨ ខណ្ឌ បានឲ្យដឹងថា ប្រជាជនប្រហែល ២ពាន់ គ្រួសាររស់នៅសហគមន៍ទាំង២៨ នេះ។ បើគិតពីបទពិសោធរបស់អ្នករស់នៅបឹងកក់ សមាគមធាងត្នោតព្រួយបារម្ភ អំពីផលប៉ះពាល់នៃការអភិវឌ្ឍមកលើប្រជាជនដែលកំពុងរស់នៅជុំវិញបឹងទំពុន»។
លោកស្រី ឡង់ គឹមហៀង ជាមន្រ្តីទំនាក់ទំនងនៅអង្គការ Housing Rights Task Force (HRTF)បានថ្លែងកាលពីម្សិលមិញថា អ្នកភូមិជាច្រើននៅលើ ឬជុំវិញបឹងទំពុនមិនបានដឹងទេថា តើការអភិវឌ្ឍអ្វីខ្លះត្រូវបានគ្រោងឡើង។
លោកស្រីបានបន្ត ថា៖ «រហូតមកដល់ពេលនេះ ពួកគេមិនដឹងទេ ថាតើអ្វីកំពុងកើតឡើង។ អ្នកខ្លះមិនខ្វល់ និងមិនគិតទេ ថាពួកគេនឹងត្រូវបណ្តេញចេញ។ អ្នកខ្លះទៀតព្រួយបារម្ភ»។
អង្គការ HRTF បានផ្តល់យោបល់ផ្លូវច្បាប់ដល់ប្រជាជនអំពីការបណ្តេញចេញដោយបង្ខំដែលអាចកើតមាន។
HRTH ថា៖ «អ្វីដែលប្រជាជនចង់បាន ប្រសិនបើពួកគេត្រូវផ្លាស់ទីលំនៅនោះ គឺសំណងសមស្រប។ ពួកគេមិនដឹងទេ ថាតើអ្វីដែលពួកគេនឹងត្រូវទទួលបាននោះទេ»។
លោក ឡុង ឌីម៉ង់ អ្នកនាំពាក្យសាលារាជធានីបានថ្លែងកាលពីម្សិលមិញថា លោកត្រូវការពេលវេលាបន្ថែម ដើម្បីពិនិត្យបញ្ហានេះ មុនពេលលោកអាចធ្វើការអត្ថាធិប្បាយបន្ថែម។
លោក មឿង សុផាន អនុប្រធានមន្ទីរសាធារណការ និងដឹកជញ្ជូនរាជធានី មិនអាចទាក់ទងសុំការអត្ថាធិប្បាយបានទេ កាលពីម្សិលមិញ។
ក្នុងពេលដំណាលគ្នានេះដែរ អ្នកភូមិបឹងកក់បានប្រារព្ធពិធីបុណ្យរំឭកខួបមួយឆ្នាំ ចាប់តាំងពីអាជ្ញាធរបានបណ្តេញពួកគេចេញនិងបំផ្លាញផ្ទះសម្បែងរបស់ពួកគេ នៅក្នុងតំបន់បឹងកក់។ នៅក្នុងពិធីនេះ ពួកគេបានកាន់ដង្ហែនិងដុតរូបទីងមោងដែលពួកគេថាតំណាងឲ្យ«មន្រ្តីពុករលួយ» ។
អ្នកស្រី ហេង មុំ ជនត្រូវបានបណ្តេញចេញនៅបឹងកក់បាននិយាយថា៖«ទីងមោងគឺតំណាង មន្រ្តីពុករលួយ ដែលប្លន់ដីធ្លីរបស់យើង»៕
No comments:
Post a Comment
yes