កំពង់ធំៈ បណ្តាញសហគមន៍ព្រៃឡង់ជាង៣០០នាក់មកពីខេត្តចំនួនបួន នៅជុំវិញព្រៃឡង់បាន ធ្វើដំណើរដោយម៉ូតូនិងថ្មើរជើងរយៈពេល៦ថ្ងៃ ដើម្បីដើរល្បាតទប់ស្កាត់បទល្មើសព្រៃឈើនឹងប្រមូលភស្តុតាងបទល្មើសព្រៃឈើដាក់ជូនរដ្ឋាភិបាលជាលើកទី៦។
ពលរដ្ឋប្រមាណ៣៥០នាក់មកពីខេត្ត៤ មានខេត្តព្រះវិហារ កំពង់ធំ ស្ទឹងត្រែង និងក្រចេះបានចាប់ដើរល្បាតនិងជិះម៉ូតូប្រឆាំងនឹងបទល្មើសព្រៃឈើចាប់ពីថ្ងៃទី ១៣ ដល់ទី១៨ ខែកញ្ញា ឆ្នាំ២០១២។ ពលរដ្ឋទាំងនោះនឹងចុះទៅតាមចំណុចសំខាន់ៗដែលកំពុងរងការកាប់ បំផ្លាញនិងឈូសឆាយយកដី មាននៅតំបន់ទូកមាសនិងតំបន់ប្រាំ នៅជាប់ព្រំប្រទល់ខេត្តព្រះវិហារ និងស្ទឹងត្រែង តំបន់អូរក្រាក់ក្នុងខេត្តក្រចេះ និងក្បាលទឹកថ្លាក្នុងខេត្តកំពង់ធំ។
លោក ឈឹម សាវុធ អ្នកសម្របសម្រួលវេទិកាសាធារណៈនៃមជ្ឈមណ្ឌលសិទិ្ធមនុស្សកម្ពុជាបានឲ្យដឹងថា គោលបំណងសំខាន់នៃយុទ្ធនាការនេះគឺទប់ស្កាត់ និងបញ្ឈប់រាល់បទល្មើសកាប់បំផ្លាញព្រៃឈើនិងប្រមូលភស្តុតាង ដាក់ជូនរដ្ឋាភិបាលនៅចុងខែនេះ។
លោកបន្តទៀតថា៖ «បច្ចុប្បន្នសកម្មភាពកាប់ព្រៃឈើនិងការរុករានកាប់ព្រៃយក ដីខុសច្បាប់កំពុងតែកើតមានយ៉ាងអនាធិបតេយ្យនៅក្នុងព្រៃឡង់ ហើយក្រុមហ៊ុនព្រៃសម្បទានសេដ្ឋកិច្ចជាច្រើន កំពុងចូលលុកលុយក្នុងតំបន់ព្រៃនេះផងដែរ ទោះជាបណ្តាញសហគមន៍ព្រៃឡង់ខិតខំធ្វើការតវ៉ានិងទប់ស្កាត់ច្រើនលើកហើយក្តី»។
លោក បន្តឲ្យដឹងថា ពលរដ្ឋនៅក្នុងខេត្តព្រះវិហារ ស្ទឹងត្រែងនិងក្រចេះ ធ្វើដំណើរដោយថ្មើរជើងក្នុងយុទ្ធនាការនេះចាប់តាំងពីថ្ងៃទី១៣ ខែកញ្ញាមក រីឯពលរដ្ឋខេត្តកំពង់ធំ ធ្វើដំណើរដោយម៉ូតូប្រមាណ៤០គ្រឿង ចេញដំណើរចាប់ពីថ្ងៃទី១៥ ខែកញ្ញា ពួកគេគ្រោងជួបជុំគ្នានៅថ្ងៃទី១៨ កញ្ញាដើម្បីប្រមូលយកវត្ថុតាងដាក់ជូនរដ្ឋាភិបាល។
លោកថៃ ប៊ុនលាង អ្នកតំណាងមក ពីខេត្តក្រចេះបានឲ្យដឹងថា ការដើរល្បាតព្រៃប៉ុន្មានថ្ងៃនេះគឺ ដើម្បីទប់ស្កាត់បទល្មើសព្រៃឈើបណ្តាញសហគមន៍បានប្រទះបទល្មើសជា ច្រើនដែលពួកឈ្មួញបានកាប់ទុកនៅកណ្តាលព្រៃដូចជាស្រឡៅ ជាង១០គូប និងបេង ៣គូប។ លោកថា៖«ពួកយើងចេញល្បាតដើម្បីទប់ស្កាត់បទល្មើសនេះច្រើនដងហើយ តែនៅតែមិនអាចទប់ស្កាត់បាន។ យើងបានថតវត្ថុតាងទាំងនោះ ទុកដាក់ជូនទៅរដ្ឋាភិបាលដើម្បីឲ្យជួយទប់ស្កាត់បទល្មើសនោះ»។
អភិបាលរងខេត្តកំពង់ធំ លោក អ៊ុត សំអន បានទទួលដំណឹងអំពីការដើរល្បាតព្រៃរបស់ពលរដ្ឋ ហើយថា អាជ្ញាធរក៏បានដាក់កម្លាំងឃ្លាំមើលនិងការពារសុវត្ថិភាពពួកគាត់ ដែរ ខ្លាចមានអំពើហិង្សាណាមួយកើតឡើង។ លោកបានឲ្យដឹងថា ៖ «យើងបានប្រាប់ពួកគាត់ថាកុំឲ្យធ្វើខុសច្បាប់ដូចជាដើរទៅដុត ឈើគេ ឬក៏ចាប់ផាកពិន័យយកលុយ ជាដើម នោះពុំមែនសមត្ថកិច្ចរបស់គាត់ទេ គឺត្រូវរាយការណ៍មកសមត្ថកិច្ច ដើម្បីឲ្យសមត្ថកិច្ចចុះអន្តរាគមន៍»៕
No comments:
Post a Comment
yes