ភ្នំពេញ: បន្ទាប់ពីបរាជ័យ ក្នុងជំនួបជាមួយនឹងមន្ត្រីជាន់ខ្ពស់ក្រសួងមហាផ្ទៃ កាលពីព្រឹកថ្ងៃទី២០ ខែកញ្ញា ឆ្នាំ២០១២ ដើម្បីពិភាក្សាលើការកែទម្រង់សមាសភាពដឹកនាំ គ.ជ.ប នោះ លោក យឹម សុវណ្ណ អ្នកនាំពាក្យគណបក្សសមរង្ស៊ី បានអះអាងថា លោកនឹងស្វែងរកការពិភាក្សាជាមួយនឹងមន្ត្រីជាន់ថ្នាក់ដឹកនាំគណបក្សប្រជាជនកម្ពុជា ដែលកំពុងកាន់អំណាចសព្វថ្ងៃ។
នៅក្នុងសន្និសីទនោះ លោក យឹម សុវណ្ណ បានអះអាងថា នីតិវិធី នៃការរៀបចំកែសម្រួលសមាសភាពដឹកនាំ គ.ជ.ប មានពេលខ្លីណាស់ ដូច្នេះហើយលោកនឹងស្វែងរកជំនួបពិភាក្សា ជាមួយនឹងថ្នាក់ដឹកនាំគណបក្សប្រជាជនកម្ពុជា ដើម្បីឲ្យមានការទទួលយកសំណើរបស់គណបក្សប្រឆាំងទាំងពីរ គឺគណបក្សសិទ្ធិមនុស្ស និងគណបក្សសមរង្ស៊ី ដើម្បីឲ្យមានយន្ដការពិភាក្សាកែសម្រួល គ.ជ.ប ដោយមានការបង្កើតគណៈកម្មការជ្រើសរើសថ្នាក់ដឹកនាំ គ.ជ.ប ពីសំណាក់គណបក្សនយោបាយ ដែលមានអាសនៈក្នុងរដ្ឋសភា និងមានការចូលរួមពីតំណាងអង្គការមិនមែនរដ្ឋាភិបាលជាតិ និងអន្តរជាតិ។
លោក យឹម សុវណ្ណ បន្តថា ការស្នើឲ្យមានការកែទម្រង់ គ.ជ.ប ដើម្បីជាយន្ដការរៀបចំការបោះឆ្នោតប្រកបដោយភាពសេរី យុត្តិធម៌ និងត្រឹមត្រូវ និងធានាបាននូវស្ថិរភាពនយោបាយ។
ជាការឆ្លើយតប ទៅនឹងការព្យាយាមជួបពិភាក្សាជាមួយនឹងថ្នាក់ដឹកនាំជាន់ខ្ពស់ នៃគណបក្សប្រជាជនកម្ពុជា ពីសំណាក់ក្រុមមេដឹកនាំគណបក្សប្រឆាំងពីរនោះ ត្រូវបានលោក ទិត សុធា អ្នកនាំពាក្យ និងជាអនុប្រធានអង្គភាពព័ត៌មាន និងប្រតិកម្មរហ័សរបស់ទីស្ដីការគណៈរដ្ឋមន្ត្រី ដែលបានចូលរួមកិច្ចប្រជុំរវាងក្រសួងមហាផ្ទៃ ជាមួយតំណាងគណបក្សសមរង្ស៊ី និងគណបក្សសិទ្ធិមនុស្ស នៅព្រឹកថ្ងៃទី២០កញ្ញា ឆ្នាំ២០១២ បានឆ្លើយបញ្ជាក់ថា តាមរយៈជំនួបរវាងមន្ត្រីគណបក្សប្រឆាំង ជាមួយនឹងលោក ព្រំ សុខា រដ្ឋលេខាធិការក្រសួងមហាផ្ទៃ និងជាតំណាងលោកឧបនាយករដ្ឋមន្ត្រី ស ខេង កាលពីព្រឹកថ្ងៃទី២០ ខែកញ្ញា លោក ព្រំ សុខា បានបកស្រាយលំអិតរួចហើយ ទាក់ទងទៅនឹងការប៉ុនប៉ងកែទម្រង់ ឬប្តូរសមាសភាព គ.ជ.ប ពីសំណាក់គណបក្សប្រឆាំង។
លោក ទិត សុធា បានបន្តថា តាមរយៈលិខិតរបស់លោកឧបនាយករដ្ឋមន្ត្រី ស ខេង ផ្ញើជូនគណបក្សប្រឆាំងកាលពីពេលថ្មីៗនេះ ក៏បានបង្ហាញយ៉ាងច្បាស់លាស់អំពីជំហររបស់រាជរដ្ឋាភិបាល ហើយការស្វែងរកជំនួបជាមួយនឹងមន្ត្រីជាន់ខ្ពស់គណបក្សប្រជាជនកម្ពុជា មិនមានហេតុផលនយោបាយណាត្រូវជួបទេ។
លោកបានចាត់ទុកសកម្មភាពទាំងនោះ របស់គណបក្សប្រឆាំង ថា ជាសកម្មភាពបំពុលបរិយាកាសនយោបាយ តែប៉ុណ្ណោះ។
លោក ទិត សុធា បន្តថា គណបក្សប្រឆាំង បានទទួលស្គាល់លទ្ធផលបោះឆ្នោតនៅគ្រប់អាណត្តិមកហើយ សូម្បីតែអង្គការជាតិ និងអន្តរជាតិ ក៏ទទួលស្គាល់ដែរ។ នីតិវិធីដែល គ.ជ.ប រៀបចំការបោះឆ្នោត គឺដំណើរការដោយឯករាជ្យ និងអធ្យាក្រឹត្យ ហើយការទាមកែទម្រង់សមាសភាព គ.ជ.ប នៅពេលនេះ គ្រាន់តែជាការប៉ុនប៉ងធ្វើឲ្យមានការជាប់គាំងនយោបាយ និងមិនអាចដំណើរបោះឆ្នោតបាន នៅឆ្នាំ២០១៣ បន្ទាប់មកគណបក្សប្រឆាំង នឹងទម្លាក់កំហុសទៅលើរដ្ឋាភិបាលជាអ្នកទទួលខុសត្រូវ៕
No comments:
Post a Comment
yes