បន្ទាយមានជ័យ ៖ សកម្មភាពមមាញឹកនៃការដឹកជញ្ជូនកសិផលចេញទៅប្រទេសថៃ និងការដឹកជញ្ជូនទំនិញមកពីច្រកប៉ោយប៉ែតឆ្លងកាត់ខេត្ដបន្ទាយមានជ័យ ភាគច្រើនផ្ទុកលើសទម្ងន់ធ្វើឱ្យខូចខាតផ្លូវស្ពានជាច្រើនកន្លែង ប៉ុន្ដែវាជាប្រភពចំណូលមិនចេះរីងស្ងួតរបស់លោក ព្រុំ វីរៈ ដែលជាប្រធានស្ថានីយ៍ជញ្ជីងថ្លឹងរថយន្ដផ្ទុកលើសទម្ងន់នៅកូនដំរី ស្ថិតនៅក្នុងភូមិកូនដំរីសង្កាត់និមិត្ដក្រុងប៉ោយប៉ែត ខេត្ដបន្ទាយមានជ័យ ដែលទាមទារឱ្យថ្នាក់លើពិនិត្យមើលភាពអសកម្មនិងពុករលួយរបស់មន្ដ្រីពាក់ព័ន្ធឡើងវិញជាបន្ទាន់។
រាប់សិបឆ្នាំកន្លងមកហើយដែលលោក ព្រុំ វីរៈ បានចាត់តាំងមន្ដ្រីក្រោមឱវាទឱ្យប្រមូលប្រាក់ពីរថយន្ដផ្ទុកទំនិញគ្រប់ប្រភេទដែលបើកបរឆ្លងកាត់ស្ថានីយជញ្ជីងថ្លឹងរថយន្ដនៅកូនដំរីតាមរបៀបអនាធិបតេយ្យ មិនខុសពីកុងត្រូលជជុះប៉ុន្មានទេ គឺសកម្មភាពនេះផ្ទុយពីបទបញ្ជារបស់ប្រមុខរាជរដ្ឋាភិបាលនិងខុសពីគោលការណ៍របស់ក្រសួងសាធារណការដល់ទៅ១៨០អង្សាឯណោះ ។ ក្រុមអ្នករកស៊ីដឹកជញ្ជូនទំនិញជាច្រើនបានលើកឡើងថា មិនដឹងជាមានគោលការណ៍មកពីណាទេទើបលោក ព្រុំ វីរៈ ចាត់តាំងឱ្យមន្ដ្រីក្រោមឱវាទដែលប្រចាំការនៅ ចំណុចស្ថានីយ៍ថ្លឹងរថយន្ដកូនដំរីឱ្យធ្វើសកម្មភាពគាបជំរិតទារប្រាក់ពីក្រុមអ្នករកស៊ីដឹកជញ្ជូនទំនិញគ្រប់ប្រភេទឱ្យបង់ក្នុងតម្លៃខ្ពស់លើសសព្វមួយដងដោយគ្មានករណីយោគយល់អ្វីឡើយ។
បើតាមការលើកឡើងរបស់ក្រុមអ្នករកស៊ីដឹកជញ្ជូនទំនិញបានឱ្យដឹងថា យ៉ាងហោចណាស់ក្នុងមួយថ្ងៃមានរថយន្ដធំៗឆ្លងកាត់ស្ថានីយ៍ថ្លឹងរថយន្ដនៅកូនដំរីជាង២០០គ្រឿងជាប់ជាប្រចាំឬអាចច្រើនជាងនេះ ហើយក្រុម ជញ្ជីងថ្លឹងរថយន្ដមិនបានបំពេញតួនាទីរបស់ខ្លួនឱ្យបានត្រឹមត្រូវតាមបទបញ្ជារបស់ថ្នាក់លើនោះទេ គឺមិនចាំបាច់ឱ្យរថយន្ដផ្ទុកលើសទម្ងន់ឆ្លងកាត់ជញ្ជីងនាំតែខាតពេលគ្រាន់តែតម្រូវឱ្យចូលទៅបង់ប្រាក់តាមការកំណត់របស់ ពួកគេប៉ុណ្ណោះ។ មានការបញ្ជាក់ផងដែរថា រថយន្ដដឹកអេតចាយ ផលកសិកម្ម ខ្សាច់ ឥដ្ឋថ្ម ដែលបើកបរឆ្លងកាត់ស្ថានីយ៍ថ្លឹងរថយន្ដកូនដំរីត្រូវបង់ប្រាក់ចាប់ពី៥ម៉ឺនទៅ១០ម៉ឺនរៀល ចំណែករថយន្ដដឹកជញ្ជូនទំនិញប្រភេទសណ្ដោងកន្ទុយមកពីច្រកប៉ោយប៉ែតត្រូវបង់ចាប់ពី១០ម៉ឺនទៅ២០ម៉ឺនរៀល គឺយកថ្លៃជាងមុនបង្កើតឱ្យមានភាពប្រទាំងប្រទើស ហើយបែកធ្លាយរឿងអាស្រូវនៃអំពើពុករលួយរបស់លោក ព្រុំ វីរៈ ដឹងឮដល់អ្នកកាសែត។
សម្រាប់រថយន្ដដឹកជញ្ជូនទំនិញគ្រប់ប្រភេទដែលមិនបានបង់ប្រាក់ឱ្យក្រុមមន្ដ្រីសាធារណការក្រោម បញ្ជារបស់លោក ព្រុំ វីរៈ ទេនោះ មិនអាចមុខរួចទេដែលពេលខ្លះ គេចាត់វិធានការដាក់ពិន័យយ៉ាងធ្ងន់ធ្ងរ ដូចជាការរុះរើទំនិញទៅរថយន្ដផ្សេង គឺគេយកគោលការណ៍ច្បាប់មកប្រើប្រាស់ដើម្បីដាក់គំនាបទៅលើក្រុមអ្នកដឹកជញ្ជូនទំនិញដែលហ៊ានតវ៉ាប្រឆាំងចំពោះអំពើគាបជំរិតបង្ខំឱ្យពួកគេបង់ប្រាក់ ដែលកាន់តែអនាធិបតេយ្យខ្លាំងឡើង ។ ប៉ុន្ដែសម្រាប់ក្រុមអ្នកដឹកជញ្ជូនទំនិញដែលមិនហ៊ានតវ៉ាចំពោះការបង្ខំឱ្យបង់ប្រាក់តាមតែទំនើងចិត្ដរបស់ក្រុមមន្ដ្រី សាធារណការគឺអាចធ្វើអ្វីក៏បានផ្ទុកលើសទម្ងន់យ៉ាងម៉េចក៏គ្មានការហាមឃាត់ បណ្ដាលឱ្យផ្លូវជាតិដែលទើបសាងសង់រួចថ្មីថ្មោងស្រុតប្រេះស្រាំគួរឱ្យសោកស្ដាយបំផុត ពោលគឺឱ្យតែបានប្រាក់ច្រកហោប៉ៅផ្ទាល់ខ្លួន ក្រុមមន្ដ្រីរបស់ លោក ព្រុំ វីរៈ អត់ខ្វល់ខ្វាយអ្វីទាំងអស់ពីបទបញ្ជារបស់ថ្នាក់លើទោះជាផ្លូវស្ពាននៅបន្ទាយមានជ័យខូចខាតបែបណាក៏ដោយ។
សកម្មភាពដឹកជញ្ជូនទំនិញរបស់ក្រុមហ៊ុនធំៗភាគច្រើនធ្វើដំណើរនៅពេលយប់ ដូចដែលសាក្សីមួយចំនួនបានអះអាងថាចាប់ពីម៉ោង៥ល្ងាចរហូតដល់ទៀបភ្លឺ ចង់រថយន្ដដឹកជញ្ជូនទំនិញផ្ទុកលើសទម្ងន់បើកទៅមុខលែងចង់រួច ក៏អាចឆ្លងកាត់ស្ថានីយ៍ថ្លឹងរថយន្ដនៅចំណុចកូនដំររបស់លោក ព្រុំ វីរៈ ដោយរលូនល្អ គ្រាន់តែចូលបង់ប្រាក់ថ្លៃក្បាលឡានប៉ុណ្ណោះ គឺជាឱកាសដែលឈ្មួញខិលខូចអាចលួចផ្ទុកទំនិញលើសទម្ងន់បានតាមអំពើចិត្ដ ។ ស្ថានភាពនៃប្រេងសាំងនៅក្នុងប្រទេសកម្ពុជា ដែលថ្លៃជាងប្រទេសជិតខាងបង្កផលប៉ះពាល់ខ្លាំងបំផុតលើវិស័យដឹកជញ្ជូន ពោលគឺបើធ្វើតាមក្រឹតក្រមការដឹកជញ្ជូនទំនិញមិនអាចរកផលចំណេញឃើញទេ ម្ល៉ោះហើយមានតែផ្ទុកលើសទម្ងន់ ដែលជាឱកាសសម្រាប់មន្ដ្រីសាធារណការគាបជំរិតឱ្យបង់ប្រាក់គ្មានការយោគយល់ ដែលពេលខ្លះសឹងថាចូលដើមរកប្រាក់ចំណេញអត់ឃើញទេ។
នៅក្នុងបណ្ដាប្រទេសអភិវឌ្ឍន៍មួយចំនួនគេលែងបង្កើតឱ្យមានស្ថានីយ៍ថ្លឹងរថយន្ដផ្ទុកលើសទម្ងន់ទៀតហើយ គឺគេងាកទៅរកការស្ថាបនាផ្លូវថ្នល់ឱ្យមានគុណភាពប្រើប្រាស់យូរអង្វែង ផ្ទុយស្រឡះពីរឿងហេតុដែលកើតមាននៅក្នុងប្រទេសកម្ពុជា ដែលការសាងសង់ផ្លូវថ្នល់គ្មានគុណភាព បានដាក់កំហិតសម្រាប់ការដឹកជញ្ជូនទំនិញ ហើយគេបង្កើតឱ្យមានស្ថានីយ៍ថ្លឹងរថយន្ដដែលធម្មតាមិនអាចទប់ស្កាត់ការផ្ទុកលើសទម្ងន់បានទេ គ្រាន់តែជាលេស មួយដែលក្រសួងសាធារណការធ្វើដើម្បីឱ្យមន្ដ្រីរបស់ខ្លួនចាំប្រមូលផលប្រយោជន៍ពីការដឹកជញ្ជូនលើសទម្ងន់យកទៅបែង ចែកគ្នាចាយតាមរបៀបពុករលួយហើយរូបភាពជាក់ស្ដែងស្ថានីយ៍ថ្លឹងរថយន្ដនៅកូនដំរី ក្រោមការគ្រប់គ្រងរបស់លោក ព្រុំ វីរៈ គឺ ប្រឹងប្រមូលលាភសក្ការៈទៅច្រកហោប៉ៅផ្ទាល់ខ្លួននិងបែងចែក ថ្នាក់លើច្រើនជាងការបង្ការ បង្ក្រាបការលួចដឹកជញ្ជូនទំនិញផ្ទុកលើសទម្ងន់៕
No comments:
Post a Comment
yes