លោកស្រី គ្លីនតុន ទទួលអំណោយពីលោក Puna នាយករដ្ឋមន្ត្រីកោះ Cook Islands
ក្រុង រ៉ារ៉ូតុងហ្គា: រដ្ឋមន្ត្រីការបរទេសអាមេរិកលោកស្រី ហ៊ីឡារី គ្លីនតុន បានថ្លែងពីថ្ងៃសុក្រថា សហរដ្ឋអាមេរិកនឹងគាំទ្រភាពជាដៃគូសន្តិសុខនៅទូទាំងសមុទ្រ ប៉ាស៊ីហ្វិក ខណៈខ្លួនបានពង្រឹងទំនាក់ទំនងជាមួយបណ្ដាប្រទេសជាកោះមួយចំនួន តែក៏សង្ឃឹមនឹងធ្វើការកាន់តែជិតស្និទ្ធជាមួយប្រទេសចិនផងដែរ ខណៈរដ្ឋាភិបាលក្រុងប៉េកាំង បានពង្រីកឥទ្ធិពលផ្ទាល់របស់ខ្លួននៅក្នុងតំបន់នោះ។
លោកស្រី គ្លីនតុន បានទៅដល់ជាយកោះ Cook Islands នៅសមុទ្រប៉ាស៊ីហ្វិក ដើម្បីចូលរួមក្នុងវេទិកាស្ដីពីកោះនៅតាមសមុទ្រប៉ាស៊ីហ្វិក នៅឆ្នាំនេះ ដែលនេះគឺជាផ្នែកមួយនៃកិច្ចប្រឹងប្រែងរបស់ក្រុងវ៉ាស៊ីនតោន ក្នុងការបញ្ចុះបញ្ចូលបណ្ដាប្រទេសនៅទូទាំងតំបន់អាស៊ីប៉ាស៊ីហ្វិក ដែលកំពុងស្ថិតក្រោមឥទ្ធិពលរបស់ប្រទេសចិនកាន់តែខ្លាំងឡើងនោះ។
លោក ស្រី គ្លីនតុន បានថ្លែងប្រាប់អ្នកចូលរួមទាំងអស់ ដែលជាតំណាងឲ្យរដ្ឋមានស្វ័យ ភាពនិងប្រទេសឯករាជ្យចំនួន ១៦ មានចាប់ពីអូស្រ្តាលី និងនូវែលសេឡង់ រហូតដល់កោះតូចៗ ដូចជា កោះ Tuvalu និង កោះ Nauru ថា អាមេរិកបានស្ថិតនៅក្នុងតំបន់នេះរយៈពេលវែង។
ប៉ុន្តែលោកស្រី គ្លីនតុន ក៏បាននិយាយសម្រាលនូវការយល់ឃើញកាន់តែខ្លាំងឡើងដែលថាជាការ ប្រកួតប្រជែងរវាងអាមេរិក និងចិន ដោយលោកស្រី បានប្រកាសថា «តំបន់ប៉ាស៊ីហ្វិក គឺធំល្មមសម្រាប់យើងទាំងអស់គ្នា» ហើយលោកស្រី បានច្រានចោលនូវគំនិតដែលថា ការពង្រីកសកម្មភាពរបស់អាមេរិកគឺ «ជាការទប់ស្កាត់ឥទ្ធិពលរបស់ប្រទេសណាមួយជាក់លាក់ទេ»។
លោកស្រី គ្លីនតុន បានថ្លែងប្រាប់សន្និសីទព័ត៌មានជាមួយលោកនាយករដ្ឋមន្ត្រីនូវែល សេឡង់ John Key ថា៖ «យើងគិតថា វាសំខាន់សម្រាប់បណ្ដាប្រទេសជាកោះនៅតាមសមុទ្រប៉ាស៊ីហ្វិក ដែលមានទំនាក់ទំនងល្អជាមួយដៃគូជាច្រើនតាមតែអាចធ្វើបាន ហើយក្នុងនោះរួមបញ្ចូលទាំងប្រទេសចិន និងអាមេរិកផងដែរ»។
ដោយ លើកឡើងពីជំនួយសង្គ្រោះមហន្តរាយ សន្តិសុខដែនសមុទ្រ និងការពារជីវចម្រុះ លោកស្រីបានថ្លែងថា៖ «យើងចង់ឃើញគម្រោងអភិវឌ្ឍន៍អន្តរជាតិបន្ថែមទៀតដែលមានការចូល រួមពីប្រទេសចិនផងដែរ»។
លោកស្រីបានបន្ថែមថា៖ «យើងគិតថា យើងមានឱកាសដ៏អស្ចារ្យមួយក្នុងការធ្វើការងារជាមួយចិន ហើយយើងនឹងស្វែងរកវិធីបន្ថែមទៀត ដើម្បីកិច្ចការនោះ»។
អនុរដ្ឋ មន្ត្រីក្រសួងការបរទេសចិន គឺលោក Cui Tiankai ក៏បានចូលរួមនៅក្នុងវេទិកាប៉ាស៊ីហ្វិកនេះផងដែរ ហើយលោកបានប្រាប់អ្នកសារព័ត៌មានថា វត្តមានរបស់រដ្ឋាភិបាលក្រុងប៉េកាំងនៅក្នុងតំបន់ប៉ាស៊ីហ្វិកនេះ គឺមិនមែនបង្ហាញពីឥទ្ធិពលភូមិសាស្ត្រនយោបាយណាមួយក្នុងតំបន់ នោះទេ៕
No comments:
Post a Comment
yes