ប្រជាពលរដ្ឋមានជម្លោះដីធ្លី នៅខេត្តព្រះវិហារ នាំគ្នាមកភ្នំពេញ សុំឲ្យនាយករដ្ឋមន្ត្រីជួយ
ព្រះវិហារៈ អាជ្ញាធរស្រុកជាំក្សាន្ត រងការចោទថា បានរារាំងមន្ត្រីអាដហុកមិនឲ្យចូលរួមការដោះស្រាយវិវាទដីធ្លី រវាងពលរដ្ឋជាង៥០០គ្រួសារនិងអតីតអង្គការវាយអេដស៍កាលពី ថ្ងៃពុធ។
លោក ឡោ ចាន់ អ្នកសម្របសម្រួលសមាគមសិទ្ធិមនុស្សអាដហុកខេត្តព្រះវិហារបានអះអាង ថា លោក សុខ ហៃ អភិបាលស្រុកជាំក្សាន្តបានរារាំងមិនឲ្យលោកចូលស្តាប់ការដោះស្រាយបញ្ហាដីធ្លី រវាងប្រជាពលរដ្ឋជាង៤០នាក់តំណាងឲ្យជាង៥០០គ្រួសារ និងអតីតអង្គការវាយអេដស៍ទេ ។ លោកថា នេះជាការបំបិទសិទ្ធិសេរីភាពអង្គការសង្គមស៊ីវិលក្នុងការរក ដំណោះស្រាយជូនពលរដ្ឋនៅសាលាឃុំកន្ទួត។
លោក ឡោ ចាន់ បន្តថា៖«នេះជាការរឹតបន្តឹងលើសិទ្ធិសេរីភាពរបស់សង្គមស៊ីវិល ហើយមិនបាន ធ្វើតាមសំណើពលរដ្ឋរងគ្រោះក្នុងរឿងជម្លោះដីធ្លីដ៏រ៉ាំរ៉ៃ នោះដែរ»។
លោកថ្លែងថា៖«ប្រជាពលរដ្ឋបម្រុងឡើងមកភ្នំពេញតវ៉ានៅ ផ្ទះលោកនាយករដ្ឋមន្ត្រី ហ៊ុន សែនសុំអន្តរាគមន៍ តែអាជ្ញាធរនិងអតីតអង្គការវាយអេដស៍បានសន្យារកដំណោះស្រាយជូនពួកគាត់កុំអីមកភ្នំពេញតវ៉ាបាត់ទៅហើយ»។
អ្នក ស្រី សាត សាវឿន តំណាង ពលរដ្ឋ ៣១៩គ្រួសារដែលបានចូលរួមការដោះស្រាយនោះបានឲ្យដឹងថា ការជួបគ្នាកាលពីព្រឹកម្សិលមិញ គ្មានលទ្ធផលទេ ដោយសារតែអតីតប្រធានអង្គការវាយអេដស៍លោក ប៉ែន លឹម មិនចូលរួម និងមានតែលោកអភិបាលស្រុក។ អ្នកស្រីថា៖ «គ្មានលទ្ធផលទេ ព្រោះលោក ប៉ែន លឹម មិនមកគឺមានតែតំណាងនិងមេស្រុក ហើយលោកមេស្រុកមិនឲ្យនិយាយរឿងចាស់ទេ។ បើមិនឲ្យនិយាយរឿងចាស់ តើនិយាយរឿងអីវិញ?»។ អ្នកស្រីអះអាងថា៖ «ប្រជាពលរដ្ឋដែលរងគ្រោះពីជម្លោះដីនេះនឹងឡើងមកតវ៉ានៅគេហដ្ឋានលោក នាយករដ្ឋមន្ត្រីម្តងទៀត បើនៅតែគ្មានដំណោះស្រាយទេនោះ»។
លោក សុខ ហៃ អភិបាលស្រុកជាំក្សាន្តមិនអាចទាក់ទងសុំការអត្ថាធិប្បាយបានទេពី ម្សិលមិញ។ ប៉ុន្តែមេឃុំកន្ទួត លោកមូល ម៉ាប់ ថា ការជួបប្រជុំនេះគឺសម្រាប់តែប្រជាពលរដ្ឋនិងអាជ្ញាធរប៉ុណ្ណោះ ឯសង្គមស៊ីវិលមិនបានអនុញ្ញាតនោះទេ ដោយសារ គ្មានលិខិតជូនដំណឹងមកអាជ្ញាធរ ឬលិខិតអញ្ជើញ។ លោកមេឃុំថ្លែងថា កិច្ចប្រជុំនោះ អាជ្ញាធរគ្រាន់តែចង់ឲ្យពលរដ្ឋប្រមូលឯកសារពាក់ព័ន្ធនឹងដីជម្លោះតែប៉ុណ្ណោះ។ ពលរដ្ឋ អាជ្ញាធរ និងអង្គការវាយអេដស៍នឹងជួបគ្នានៅថ្ងៃទី២៥ ខែកញ្ញា ម្តងទៀត។
អង្គការវាយ អេដស៍ទទួលដីសម្បទានសង្គមកិច្ចពីរដ្ឋាភិបាល ចំនួន៥៥៦ហិកតា ទៅចែកជូនពលរដ្ឋក្រីក្រ ប៉ុន្តែបែរជាយកដីលក់មួយប្លង់ឲ្យពីរម្ចាស់ ដែលជាហេតុធ្វើឲ្យមានជម្លោះរហូតមកនេះបើតាមអ្នកស្រី សារឿន៕
No comments:
Post a Comment
yes