ខេត្តសៀមរាម ៖ ប្រជាពលរដ្ឋដែលរស់នៅក្នុងសង្កាត់ចំនួន៤ នៃទីក្រុងទេសចរណ៍សៀមរាប–អង្គរ បានសម្តែងការព្រួយបារម្ភជាខ្លាំងអំពីទឹកជំនន់ដែលអាចកើតឡើងជាថ្មី បន្ទាប់ពីមានភ្លៀងធ្លាក់មក ប៉ុន្មានថ្ងៃជាប់ៗគ្នា បណ្តាលឲ្យកំពស់ទឹកស្ទឹងដែលហូរកាត់ទីក្រុងនេះកើនឡើងជាលំដាប់។
ប្រជាពលរដ្ឋដែលរស់នៅក្នុងសង្កាត់សាលាកំរើក សង្កាត់ស្លក្រាម សង្កាត់ជ្រាវ និងសង្កាត់សៀមរាប ដែលសង្កាត់ទាំង៤នេះ តែងតែទទួលនូវការលិចលង់ពីទឹកជំនន់នៃស្ទឹងសៀមរាបនោះ បានថ្លែងប្រហាក់ប្រហែលគ្នាថា ឆ្នាំនេះប្រហែលជាមិនខុសពីឆ្នាំ២០១១កន្លងទៅនោះទេ ព្រោះទឹកស្ទឹងសៀមរាប បានកើនឡើងជាបន្តបន្ទាប់ ក្រោយពីមានភ្លៀងធ្លាក់មកប៉ុន្មានថ្ងៃជាប់ៗគ្នា។ ពួកគាត់និយាយថា កាលពីឆ្នាំ២០១១ ជំនន់ទឹកស្ទឹងសៀមរាប បានធ្វើឲ្យប៉ះពាល់យ៉ាងខ្លាំងដល់ជីវភាពរបស់ពួកគាត់ ហើយឥលូវទឹកស្ទឹងចេះតែកើនទៀត ខណៈដែលភ្លៀងក៏បន្តធ្លាក់មិនឈប់សោះ។
ពាក់ព័ន្ធនឹងការព្រួយបារម្ភរបស់ប្រជាពលរដ្ឋនេះ ប្រធានមន្ទីរធនធានទឹកនិងឧត្តុនិយមខេត្តសៀមរាបលោកនួន គ្រិះស្នា បានថ្លែងប្រាប់អ្នកកាសែតតាមទូរស័ព្ទថា ការធ្លាក់ភ្លៀងប៉ុន្មានថ្ងៃនេះ ដោយសារតែកម្ពុជាទទួលឥទ្ធិពលប្រពន្ធ័សម្ពាធទាប ហើយឥទ្ធិពលនេះទំនងជាអាចអូសបន្លាយដល់ទៅមួយសប្តាហ៍ទៀត។ លោកបន្តថា ប៉ុន្តែបើទោះជាយ៉ាងនេះក្តីបើតាមការព្យាករណ៍ កំពស់ទឹកភ្លៀងនៅសៀមរាបមិនទាន់ ដល់កម្រិតប្រកាសអាសន្នអំពីទឹកជំនន់នៅឡើយទេ។ លោកបន្តថា កំពស់ទឹកស្ទឹងសៀមរាបនៅសល់កន្លះម៉ែត្រទៀតទើបដល់កំរិតប្រកាសអាសន្ន។
បើទោះជាយ៉ាងនេះក្តី លោកនួន គ្រិះស្នា បានឲ្យដឹងថា ទឹកស្ទឹងសៀមរាប ក៏អាចជន់លិចទីក្រុង នេះបានដែរប្រសិនបើ ភ្លៀងបន្តធ្លាក់ខ្លាំងទាំងនៅក្នុងខេត្តសៀមរាប និងប៉ែកខាងលើនៃខេត្តនេះ។ ប៉ុន្តែបើប្រសិនបើមានការលិចលង់ក៏មិនខ្លាំងដូចឆ្នាំ២០១១ដែរ ព្រោះឆ្នាំនេះអាចបញ្ជៀសទឹកបានខ្លះដោយសារតែ អាជ្ញាធរបានស្តារប្រលាយជាច្រើនខ្សែរនៅផ្នែកខាងលើដោយភាគខាងកើតទម្លាក់ទឹកទៅស្ទឹងរលួស ក្នុងស្រុកប្រាសាទបាគង និងខាងលិចទម្លាក់ទៅស្ទឹងក្នុងស្រុកពួក ដើម្បីកុំឲ្យទឹកហូរបុកគំហក់មកតែស្ទឹងសៀមរាបមួយ។
គួរបញ្ជាក់ថា កាលពីចុងឆ្នាំ២០១១កន្លងទៅ ទីក្រុងទេសចរណ៍សៀមរាប–អង្គរ ត្រូវបានជំនន់នៃទឹកស្ទឹងសៀមរាប វាយលក់ផ្ទួនៗ បណ្តាលឲ្យខូចខាតហេដ្ឋារចនាសម្ព័ន្ធនានាក្នុងខេត្តអស់ជាច្រើន ជាពិសេស ផ្លូវគមនាគម និងកសិផលរបស់ប្រជាពលរដ្ឋ៕
No comments:
Post a Comment
yes