សួន សេរីរដ្ឋា
ជុំវិញការយកឈ្មោះប្រជាពលរដ្ឋខ្មែរនៅក្នុងរាជធានីភ្នំពេញទាំងមូលទៅ ស្នើ សុំប្រសិទ្ធនាមឱ្យលោក ហ៊ុន សែន ជា “មហាបុរសខ្មែរ” នោះ ត្រូវបានលោក សួន សេរីរដ្ឋា ប្រធានចលនាអំណាចពលរដ្ឋខ្មែរបញ្ចោញប្រតិកម្មជំទាស់ យ៉ាងក្តៅគគុក ។
លោកមានប្រសាសន៍យ៉ាងដូច្នេះថា អំណាច និងសិទ្ធិរបស់ពលរដ្ឋ ជា អំណាចឯករាជ្យ និងជាសិទ្ធិឯករាជ្យ ។ អំណាចនិងសិទ្ធិឯករាជ្យរបស់ពល រដ្ឋ មិនមែននរណាម្នាក់ ឬជនណាមួយដែលអាងថាខ្លួនមានតួនាទី ឬ មាន ឋានៈក្នុងតំណែងមុខងារសាធារណៈអាចយកទៅប្រើទាំងទទឹងទិស ដោយ សារខ្លួនអាងអំណាចដែលមាននៅក្នុងតួនាទីនោះទេ ។
ពលរដ្ឋខ្មែរក៏ដូចជាពលរដ្ឋដទៃទៀតនៅក្នុងពិភពលោកនេះដែរ ពលរដ្ឋសេរីត្រូវមានសេរីភាពក្នុងការសម្រេចិត្ត ។ រដ្ឋាភិបាលនិងរដ្ឋ អំណាចក្រុងភ្នំពេញបច្ចុប្បន្ននេះជារដ្ឋការដែលមិនបានបម្រើផលប្រ-យោជន៍ជូនពលរដ្ឋខ្មែរទេ ។ ក្រៅពីយកឈ្មោះនិងយកចំនួន ពលរដ្ឋខ្មែរទៅខ្ចីបុលបំណុលបរទេស និងសុំជំនួយបរទេសយកមកច្រកចូលហោប៉ៅរបស់ខ្លួន ពួកនេះនៅប្រើអំណាចប្រដាប់អាវុធ រឹបអូសប្លន់យកដីពលរដ្ឋខ្មែរទាំងភ្នែកស្រស់ និងចាប់ខ្មែរជាម្ចាស់ដីយកទៅដាក់គុកច្រវ៉ាក់ដោយមិនគោរព ច្បាប់ដែលខ្លួនឯងបង្កើត ផង ។ ដូច្នោះពួកនេះគ្មានសិទ្ធិនិងអំណាចអ្វីដែលយកមុខងារក្នុងដំណែងសាធារណៈមកប្រើឈ្មោះពលរដ្ឋខ្មែរឬប្រើសំឡេងពលរដ្ឋ ខ្មែរទៅប្រសិទ្ធិនាមឱ្យ ជនណាមួយ ឬបុគ្គលណាម្នាក់ ដើម្បីផ្គាប់ផ្គន់បុណ្យសក្តិ រក្សា ដំណែងរបស់ខ្លួននោះទេ ។
ពាក្យថា “មហាបុរស” មិនមែនចេះយកទៅប្រើដើម្បីគ្រាន់តែបញ្ជោរបញ្ចើចបុគ្គលម្នាក់ ដែលគ្មានគុណសម្បត្តិគ្រប់គ្រាន់ អោយទទួល ងារនេះដែលជាហេតុនាំអោយថោក ឬប៉ះពាល់ដល់ន័យសេចក្តីនៃពាក្យនេះទៅវិញទេ ។ ព្រះពុទ្ធជាព្រះបរមគ្រូនៃយើងទ្រង់បាន ប្រដៅថា “យើងមិនត្រូវលើកដំកើងបុគ្គលដែលមិនគួរនឹងដំកើង តែយើងត្រូវលើកដំកើងបុគ្គលដែល គួរឲ្យយើងលើកដំកើង” ។ ពុទ្ធឱវាទរបស់ព្រះសម្មាសម្ពុទ្ធ ទ្រង់បានបើកផ្លូវបំភ្លឺយើងគ្រប់គ្នាហើយថា “កុំសំអាងថា បុគ្គលមានងារជាមេដឹកនាំជាប្រមុខនៃរដ្ឋការ ព្រោះបើបុគ្គលនោះមិនមានគុណសម្បត្តិគ្រប់គ្រាន់ជាបុគ្គលដែលគួរអោយយើងលើកដំកើងទេនោះ យើងមិនត្រូវលើកដំកើងទេ ។ លោក ហ៊ុន សែន គ្មានគុណសម្បត្តិអ្វីដែលត្រូវឱ្យពលរដ្ឋខ្មែរលើកដំកើងទេ ព្រោះក្រៅពីដឹកនាំបម្រើប្រយោជន៍យួនក្រុងហាណូយ និងធ្វើឱ្យពលរដ្ឋខ្មែររងទុក្ខវេទនា លោក ហ៊ុន សែន គ្មានបានកសាងគុណសម្បត្តិដើម្បីជាតិខ្មែរទេ ។ ចំណែក លោក កែប ជុបតិមា គ្រាន់តែជាសេនាចាំស្រែកបន្ទរបញ្ជោរ លោក ហ៊ុន សែន ។ ដូច្នោះការ ដែលលោក កែប ជុបតិមា កេង ឈ្មោះលួចសំឡេងរបស់ពលរដ្ឋខ្មែរយកទៅប្រើជាប្រយោជន៍បុគ្គល ដើម្បីបញ្ជោរមេខ្លោងក្នុងក្រុមបក្សរបស់ខ្លួននោះគឺជាអំពីក្បត់មនសិការនិងក្បត់ឆន្ទៈរបស់ពលរដ្ឋ ខ្មែរនិងរំលោភទៅលើសិទ្ធិអំណាចឯករាជ្យរបស់ពលរដ្ឋខ្មែរដែលកំពុងរស់នៅក្នុងក្រុងភ្នំពេញទាំងមូល ។
ពាក់ព័ន្ធនឹងពាក្យថាមហាបុរសខ្មែរ លោក សួន សេរីរដ្ឋា បានបញ្ជាក់ថាពាក្យថា“មហាបុរសខ្មែរនៃប្រវត្តិសាស្ត្រ” មិនមែនជាងារ សម្រាប់មនុស្សនៅរស់ទេ តែជាងារកិត្តិយសសម្រាប់អ្នកដែលស្លាប់ហើយដែលការស្លាប់នោះបានបន្យល់នូវគំរូវីរភាពសម្រាប់កូន ខ្មែរអ្នកនៅរស់ និងអ្នកកើតមកក្នុងជំនាន់ថ្មីរៀនសូត្រតាម ។ មហាបុរសខ្មែរនៃប្រវត្តិសាស្ត្រត្រូវតែផ្តល់ជូនចំពោះវីរបុរសក្រឡាហោម គង់ វីរបុរស សឺន គុយ និងវីរសាមណេរ ហែម ចៀវ ជាដើម ទើបសក្តិសម ពីព្រោះលោកទាំង ៣ អង្គនិងរូបដែលខ្ញុំលើកជាតំណាង មកនេះគឺលោកបានពលិកម្មជីវិតដើម្បីតស៊ូររំដោះប្រទេសជាតិយក ឯករាជ្យ និងសេរីភាព តែត្រូវបានស្លាប់ដោយសារតែបុព្វហេតុ ស្នេហាជាតិមាតុភូមិ និងជាពិសេសមានកេរឈ្មោះក្នុងប្រវត្តិសាស្ត្រក្លឹនក្រអូបសព្វសាយដល់អ្នកសិក្សារៀនសូត្រគ្រប់ជំនាន់សុទ្ធតែ បានចងចាំនូវគំរូល្អនិងពាក្យពេចន៍ណែនាំល្អ ដើម្បីបណ្តុះស្មារតីឆន្ទៈនិងឧត្តមគតិជាតិ ។
ការលះបង់ប្រយោជន៍បុគ្គល និងហ៊ានសម្លាប់ប្រយោជន៍បុគ្គល ដើម្បីប្រយោជន៍មនុស្សជាតិ និងជនជាតិខ្មែររបស់លោកមេទ័ពក្រឡា ហោម គង់ លោក ឧកញ៉ា សឺន គុយ និងលោក អាចារ្យ ហែម ចៀវ ទោះបី លោកបានស្លាប់ទៅអស់កាល ជាយូមកហើយមែន តែកូនខ្មែរនៅតែចងចាំ ពោលគឺមិនមែនដូចលោក ហ៊ុន សែន ដែលដឹកនាំប្រទេសឃើញតែពលរដ្ឋខ្មែរទឹកភ្នែក ឃើញតែបរទេស ឈ្លានពានយកដី មិនហ៊ានតវ៉ា តែបែរជាសម្លុតគំរាមពលរដ្ឋខ្មែរថា បើនរណាចង់ទៅវាយសត្រូវយួន ខ្លួនអោយកាំភ្លើង និងក្តារម្ឈូស នោះទេ ។
ក្នុងទម្លាប់គ្រួសារខ្មែរតែងលើកដំកើងឬដាក់តាំងរបស់ដែលមានតំលៃឬរូបថតវីរជនដែលមានប្រវត្តិតស៊ូ ។ ហើយវីរជនមួយចំនួនខ្មែរ បានលើកតំកើងថា ជា “អ្នកតា”ដែលពួកគាត់គោរពបូជាបួងសួងសុំសេចក្តីសុខចម្រើន។ តែគ្រួសារខ្មែរមិនទម្លាប់ដាក់តាំងរបស់ចង្រៃ ឬរូបថតមនុស្សចង្រៃនៅក្នុងផ្ទះទេ ព្រោះមានជំនឿថាវានឹងនាំមកចង្រៃដល់ក្រុមគ្រួសារ ។ ក្នុងប្រទេសជាតិក៏ដូចគ្នា បើយើងលើក តំកើងមនុស្យមានគុណធម៌ និងមានគុណសម្បត្តិ ជាវីរជនរបស់ជាតិនោះប្រទេសជាតិរឹងមាំរីកចម្រើនដោយសារមានការគោរពពី សំណាក់ពលរដ្ឋដ៏ច្រើនលើសលុប ។ ប៉ុន្តែបើបង្ខំលើកតំកើងអ្នកបំផ្លាញជាតិលើកបន្តុបពួកឃាតកដែលមាន បាតដៃប្រឡាក់ឈាម មកលាបថ្នាំពណ៌បង្ហើរក្លឹនបន្លំភ្នែកពលរដ្ឋ ឬបង្ខំពលរដ្ឋអោយគោរពថាជាវីរជន ឬជាមហាបុរសប្រវត្តិសាស្ត្រនោះគឹមានអ្នកគោរព ទាំងបង្ខំតែក្នុងពេលដែលបុគ្គលនោះកំពុងកាន់អំណាចតែប៉ុណ្ណោះ តែមិនមានអំណាចជាអមតៈទេ ព្រោះពលរដ្ឋមិនស្រលាញ់មិន ចូលចិត្តនិងមិនគោរព ។ ឩទាហរណ៍ តួយ៉ាងអតីតមេដឹកនាំប្រទេសអ៊ីរ៉ាក់ សាដាម ហ៊ូសេន ដែលបានផលិតរូបសំណាករបស់ខ្លួន ដាក់តាំងគ្រប់ទីកន្លែងក្នុងប្រទេសនិងបង្ខំអោយពល រដ្ឋអ៊ីរ៉ាក់គោរពខ្លួនតែដល់ពេលវេលានិងថ្ងៃអន្សាមកដល់ ពលរដ្ឋនាំគ្នាបោះខ្សែពូរ ទាក់ក ទាញផ្តួលរំលំ ។ នេះជាសច្ចៈ ភាពនៃច្បាប់ធម្មជាតិ ។
ដូច្នោះពាក្យឬងារថា “មហា បុរសខ្មែរ នៃប្រវត្តិសាស្ត្រ” នេះ មិនមែនសម្រាប់បុគ្គលដែលសាងបាបកម្មដូចលោក ហ៊ុន សែន នោះទេ ៕
No comments:
Post a Comment
yes