លោកសម រង្ស៊ី ប្រធានគណបក្សសង្គ្រោះជាតិ កំពុងរស់នៅនិរទេសដើម្បីគេច
ពីសាលក្រមកំបាំងមុខជាប់ពន្ធនាគារ ១២ ឆ្នាំ
ភ្នំពេញៈ ប្រធានគណបក្សសង្គ្រោះជាតិ លោកសម រង្ស៊ី បានដាក់លិខិតជាថ្មីទៀត មកមេដឹកនាំស្ថាប័នជាតិកំពូលទាំង ៣ និងដែលក៏ជាមេដឹកនាំជាន់ខ្ពស់គណបក្សប្រជាជនកម្ពុជាផងដែរ ដើម្បីស្នើសុំការជួយអន្តរាគមន៍ឲ្យរូបលោកបានវិលត្រឡប់មកប្រទេសកម្ពុជាវិញ ដើម្បីចូលគោរពព្រះវិញ្ញាណក្ខន្ធសម្តេចឪ នរោត្តម សីហនុ នៅព្រះបរមរាជវាំង និងក៏ជាផ្នែកមួយនៃការផ្សះផ្សាជាតិខ្មែរ ដោយខ្មែរគ្នាឯងផងដែរ។
នេះគឺជាលើកទីពីរហើយ ដែលមេដឹកនាំគណបក្សប្រឆាំង រស់នៅនិរទេសរូបនេះ បានខិតខំប្រឹងប្រែង ដើម្បីឲ្យបានវិលត្រឡប់មកកាន់ប្រទេសកម្ពុជាវិញ ចាប់តាំងពីសម្តេចឪ បានយាងចូលទិវង្គត កាលពីថ្ងៃទី ១៥ ខែតុលា។ កាលពីប៉ុន្មានថ្ងៃមុន លោក សម រង្ស៊ី បានដាក់លិខិត ក្នុងគោលបំណងដូចគ្នានេះ ថ្វាយព្រះមហាក្សត្រ សម្តេចព្រះបរមនាថ នរោត្តម សីហមុនី និងជូនលោកនាយករដ្ឋមន្ត្រីហ៊ុន សែន ផងដែរ ក៏ប៉ុន្តែមកដល់ពេលនេះ គេពុំទាន់ឃើញមានការឆ្លើយតបនៅឡើយទេ។
នៅក្នុងលិខិតលើកទី ពីរ របស់លោក សម រង្ស៊ី ចុះថ្ងៃទី ២២ ខែតុលា ឆ្នាំ ២០១២ បានផ្ញើរួម ជូនលោក ជា ស៊ីម ប្រធានព្រឹទ្ធសភា លោកហេង សំរិន ប្រធានរដ្ឋសភា និងលោក ហ៊ុន សែន ដែលពេលនេះ ជាប្រធាន និងអនុប្រធាននៃគណៈកម្មាធិការជាតិរៀបចំព្រះរាជពិធីបុណ្យព្រះបរមសពសម្តេចឪ។
នៅ ក្នុងលិខិត បានសរសេរថា៖«ខ្ញុំសូមសម្តេចទាំងបី មេត្តាជួយធ្វើអន្តរាគមន៍ដោយទឹកចិត្តយោគយល់ដ៏ខ្ពង់ខ្ពស់ ដើម្បីឲ្យរូបខ្ញុំ បានទៅគោរពព្រះវិញ្ញាណក្ខន្ធព្រះបរមសព និងបានឃើញព្រះភក្ត្រព្រះអង្គជាចុងក្រោយនៅរាជធានីភ្នំពេញ»។ លោកសម រង្ស៊ី បានសរសេរនៅក្នុងលិខិតទៀតថា៖«ក្នុងនាមខ្ញុំ ជាខ្មែរមួយរូប ខ្ញុំចាំបាច់ត្រូវតែខិតខំជួយពង្រឹងការផ្សះផ្សាជាតិ រួបរួមជាតិ ឯកភាពជាតិ និងជួយដោះស្រាយបញ្ហាខ្មែរដោយខ្មែរគ្នាឯង ស្របតាមព្រះរាជតម្រិះ និងព្រះរាជជំហរដ៏ខ្ពង់ខ្ពស់របស់ព្រះអង្គ(សម្តេចឪ)កាលពីព្រះ អង្គនៅមានព្រះជន្ម»។
លោកយឹម សុវណ្ណ អ្នកនាំពាក្យគណបក្សសមរង្ស៊ី បានសម្តែងការសោកស្តាយ ចំពោះការមិនទាន់ឃើញមានការឆ្លើយតបណាមួយ ទៅនឹងលិខិត របស់លោកសម រង្ស៊ី ចាប់តាំងពីការដាក់លិខិត លើកទីមួយមក។ លោកនិយាយថា៖ «ខ្ញុំសោកស្តាយ អ្វីដែលលោកប្រធានបានធ្វើគឺគោរពទៅតាមព្រះរាជដំបូន្មានរបស់ព្រះមហាវីរក្សត្រ ដែលលោកតែងតែឲ្យខ្មែរឯកភាពគ្នាដើម្បីបង្រួបបង្រួមជាតិ»។
បើតាមលោកយឹម សុវណ្ណ មូលហេតុដែលលោក សម រង្ស៊ី ព្យាយាមស្វះស្វែងរកព្រះរាជអន្តរា គមន៍ និងការអន្តរាគមន៍ ពីព្រះមហាក្សត្រ និងពីមេដឹកនាំកំពូលស្ថាប័នជាតិទាំង ៣ ដើម្បីបានមកគោរពព្រះវិញ្ញាណក្ខន្ធសម្តេចឪ ដោយសារព្រះអង្គមានគុណធំធេងចំពោះរូបគាត់ដែលព្រះអង្គបានបណ្តុះ គំនិតគាត់ឲ្យក្លាយជាអ្នកនយោបាយ និងមានគំនិតស្នេហាជាតិ។ លោកបានឲ្យដឹងទៀតថា ៖«ដោយសារតែគុណបំណាច់របស់សម្តេចឪនេះហើយ ទើបលោកប្រធាន ចង់ឃើញព្រះភក្ភ្ររបស់ព្រះអង្គជាលើកចុងក្រោយមុននឹងធ្វើពិធី បូជា»។
ប៉ុន្តែ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានថ្លែងបែបចំអកថា លោកពុំទាន់បានឃើញលិខិតនេះនៅឡើយទេ គឺឃើញតែការផ្សាយពាណិជ្ជកម្ម តាមទំព័រកាសែតតែប៉ុណ្ណោះ។
ប៉ុន្តែ លោកផៃ ស៊ីផាន បានចោទសួរថា៖ «តើលោកសម រង្ស៊ីចង់សម្របសម្រួលនយោបាយ ក្នុងនាមបក្សឬក៏ក្នុងនាមឯកជន?»។
ព្រះអង្គម្ចាស់ ស៊ីសុវត្ថិ ធម្មិកោ ទីប្រឹក្សាអមព្រះរាជខុទ្ទកាល័យព្រះមហាក្សត្រ និងជាអតីតលេខាផ្ទាល់ របស់ព្រះមហាវីរក្សត្រ មិនអាចទាក់ទងបានឡើយកាលពីម្សិលមិញ ប៉ុន្តែព្រះអង្គម្ចាស់ បានមានបន្ទូលកាលពីសប្តាហ៍មុនថា រហូតមកដល់ពេលនេះ ខាងព្រះបរមរាជវាំង ពុំទាន់បានប្រតិកម្មយ៉ាងណាទេ ចំពោះការស្នើសុំរបស់លោកសម រង្ស៊ី។
កាលពីម្សិលមិញ លោកសម រង្ស៊ីក៏បានផ្ញើលិខិតគាំទ្រមួយ ទៅ លោកនាយករដ្ឋមន្ត្រីហ៊ុន សែនផងដែរ ដោយបានសម្តែងការអបអរសាទរ ចំពោះសេចក្តីសម្រេចរបស់រាជរដ្ឋាភិបាល ដែលបានកំណត់យកថ្ងៃទី ២៣ ខែតុលា ជាថ្ងៃដែលខ្មែរគ្រប់ភាគីជម្លោះ បានព្រមព្រៀងគ្នា ចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីសដើម្បីបញ្ចប់ សង្គ្រាមដ៏រ៉ាំរ៉ៃនៅក្នុងប្រទេសកម្ពុជា កាលពី ២១ ឆ្នាំមុន ជាថ្ងៃបុណ្យជាតិឡើងវិញ។
លោក សម រង្ស៊ី ត្រូវបានតុលាការកាត់ទោសកំបាំងមុខ ឲ្យជាប់ពន្ធនាគារសរុបចំនួន១២ ឆ្នាំ ពាក់ព័ន្ធទៅនឹងការរិះគន់ទៅលើដំណើរការបោះបង្គោលព្រំដែន កម្ពុជា វៀតណាម ដែលមានភាពចម្រូងចម្រាស។ ការផ្តន្ទាទោសលោកសម រង្ស៊ី ត្រូវបានគណបក្សប្រឆាំងនិងមជ្ឈដ្ឋានជាតិ និងអន្តរជាតិជាច្រើន ចាត់ទុកថា ជារឿងនយោបាយយ៉ាងពិតប្រាដក៕
No comments:
Post a Comment
yes