គិតពីថ្ងៃទី១៥ ខែកញ្ញា រហូតមកដល់ថ្ងៃទី៣ ខែតុលា ឆ្នាំ២០១២ មានប្រជាពលរដ្ឋចំនួន ១៥នាក់ហើយ ដែលស្លាប់ដោយសារជំនន់ទឹកភ្លៀង នៅក្នុងខេត្តបន្ទាយមានជ័យ។
ជំនន់ទឹកភ្លៀងពីប្រទេសថៃ បានហូរជន់លិចខេត្តបន្ទាយមានជ័យ អស់រយៈពេល ៤ឆ្នាំជាប់គ្នា ហើយបានបំផ្លិចបំផ្លាញហេដ្ឋារចនាសម្ព័ន្ធក្នុងខេត្តរាល់ឆ្នាំ។ ទន្ទឹមគ្នានឹងការខូចខាតនេះ រដ្ឋាភិបាលកម្ពុជា មានគម្រោងសាងសង់ប្រឡាយរំដោះទឹកជំនន់ក្នុងខេត្តនេះ ដ៏ធំមួយនៅពេលខាងមុខនេះ។
នៅតំបន់ភាគពាយ័ព្យជាប់ព្រំដែនខ្មែរ-ថៃ ក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅពេលមានភ្លៀងធ្លាក់ខ្លាំងនៅក្នុងប្រទេសថៃ បានបង្កឲ្យមានទឹកជំនន់ចូលទៅជន់លិចនៅក្នុងខេត្តបន្ទាយមានជ័យ ដែលមានផ្ទៃទំនាបទាបជាងប្រទេសថៃ។ ទឹកជំនន់ពីប្រទេសថៃ បានហូរកាត់ចេញពីស្រុកគោកធ្យូង និងស្រុកអារ៉ាញ់ ខេត្តស្រះកែវ ហូរកាត់តាមច្រកអូរល្ហុង និងច្រកអូរបីជាន់ ចូលមកក្នុងខេត្តបន្ទាយមានជ័យ។
លោក ចាន់ យុត្ថា មន្ត្រីនាំពាក្យក្រសួងធនធានទឹក និងឧតុនិយម បានឲ្យដឹងថា នៅក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅពេលដែលកម្ពុជា ពុំបានស្ដារប្រព័ន្ធប្រឡាយរំដោះទឹក កន្លែងខ្លះមានការទប់ជាកំណាត់ មានការចាក់ដីលប់ មានការលើកទំនប់ស្កាត់ផ្លូវទឹក និងមានការគោករាក់។ បញ្ហាទាំងនេះ បានធ្វើឲ្យទឹកហូរធ្លាក់ពីប្រទេសថៃ មានការរាំងស្ទះ លំបាកក្នុងការហូរចូលទៅកាន់ស្ទឹងសិរីសោភ័ណ។
លោក ចាន់ យុត្ថា៖ «អ៊ីចឹង បានយើងឃើញថា កាលណាមកចូលទៅកាន់អាងទឹកមួយឈ្មោះថា អាងទឹកអូរខៃដន នៅជិតក្រុងប៉ោយប៉ែត នៅពេលអាងនោះពេញ ទឹកបានហូរចេញពាសវាល ដោយសារខ្វះប្រព័ន្ធដោះមកកាន់ស្ទឹងសិរីសោភ័ណហ្នឹងឯង។ អ៊ីចឹងទេ ក្រសួង ឯកឧត្ដម រដ្ឋមន្ត្រី លោកបានដឹកនាំការងារនេះ ប៉ុន្តែការងារនេះជាគម្រោងមួយធំ ត្រូវការថវិកាច្រើនគួរសមដែរ។ អ៊ីចឹងទេ យើងបានសិក្សាហើយ បើនិយាយពីការសិក្សានេះ គឺថា យើង ទីមួយ គឺយើងរៀបចំប្រឡាយដោះទឹកដែលមាត់លើតាមការសិក្សានៅជំហានដំបូងនេះ គឺមានមាត់លើទំហំ ៧០ម៉ែត្រ ហើយប្រវែងប្រហែល ៤០គីឡូម៉ែត្រ»។
គម្រោងសាងសង់ប្រឡាយនេះ គឺដើម្បីរំដោះទឹកពីតំបន់អូរបីជាន់ តំបន់ប៉ោយប៉ែត ក្នុងករណីមានទឹកជំនន់ ដើម្បីនាំទឹកទៅកាន់ស្ទឹងសិរីសោភ័ណ។ ប្រឡាយនោះមានតួនាទីជាប្រឡាយរំដោះទឹក។ បន្ថែមលើប្រឡាយរំដោះទឹកនេះ គឺមានសំណង់នៅតាមមាត់ប្រឡាយ។ នៅពេលមានទឹកជំនន់ ជាប្រឡាយរំដោះទឹក ប៉ុន្តែនៅពេលខ្វះខាតទឹក ប្រឡាយទាំងនោះដើរតួនាទីជាប្រឡាយស្រោចស្រពដំណាំកសិកម្ម។
លោក ចាន់ យុត្ថា បានបញ្ជាក់ថា ក្នុងពេលមានជំនន់ធ្ងន់ធ្ងរនាពេលកន្លងមកនេះ ក្រសួងធនធានទឹក បានបញ្ជូនក្រុមការងារចុះកាយបើកមុខទឹកចំនួន ៨កន្លែងធំៗ ដើម្បីរំដោះទឹកចូលទៅកាន់ស្ទឹងមង្គលបុរី និងមួយទៀត ចូលស្ទឹងសិរីសោភ័ណ។ ប៉ុន្តែ ការជីកបើកមុខទឹកនេះ មិនអាចរំដោះទឹកជំនន់បានគ្រប់គ្រាន់នោះឡើយ ចាំបាច់ត្រូវសាងសង់ប្រព័ន្ធប្រឡាយថ្មីទៀត។
លោក ចាន់ យុត្ថា៖ «យើងបានសិក្សាស្ទើរតែនឹងរួចរាល់ហើយ ចាំមើលយើងនឹងស្វែងរកថវិកាដើម្បីនឹងធ្វើការងារនេះ។ ហើយពេលណាដែលសំខាន់ គឺស្ថានភាពថវិកា នៅពេលដែលយើងទទួលបានថវិកាគ្រប់គ្រាន់សម្រាប់ការសាងសង់ យើងនឹងចាប់អនុវត្តភ្លាម។ ខ្ញុំជឿថា មិនយូរទេ ហើយយើងកំពុងតែដំណើរការលម្អិតឲ្យបានឆាប់បំផុត»។
អាជ្ញាធរខេត្តបន្ទាយមានជ័យ បានឲ្យដឹងថា ចាប់តាំងពីថ្ងៃទី១៥ ខែកញ្ញា មកដល់ថ្ងៃទី៣ ខែតុលា ឆ្នាំ២០១២ ជំនន់ទឹកភ្លៀងពីប្រទេសថៃ ហូរលិចខេត្តបន្ទាយមានជ័យ បានសម្លាប់មនុស្សក្មេងចាស់ប្រុសស្រីចំនួន ១៥នាក់។ ក្រុមអាជ្ញាធរបានធ្វើរបាយការណ៍ពីករណីមនុស្សស្លាប់នេះ ដាក់ទៅគណៈកម្មាធិការគ្រោះមហន្តរាយថ្នាក់ជាតិ។
លោក អ៊ុក កែវរតនៈ មន្ត្រីនាំពាក្យសាលាខេត្តបន្ទាយមានជ័យ មានប្រសាសន៍ថា ស្ថានភាពទឹកដីនៅក្នុងខេត្តបន្ទាយមានជ័យ មានផ្ទៃទំនាបទាបជាងប្រទេសថៃ។ នៅពេលមានភ្លៀងធ្លាក់ខ្លាំង ទឹកបានជន់លិចពីប្រទេសថៃ ហូរមកចាក់នៅក្នុងខេត្តបន្ទាយមានជ័យ។ ជំនន់ទឹកភ្លៀងពីប្រទេសថៃ បានហូរជន់លិចគ្រប់ស្រុកក្រុងទាំង៧ នៅក្នុងខេត្តបន្ទាយមានជ័យ។
ខេត្តបន្ទាយមានជ័យ មានស្ទឹងជួយរំដោះទឹកចំនួនពីរ គឺស្ទឹងសិរីសោភ័ណ និងស្ទឹងមង្គលបុរី ប៉ុន្តែស្ទឹងទាំងពីរនេះ ពុំអាចរំដោះទឹកជំនន់ពីប្រទេសថៃ បានទាំងស្រុងនោះទេ៖ «ការប៉ះពាល់មកទល់ថ្ងៃនេះ យើងសិក្សាទៅ វាស្រូវជាង ៤ម៉ឺនហិកតារ រងការប៉ះពាល់ តាមការប៉ាន់ស្មាន វាចៀសមិនផុតពីការខូចខាត ព្រោះឆ្នាំទៅខូចទាំងស្រុង ១ម៉ឺនហិកតារ រលួយអស់តែម្ដង បួនឆ្នាំជាប់ ខេត្តបន្ទាយមានជ័យ គិតទៅពីឆ្នាំ២០០៩ ដល់ឆ្នាំ២០១២»។
ក្រៅពីការខូចខាតផលដំណាំស្រូវ ជំនន់ទឹកភ្លៀងពីប្រទេសថៃ បានជន់លិចដំឡូងមី ប្រព័ន្ធផ្លូវថ្នល់ សាលារៀនជាច្រើនខ្នងបើកទ្វារបង្រៀនមិនកើត និងបានសម្លាប់អាយុជីវិតមនុស្សជារៀងរាល់ឆ្នាំ។ ខេត្តបន្ទាយមានជ័យ មានផ្ទៃដីទំហំ ៦៦៧.៩០០ហិកតារ ក្នុងនោះមានផ្ទៃដីកសិកម្មទំហំ ៣២ម៉ឺនហិកតារ។ ខេត្តនេះ មានព្រំប្រទល់ជាប់ខេត្តស្រះកែវ និងខេត្តបុរីរ៉ាំ របស់ថៃ ដែលមានខ្សែបណ្ដោយព្រំដែនប្រវែង១៥៣គីឡូម៉ែត្រ។
អតីតស្រុកស្វាយស៊ីសូផុន ត្រូវបានកាត់ផ្ដាច់ចេញពីខេត្តបាត់ដំបង កាលពីឆ្នាំ១៩៩៧។ លុះនៅថ្ងៃទី៧ ខែមករា ឆ្នាំ១៩៩៨ រដ្ឋាភិបាលបានប្រកាសជាផ្លូវការថា ជាខេត្តបន្ទាយមានជ័យ បច្ចុប្បន្នមានចំនួនប្រជាពលរដ្ឋជាង ៧០ម៉ឺននាក់។ អាជ្ញាធរខេត្តបន្ទាយមានជ័យ បានឲ្យដឹងថា ក្នុងរយៈពេល ៤ឆ្នាំជាប់គ្នា ពោលចាប់ពីឆ្នាំ២០០៩ រហូតដល់ឆ្នាំ២០១២ ខេត្តបន្ទាយមានជ័យ បានរងគ្រោះដោយសារជំនន់ទឹកភ្លៀងពីប្រទេសថៃ យ៉ាងធ្ងន់ធ្ងរ។ គ្រោះទឹកជំនន់ បានធ្វើឲ្យបាត់បង់អាយុជីវិតប្រជាពលរដ្ឋ ធ្វើឲ្យខូចខាតផលដំណាំកសិកម្ម ប្រព័ន្ធផ្លូវថ្នល់ លំនៅឋាន និងសាលារៀនដែលគេប៉ាន់ស្មានថា រដ្ឋាភិបាលត្រូវចំណាយថវិកាអស់រាប់លានដុល្លារ សម្រាប់ការជួសជុលការខូចខាតទាំងនោះឡើងវិញជារៀងរាល់ឆ្នាំ៕
No comments:
Post a Comment
yes