ក្រចេះ៖ សមត្ថកិច្ចចម្រុះ នៃខណ្ឌរដ្ឋបាលជលផលក្រចេះ ផ្នែករដ្ឋបាលជលផលស្រុកព្រែកប្រសព្វ ដោយមានកិច្ចសហការពីអាជ្ញារធរស្រុកឆ្លូង រួមមានកម្លាំងនគរបាលស្រុក កំលាំងកងរាជអាវុធហត្ថស្រុក អាជ្ញាធរឃុំ និងសហគមន៍នេសាទ ព្រមទាំងមន្ត្រីអធិការរដ្ឋានរដ្ឋបាលជលផលមេគង្គ កាលពីព្រឹក ថ្ងៃទី០៤ ខែតុលា ឆ្នាំ២០១២ បានចុះទប់ស្កាត់ និងបង្ក្រាបបទល្មើសនេសាទ ឧបរណ៍នេសាទខុសច្បាប់ នៅចំណុចបឹងកញ្ជនជ័យ ភូមិថ្មីទី២ ឃុំខ្សាច់អណ្តែត ស្រុកឆ្លូង ខេត្តក្រចេះ។
ការចុះបង្ក្រាបខាងលើ គឺខាងសមត្ថកិច្ចយយើងតែងតែទទួលបានព័ត៌មានពីប្រជាពលរដ្ឋថា នៅតំបន់នោះ តែងតែកើតមានការធ្វើចរាចរនេសាទខុសច្បាប់ជាច្រើន ទោះជាកន្លងមកសមត្ថកិច្ចជលផល និងអាជ្ញាធរដែនដី ចុះទៅបង្ក្រាបជាច្រើនលើកច្រើនសារហើយក្តី ក៏ជនសង្ស័យនៅតែឈ្លាតឱកាសពេលសមត្ថកិច្ចចម្រុះយើងចេញផុតភ្លាម ពួកគេក៏ប្រព្រឹត្តតាមក្រោយភ្លាមដែរ។
ជាក់ស្តែង នៅថ្ងៃនោះ កំលាំងសមត្ថកិច្ចចម្រុះ បានចុះទៅធ្វើការបង្ក្រាបដោយទទួលបានលទ្ធផល រួមមាន របាំងស្បៃមុង ចំនួន ៣៥ ខ្សែ និងប្រវែងសរុបប្រមាណ ២,៧០០ ម៉ែត្រ លូស្បៃមុង ចំនួន ៣៥ គ្រឿង បង្គោលចម្រឹងឫស្សី ចំនួន ២៧៥ ដើម ចាកលែងត្រីចម្រុះ ចូលបឹងធម្មជាតិប្រមាណជា ១៧៥ គីឡូក្រាម។
លោក ម៉ុក ពន្លក នាយរងខណ្ឌរដ្ឋបាលជលផលខេត្ត ដែលដឹកនាំបេសកកម្មថ្ងៃនោះ បានប្រាប់ឱ្យដឹងថា ក្នុងនាមខណ្ឌរដ្ឋបាលជលផលក្រចេះ លោកតែងតែគោរពតាមនូវអនុសាសន៍ណែនាំរបស់ ឯកឧត្តម បណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ណៅ ធួក ប្រធានរដ្ឋបាលជលផល និងឯកឧត្តម អភិបាល នៃគណៈអភិបាលខេត្ត ព្រមទាំងមានការចង្អុលបង្ហាញពីនាយកអធិការរដ្ឋានរដ្ឋបាលជលផលមេគង្គ និងនាយខណ្ឌរដ្ឋបាលជលផលខេត្ត លោកតែងតែសហការណ៍ជាប់ជានិច្ចជាមួយអាជ្ញាធរដែនដីគ្រប់ជាន់ថ្នាក់ កងកំលាំងប្រដាប់អាវុធគ្រប់ប្រភេទ ដើម្បីចុះទប់ស្កាត់ និងបង្ក្រាបបទល្មើសនេសាទគ្រប់ប្រភេទនៅក្នុងដែននេសាទខេត្តក្រចេះ ដូចភ្លៀងរលឹម និងបានទទួលជោគជ័យជាបន្តបន្ទាប់។
លោក សៀន គិន នាយខណ្ឌរដ្ឋបាលជលផលខេត្ត បានបញ្ជាក់ឱ្យដឹងថា ក្នុងនាមខណ្ឌរដ្ឋបាលជលផលខេត្ត លោកតែងតែគោរពតាមអនុសាសន៍ណែនាំរបស់គណៈអភិបាលខេត្តក្រចេះ និងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងថ្នាក់ដឹកនាំ នៃរដ្ឋបាលជលផល ដើម្បីអនុវត្តន៍ការងារឱ្យបានល្អស្របតាមគោលនយោបាយរបស់រាជរដ្ឋាភិបាលកម្ពុជា សំដៅលើកកំពស់ជីវភាពរស់នៅរបស់ប្រជាពលរដ្ឋនៅតាមតំបន់ជនបទ។
ពិសេសទៀតនោះ លោកក៏បានជំរុញណែនាំដល់មន្ត្រីក្រោមឱវាទអោយខិតខំធ្វើការ និងសហការអោយបានល្អជាមួយស្ថាប័នពាក់ព័ន្ធនានា រួមគ្នាការពារ និងអភិរក្សធនធានជលផល អោយមាននិរន្តរភាព៕
No comments:
Post a Comment
yes