លោកស្រីសេង ច័ន្ទដា (ឆ្វេង) និងឧកញ្ញ៉ាខូវ ជីលី (ស្តាំ)
ភ្នំពេញៈ តុលាការកំពូលកាលពីព្រឹក ថ្ងៃសុក្រ ទី៥ ខែ តុលា បានប្រកាសសាលដីកា លើបណ្តឹងសារទុក្ខរបស់លោកស្រី សេងច័ន្ទដា ភរិយាវ័យក្មេងរបស់មហាសេដ្ឋីប្រាំជំនាន់ ឧកញ៉ា ខូវ ជីលី និង ជនជាប់ចោទពាក់ព័ន្ធបីនាក់ផ្សេងទៀត ក្រោមការចោទប្រកាន់ពីបទ«ការប៉ុនប៉ងមនុស្សឃាត ដោយ ចេតនា» លើភរិយា និង បុត្រីអាយុ៩ឆ្នាំ របស់លោកទេសរដ្ឋមន្ត្រី ស៊ុន ចាន់ថុល ប្រព្រឹត្តកាលពីរាត្រី ថ្ងៃទី១៣ ខែមិថុនា ឆ្នាំ២០១០ នៅភូមិគ្រឹះលេខ០១បេ ផ្លូវហាណូយ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
តុលាការកំពូលក៏បានសម្រេច តម្កល់នូវ សាលដីការបស់សាលាឧទ្ទរណ៍ និងសាលក្រមរបស់សាលាដំបូងរាជធានីភ្នំពេញ រក្សាទុកនៅដដែល និង ផ្តន្ទាទោស លោកស្រី សេង ច័ន្ទដា អាយុ ៤៩ ឆ្នាំ និង ខន ឡាក់ អាយុ៣០ ឲ្យជាប់ពន្ធនាគារម្នាក់ៗចំនួន២០ឆ្នាំ និងបង្ខំឲ្យធ្វើការជាទម្ងន់ ចំណែកឯឈ្មោះ ចាន់ សុខា អាយុ៣៨ ឆ្នាំ និង នាង ស៊ីណាត អាយុ ២៨ ឆ្នាំ ត្រូវបានកាត់ទោសឲ្យជាប់ពន្ធនាគារចំនួន១៨ឆ្នាំម្នាក់ៗ។
លោកទេសរដ្ឋមន្រ្តី ស៊ុន ចាន់ថុល តំណាងភាគីដើមចោទ ដែលចូលរួមស្តាប់ ការប្រកាសសាលដីការបស់តុលាការកំពូលបានថ្លែងប្រាប់ក្រុមអ្នកកាសែតថា៖« ខ្ញុំសូមសម្តែងការ អរគុណចំពោះតុលាការទាំងបីថ្នាក់ គឺ សាលាដំបូងរាជធានីភ្នំពេញ សាលាឧទ្ទរណ៍ និង តុលាការកំពូល ដែលបានរក និង ផ្តល់យុត្តិធម៌ជូនដល់ខ្ញុំ និង ក្រុមគ្រួសាររបស់ខ្ញុំ ដែលជាជនរងគ្រោះ។ នេះគឺជាការបង្ហាញ ពីភាពយុត្តិធម៌ របស់តុលាការទាំងបី»។
លោកទេសរដ្ឋមន្រ្តី ស៊ុន ចាន់ថុលបានបញ្ជាក់ថា៖« ខ្ញុំត្រូវតែខិតខំ កសាងកិត្តិយសនិង កេរ្ត៍ឈ្មោះខ្ញុំ ឡើងវិញដែលគេបានបង្ខូចកិត្តិយសខ្ញុំ រយៈពេល២ឆ្នាំ ៤ ខែមកហើយ។ ខ្ញុំឈឺចាប់ បិះអស់ ប្រពន្ធ និងកូន ប៉ុន្តែទន្ទឹមនឹងនេះ គេបែរជានិយាយមួលបង្កាច់ខ្ញុំថា ខ្ញុំប្រឌិតរឿងនេះ ដើម្បីចង់បានកេរមតកលោកឧកញ៉ា ខូវ ជឺលីទៅវិញ»។
លោកបន្ថែមថា៖«ខ្ញុំសូមជម្រាបថា ស៊ុន ចាន់ថុន និង ក្រុមគ្រួសារស៊ុន ចាន់ថុល មិនចង់បានមួយសេនពីឧកញ៉ា ខូវ ជឺលី ទាល់តែសោះ។ រឿងពិតប្រាកដ គឺ ឧកញ៉ា ខូវ ជឺលីបានមកប្រាប់ខ្ញុំផ្ទាល់មាត់ថា ប្រពន្ធគាត់ គឺ សេង ច័ន្ទដាបានរកដៃជើងមកសម្លាប់កូនគាត់ និងចៅគាត់ តាមបញ្ជារបស់ ឡាយ ហួង។ នេះ គឺជាសម្តីរបស់លោកឧកញ៉ា ខូវ ជឺលី ពិតប្រាកដ ខ្លួនឯង។ ខ្ញុំមិនបានប្រឌិតទេ»។
ចំណែកឯ លោកស្រី សេង ច័ន្ទដាបានមានប្រសាសន៍ថា សាលក្រម និងសាលដីការបស់តុលាការទាំងបីថ្នាក់ខាងលើ ដែលបានសម្រេចផ្តន្ទាទោសលោកស្រីគឺ អយុត្តិធម៌ណាស់ សម្រាប់រូប លោកស្រី ហើយលោកស្រី មិនអាចទទួលយកបានឡើយ។
លោកស្រីសេង ច័ន្ទដាថ្លែងថា៖« ខ្ញុំជាជនរងគ្រោះ តែតុលាការដែលក្នុងនាមដូចជាព្រះឥន្ទ ដូចជា ទេវត្តា ដូចជាព្រះ បែរជាមិនរកយុត្តិធម៌ឲ្យខ្ញុំឡើយ។ ខ្ញុំមិនដឹងថា តុលាការ កំពុងបំរើឲ្យជនណាទេ។ មិនមែនរកយុត្តិធម៌ជូនប្រជាជនទេ។ គាត់ស្លៀកពាក់ឯកសណ្ឋានបានល្អណាស់ និងអង្គុយលើកៅអី សង្ហាណាស់ តែពួកគាត់ គ្មានឆន្ទៈ រកយុត្តិធម៌ ជូនប្រជាជនទេ»។
លោកស្រីសេង ច័ន្ទដាបានបញ្ជាក់ថា ដើម្បីស្វែងរកយុត្តិធម៌ ចំពោះ រូបលោកស្រី ផ្ទាល់ លោកស្រីនឹងបន្តតស៊ូនិង សុំអន្តរាគមន៍ ទៅស្ថាប័នក្រសួងយុត្តិធម៌ និង ព្រះមហាក្សត្រទៀត៕
No comments:
Post a Comment
yes