ច្រើនឆ្នាំកន្លងទៅនេះ បទបញ្ជាលោកនាយករដ្ឋមន្ត្រី ហ៊ុន សែន ស្ដីពីបញ្ហាលប់បំបាត់ទីតាំងឆែកឆេរត្រួតពិនិត្យតាមដងផ្លូវជាតិ ដែលគេហៅថាកុងត្រូលជជុះ មិនទាន់មានប្រសិទ្ធភាពទេ។
កុងត្រូលនេះ បានគាបសង្កត់ជំរិតទារប្រាក់ពីរថយន្តដឹកជញ្ជូនអ្នកដំណើរ ដែលបង្កឡើងដោយក្រុមសមត្ថកិច្ចជាច្រើនផ្នែក កំពុងប្រើប្រាស់តួនាទីត្រួតពិនិត្យនៅតាមដងផ្លូវនេះ និងរំខានការធ្វើដំណើរប្រជាពលរដ្ឋ។
បើជនណាម្នាក់បានធ្វើដំណើរតាមរថយន្តឈ្នួលដឹកជញ្ជូនអ្នកដំណើរពីខេត្តរតនគិរី ទៅកាន់ទីក្រុងភ្នំពេញ អ្នកដំណើរនឹងបានឃើញក្រុមសមត្ថកិច្ចច្រើនក្រុម បានស្ទាក់រថយន្តដើម្បីឆែកឆេររកវត្ថុតាងបទល្មើស ក៏ប៉ុន្តែក្រុមសមត្ថកិច្ចទាំងនោះមិនបានអនុវត្តតួនាទីបង្ក្រាបបទល្មើសនោះគេក្រៅពីទារប្រាក់ និងរំខានការធ្វើដំណើរក្រុមសមត្ថកិច្ចមួយចំនួន បានគំរាមកំហែងជំរិតទារប្រាក់ច្រើនចំពោះម្ចាស់រថយន្ត ឬអ្នកដំណើរដែលបានដឹកជញ្ជូនគ្រឿងសង្ហារិមសម្រេច ឬពាក់កណ្ដាលសម្រេចជាថ្នូរនឹងការអនុញ្ញាតឲ្យរថយន្តបន្តដំណើរបាន។
សេចក្តីរាយការណ៍របស់ក្រុមអ្នកបើកបររថយន្តដឹកអ្នកដំណើរ ឲ្យដឹងថា យ៉ាងហោចណាស់មានក្រុមសមត្ថកិច្ចប៉ូលិស កងរាជអាវុធហត្ថ សមត្ថកិច្ចព្រៃឈើ ប៉ូលិសសេដ្ឋកិច្ចក្រសួងមហាផ្ទៃ និងអ្នកសារព័ត៌មានខ្លះ បានឈរនៅចំណុចមួយចំនួនតាមដងផ្លូវពីខេត្តរតនគិរី ទៅភ្នំពេញរាប់សិបទីតាំង ដើម្បីស្ទាក់ឃាត់រថយន្តយកប្រាក់ ឬប្រើប្រាស់រថយន្តទេសចរណ៍ផ្ទាល់ខ្លួន ប្រដេញឃាត់រថយន្តណាដែលមិនឈប់បង់ប្រាក់ទៅឲ្យពួកគេ។
ក្នុងចំណោមក្រុមសមត្ថកិច្ចជាច្រើនក្រុមនោះ ក្រុមអ្នកបើកបររថយន្តឈ្នួលដឹកអ្នកដំណើរ បានកត់សម្គាល់ថា ក្រុមកងរាជអាវុធហត្ថស្នាក់ការ៧២២ បោះទីតាំងនៅតំបន់ភ្នំក្រហម ក្នុងខេត្តស្ទឹងត្រែង និងក្រុមសមត្ថកិច្ចចម្រុះនៅចំណុចផ្លូវបំបែកក្រោយអតីតរោងចក្រក្រដាស ស្រុកឆ្លូង ខេត្តក្រចេះ គឺជាក្រុមដែលប្រើអំណាចរំខានការធ្វើដំណើរ និងជំរិតទារប្រាក់ធ្ងន់ធ្ងរជាងគេ ចំពោះរថយន្តដឹកជញ្ជូនអ្នកដំណើរ។
អ្នកបើកបររថយន្តឈ្នួលពីខេត្តរតនគិរី ទៅភ្នំពេញ លោក សុវណ្ណារ៉ា អំពាវនាវសុំឲ្យរាជរដ្ឋាភិបាលឲ្យត្រួតពិនិត្យបទបញ្ជា និងសេចក្តីព្រមាននេះឡើងវិញ។ លោកមានប្រសាសន៍គាំទ្រឲ្យមានប៉ុស្តិ៍ត្រួតពិនិត្យបទល្មើសនៅតាមដងផ្លូវដែលមានសមត្ថកិច្ចជំនាញ មានការចាត់តាំង និងមានបទបញ្ជាត្រឹមត្រូវ ក៏ប៉ុន្តែមិនមែនក្រុមសមត្ថកិច្ចត្រួតពិនិត្យតាមអំពើចិត្តនោះទេ៖«យើងចង់អំពាវនាវទៅរាជរដ្ឋាភិបាល សូមឲ្យជួយក្រឡេកមើលទៅសមត្ថកិច្ចនៅតាមដងផ្លូវ គាត់ធ្វើរបៀបនេះធ្វើឲ្យប៉ះពាល់ដល់សតិអារម្មណ៍ប្រជាពលរដ្ឋ វាអាចធ្វើឲ្យបាត់សន្លឹកឆ្នោត ដោយសារតែសមត្ថកិច្ចជជុះបង្អាក់ដំណើរគេ ជួនកាលមានអ្នកជំងឺនៅក្នុងឡានឃាត់ឡានគេ យកឡានទៅដាក់លើស្ពាន ដើម្បីបង្អាក់កុំឲ្យឡានគេទៅ»។
អ្នកបើកបររថយន្តឈ្នួលពីខេត្តរតនគិរី ទៅភ្នំពេញ លោក ជិន សុខា បានហៅទង្វើរបស់ក្រុមសមត្ថកិច្ចនៅពីរទីតាំងនោះថា កំពុងធ្វើឲ្យប៉ះពាល់ដល់បទបញ្ជា និងគោលនយោបាយដឹកនាំរបស់ប្រមុខរាជរដ្ឋាភិបាល លោក ហ៊ុន សែន។ លោកចាត់ទុកក្រុមសមត្ថកិច្ចទាំងនោះថា បានបំពានទៅលើភារៈជាកងប្រដាប់អាវុធ ជាអ្នកការពារប្រជារាស្ត្រ និងបំពានទៅលើបទបញ្ជាហាមដាក់ប៉ុស្តិ៍ឆែកឆេររំខានទារប្រាក់ប្រជាពលរដ្ឋ ព្រះសង្ឃ ជាអ្នកធ្វើដំណើរ។
លោក ជិន សុខា៖ «ឲ្យអស់លោកធំៗហ្នឹង គាត់បើកត្រចៀកស្តាប់ ឲ្យគាត់ឮផង ហើយឲ្យគាត់ស្រែកផង កុំឲ្យធ្វើអ៊ីចឹង វាអាក្រក់មើលណាស់ ព្រោះអី អួតថា រាល់ថ្ងៃជួយរាស្ត្រ ឲ្យមើលរាស្ត្រ មើលប្រជាពលរដ្ឋ នេះមើលស្អី ច្របាច់កតែប្រជាពលរដ្ឋយកតែលុយអ៊ីចឹង មិនដឹងស្អីជាស្អី មិនមែនកុងត្រូលជជុះទេ អានេះដូចចោរប្លន់តាមផ្លូវតែម្តង។ ជួនកាលមកទៅមានតែអាវយឺត មានតែដំបង ខោប៉ារ៉ាអ៊ីចឹងទៅ ខោទាហានអ៊ីចឹងទៅ ចេញមកកាក់ឡានដែរ ដេញឲ្យគ្រប់តែឡានមិនថាឡានណាមានឥវ៉ាន់អត់ឥវ៉ាន់ទេ»។
វិទ្យុអាស៊ីសេរី នៅថ្ងៃព្រហស្បត្តិ៍ ទី៤ ខែតុលា មិនអាចទាក់ទងមេបញ្ជាការកងរាជអាវុធហត្ថ ខេត្តស្ទឹងត្រែង លោក ឱ បួរិន ដើម្បីបំភ្លឺសេចក្តីចោទប្រកាន់ទៅលើប្រតិបត្តិការរបស់មន្ត្រីកងរាជអាវុធហត្ថស្នាក់ការ៧២២ បានទេ។ យ៉ាងនេះក្តី អភិបាលខេត្តស្ទឹងត្រែង លោក ឡូយ សូផាត មានប្រសាសន៍បញ្ជាក់ថា អាជ្ញាធរខេត្តមិនបានអនុញ្ញាតឲ្យកងរាជអាវុធហត្ថស្នាក់ការ៧២២ ដាក់ប៉ុស្តិ៍ត្រួតពិនិត្យនៅតាមដងផ្លូវនោះទេ។
លោកសុំឲ្យបង្ហាញភស្តុតាងពីការដាក់ប៉ុស្តិ៍ត្រួតពិនិត្យខុសច្បាប់នោះ ដើម្បីលោកចាត់វិធានការចំពោះមន្ត្រីប្រព្រឹត្តខុស៖ «បើនិយាយរួមទៅ បទបញ្ជាមានតែមួយទេ គ្មានអ្នកណាមានសិទ្ធិដាក់ទេ បើនរណាដាក់បើនិយាយពីបទបញ្ជា អត់មានកន្លែងណាដែលឲ្យធ្វើខុសទេ។ មិនថ្វីទេ បើមានឯកសារជួយថតឲ្យខ្ញុំ»។
វិទ្យុអាស៊ីសេរី នៅថ្ងៃព្រហស្បត្តិ៍ ទី៤ ខែតុលា ឆ្នាំ២០១២ មិនអាចទាក់ទងអភិបាលខេត្តក្រចេះ លោក ស ចំរ៉ុង ដើម្បីអធិប្បាយពីបញ្ហានេះបានដែរ។
យ៉ាងនេះក្តី អ្នកសម្របសម្រួលសមាគមអាដហុក លោកស្រី ធីម ណារីម ចាប់អារម្មណ៍ថា បញ្ហាកុងត្រូលជជុះនេះ គឺរាជរដ្ឋាភិបាលបានចេញបទបញ្ជាតឹងរ៉ឹងមិនឲ្យកើតមាន និងព្រមានដល់អាជ្ញាធរខេត្តក្រុងណាដែលបណ្ដែតបណ្តោយឲ្យមានកុងត្រូលជជុះនោះតទៅទៀត។ អ្នកស្រីបន្តថា អាជ្ញាធរខេត្តគួរត្រួតពិនិត្យ និងបញ្ឈប់កុំឲ្យកើតមានក្រុមកុងត្រូលជជុះនៅតាមដងផ្លូវ ដើម្បីអនុវត្តបទបញ្ជារបស់រាជរដ្ឋាភិបាល ឲ្យមានប្រសិទ្ធភាព៖ «គួរតែមានវិធានការណាមួយ ដែលរឹតបន្តឹងសម្រាប់ឲ្យអ្នកធ្វើចរាចរ គោរពច្បាប់ គួរតែមានវិធីផ្សេងពីនេះ ដើម្បីចៀសវាងការមានទស្សនៈមិនល្អចំពោះសម្រាប់សមត្ថកិច្ចយើង»។
ចំណែកអ្នកឃ្លាំមើលសិទ្ធិមនុស្សសមាគមអាដហុក ខេត្តស្ទឹងត្រែង លោក ហូ សំអុល បានចាត់ទុកក្រុមសមត្ថកិច្ចដាក់ប៉ុស្តិ៍ត្រួតពិនិត្យខុសច្បាប់ថា ជាក្រុមពុករលួយ និងរំលោភទៅលើសិទ្ធិប្រជាពលរដ្ឋអ្នកដំណើរ។
លោកបន្តថា កុងត្រូលជជុះកើតមានច្រើនទីតាំងតាមផ្លូវជាតិពីខេត្តស្ទឹងត្រែង ទៅក្រុងភ្នំពេញ និងពីខេត្តស្ទឹងត្រែង ទៅព្រំដែនប្រទេសឡាវ តាមផ្លូវជាតិលេខ៧៖ «ធ្លាប់ដឹងដែរ ខ្ញុំធ្វើដំណើរតាមផ្លូវហ្នឹងអ៊ីចឹងមែន ទោះបីឡានតាក់ស៊ីពួកគាត់មិនមានដឹកស្អី ក៏គេហៅគាត់ឈប់ដើម្បីឆែកមើលអ៊ីចឹង។ ដល់ពេលធ្វើអ៊ីចឹង វាអាចស្ទះការធ្វើដំណើរពួកគាត់។ តាមប្រសាសន៍សម្ដេច ហ៊ុន សែន គាត់តែងនិយាយរឿងៗដែរអារឿងហ្នឹង បំបាត់កុងត្រូលជជុះ វាប៉ះពាល់ធ្ងន់ធ្ងរតែម្តង។ ខ្ញុំតែងតែឮប្រជាពលរដ្ឋអ្នករត់តាក់ស៊ី គាត់និយាយអ៊ីចឹងដែរ»។
ស្ទើរគ្រប់ស្ថានីយវិទ្យុ ទូរទស្សន៍ជាតិ និងឯកជន តែងតែផ្សាយរំលឹកដាស់តឿនដល់មន្ត្រីអាជ្ញាធរគ្រប់ខេត្តក្រុង ពីប្រសាសន៍ណែនាំ រួមទាំងបទបញ្ជាមិនឲ្យមានកុងត្រូលជជុះ និងការព្រមានដកមុខតំណែងមន្ត្រីអភិបាលខេត្តក្រុងណា ដែលភ្លេចពាក្យស្លោកឲ្យមើលផ្លូវរបស់ប្រមុខរាជរដ្ឋាភិបាលច្រើនឆ្នាំកន្លងទៅនេះ៕
No comments:
Post a Comment
yes