ភ្នំពេញ ៖ មានក្រុមហ៊ុនធំៗ មិនតិចជាង ១០ ដែលកំពុងសំរុកដឹកទំនិញគេចពន្ធ ហើយសុទ្ធតែជាប្រភេទំនិញបង់ពន្ធខ្ពស់ឆ្លងកាត់តាមច្រកកែវផុស ហើយការដឹកជញ្ជូននេះ ឈ្មួញសុទ្ធតែប្រើប្រាស់ប្រភេទឡានយីឌុបធំៗ យ៉ាងទាបចាប់ពី ឡានចំណុះ៥តោនឡើងលើ ដែលការសំរុកហូរចូលទំនិញគេចពន្ធ បានក្លាយទៅជាប្រភពចំណូលដ៏ខ្លាំងក្លា ដែលគេហៅថាប្រាក់អំពើពុករលួយរបស់លោក ថោង សុខាំភូ មេគយច្រកកែវផុសកំពុងទទួលបានដោយមិនព្រួយបារម្ភពីការបាត់បង់តំណែង បន្ទាប់ពីអង្គភាពប្រឆាំងអំពើពុករលួយកំពុងមាន វិធានការលុបបំបាត់បញ្ហាទាំងនេះ ហើយអគ្គនាយកគយ ក៏ធ្លាប់បានណែនាំផងដែរឱ្យ សមត្ថកិច្ចគយនៅខេត្ដព្រះសីហនុ ត្រូវតែមានវិធានការតឹងតែងទប់ស្កាត់ រាល់សកម្មភាពទំនិញគេចពន្ធទាំងនោះដើម្បីបង្កើនចំណូលថវិកាជាតិ។
ប៉ុន្ដែសម្រាប់ច្រកកែវផុសមានក្រុមហ៊ុនមិនតិចជាង១០ ដែលបានឃុបឃិតគ្នាជាមួយលោក ថោង សុខាំភូ ដែលជាប្រធានការិយាល័យគយនៅទីនោះ ដឹកទំនិញមកពីប្រទេសថៃ ឆ្លងកាត់ច្រកនេះ ឡើងតាមបណ្ដោយផ្លូវជាតិលេខ៤ ក្នុងមួយថ្ងៃៗរាប់សិបឡាន ហើយឈ្មួញទាំងនោះរួមមាន ១-ចែរ៉ា គាត់គឺជាឈ្មួញដែលដឹកទំនិញប្រភេទ គ្រឿងសំណង់ ក៏ដូចជាទំនិញ ចំរុះជាច្រើនមុខទៀត ហើយប្រើប្រាស់សុទ្ធតែប្រភេទឡានយីឌុប ដែលគ្មានស្លាកលេខដោយផ្ទុកលើសទម្ងន់ ទោះជាមានស្ថានីយ៍ជញ្ជីងថ្លឹងរថយន្ដនៅតាមបណ្ដោយផ្លូវ ជាតិលេខ៤ ប៉ុន្ដែបើសមត្ថកិច្ចទាំងនោះដឹងថា ទំនិញនេះជារបស់ ចែរ៉ា គឺមិនអាចទៅប៉ះ ពាល់បានទេ ហើយការដឹកជញ្ជូនទមនិញរបស់គាត់ក្នុងមួយថ្ងៃមិនតិចជាង ពី២ទៅ៣ឡានយីឌុប ។
ទី២-ក្រុមហ៊ុន LK គឺដឹកជញ្ជូនទំនិញប្រភេទគ្រឿងសំណង់គ្រឿងទេសចម្រុះ ប្រហាក់ប្រហែលគ្នាទៅនឹងចែរ៉ា ហើយការដឹកជញ្ជូននេះ គេទទួលស្គាល់ថាមានការបង់ពន្ធនាំចូលមួយចំនួនប្រភេទទំនិញគ្រឿងសំណង់ ប៉ុន្ដែការឃុបឃិតជាមួយលោក ថោង សុខាំភូ ក៏មានករណីបង្កប់នូវទំនិញគេចពន្ធជាច្រើនប្រភេទ។ រាល់ការដឹកជញ្ជូន ទំនិញមិនប្រក្រតីបែបនេះ គេដឹងថាក្រុមហ៊ុន LK មិនត្រឹមតែមានទំនាក់ទំនងល្អជា មួយលោក ថោង សុខាំភូ ដែលជា មេគយច្រកកែវផុសប៉ុណ្ណោះទេ គឺគាត់ក៏មានទំនាក់ទំនងល្អជាមួយ មេគយចល័ត និងនៅអគ្គនាយកដ្ឋានគយ និងរដ្ឋាករ ទើបការដឹកជញ្ជូនរបស់ក្រុមហ៊ុននេះក៏ប្រើប្រភេទឡានយីឌុប។
ទី៣-លោក កូ ជាឈ្មួញដែលដឹកជញ្ជូនប្រភេទគ្រឿងអគ្គិសនី គ្រឿងបន្លាស់រថយន្ដ កង់រថយន្ដ មានករណីគេចពន្ធច្រើនជាងការបង់ពន្ធ ហើយលោក ថោង សុខាំភូ តែងតែផ្ដល់ឱកាសឱ្យលោក កូ ដឹកជញ្ជូនសុទ្ធតែប្រភេទឡាន កូរ៉េ៥តោនយីឌុប កើតមានស្ទើរតែរាល់ថ្ងៃ ចំណែកឯមន្ដ្រីគយដែលមានតួនាទីពិនិត្យទៅលើការហូរចូលទំនិញនៅច្រកកែវផុសនេះ ទោះជាដឹងថា មានករណីគេចពន្ធក៏មិនអាចធ្វើការបង្ក្រាប ដោយសារតែលោក ថោង សុខាំភូ ធ្លាប់ទទួលបានលាភសក្ការៈពីការដឹកជញ្ជូនរបស់ឈ្មួញ កូ ។
ទី៤-តា ឈីម ពេលដែលគាត់ដឹកជញ្ជូនទំនិញគេចពន្ធ ដែលជាប្រភេទទំនិញចម្រុះ មានទាំងទំនិញចាប់ហួយ គ្រឿងសំណង់ គ្រឿងអគ្គិសនី គាត់បានប្រើប្រាស់ប្រភេទឡានកូរ៉េ២តោន និងឡានប្រភេទយីឌុបធំៗ ដែលមានស្លាក សញ្ញា HM ហើយការដឹកជញ្ជូននេះសុទ្ធតែផ្ទុកលើសទម្ងន់។ ប៉ុន្ដែសមត្ថកិច្ចជាច្រើនស្ថាប័នដែលមាននៅច្រកកែវផុស ក៏ដូចជាសមត្ថកិច្ចនៅក្នុងខេត្ដព្រះសីហនុ សុទ្ធតែត្រូវបានឈ្មួញរូបនេះចាត់ចែងដើម្បីបិទបាំងអំពើគេចពន្ធរបស់ខ្លួន ក្នុងនោះមានតែលោក ថោង សុខាំភូ ដែលបានទទួលប្រយោជន៍ក្នុងកម្រិតខ្ពស់ជាងគេ ចំពោះការដឹកជញ្ជូនទំនិញមិនប្រក្រតីនេះ ។
ទី៥-ចែវី គាត់បានដឹកជញ្ជូនទំនិញឆ្លងកាត់កែវផុសនេះ មកពីប្រទេសថៃ សុទ្ធតែប្រភេទបង់ពន្ធនាំចូលខ្ពស់ ហើយពេលទូករបស់គាត់ចូលមកដល់ចំណុចច្រកនេះ គេតែងតែឃើញឡានយីឌុបសុទ្ធតែគ្មានស្លាក លេខចាំដឹកជញ្ជូនមកកាន់រាជធានីភ្នំពេញ ក្នុងនោះសូម្បីតែអ្នកបើកបររថយន្ដយីឌុបដឹកទំនិញ ឱ្យ ចែវី ជាក្រុមអង្គរក្ស ក៏ដូចជា ក្រុមយោធា ដែលគេចាត់ទុកថា ចែវី មានទំនាក់ទំនងល្អណាស់ ជាមួយមេគយខាងលើ បន្ទាប់ពីមានការឃុបឃិតគ្នាជាមួយលោក ថោង សុខាំភូ ។
ទី៦-ចែហ្វុង ឈ្មួញរូបនេះមិនត្រឹមតែដឹកទំនិញគេចពន្ធឆ្លងកាត់ច្រកកែវផុសប៉ុណ្ណោះទេ គាត់ថែមទាំងប្រើប្រាស់រថយន្ដយីឌុប ជាច្រើនគ្រឿងទៀតដឹកទំនិញគេចពន្ធចេញមកពីខេត្ដព្រះសីហនុ ដូច្នេះសមត្ថកិច្ចដែលមាននៅតាមបណ្ដោយផ្លូវជាតិលេខ៤ រហូត មកដល់រាជធានីភ្នំពេញ សុទ្ធតែធ្លាប់បានទទួលការផ្ដល់ពីចែហ្វុង ជាច្រើនឆ្នាំមកហើយ គឺគេពុំដែលឃើញសមត្ថកិច្ច កងកម្លាំងប្រដាប់អាវុធមាត់ច្រក ក៏ដូចជាក្រុមគយចល័ត មិនដែលបានបង្ក្រាបរាល់ការដឹកជញ្ជូនទំនិញរបស់ ចែហ្វុង នោះឡើយ ។
ទី៧-តានី គាត់គឺជាឈ្មួញ ដែលបានដឹកជញ្ជូនប្រភេទគ្រឿងទេសចម្រុះ ចេញពីខេត្ដព្រះសីហនុ និងពីច្រកកែវផុស បើទោះបីជា តានី គាត់ប្រើប្រាស់ប្រភេទឡានកូរ៉េមួយតោនកន្លះ ទៅពីរតោនកន្លះ ប៉ុន្ដែការដឹកជញ្ជូនរបស់ គាត់មានចំនួនច្រើន ដោយសារតែគាត់ដឹកជាប្រចាំរាល់ថ្ងៃ ហើយលោក ថោង សុខាំភូ បានស្គាល់អំពីប្រវត្ដិតានី ច្បាស់ណាស់ ព្រោះកន្លងមកតានី ក៏ធ្លាប់មានប្រវត្ដិជូរចត់នៅពេលដែលក្រុមគយចល័ត ក៏ដូចជាលោក ថោង សុខាំភូ បង្ក្រាប ដែលជាការគំរាមរបៀបគោះទឹកបង្អើលត្រី។ មានក្រុមហ៊ុនជាច្រើនទៀតដែល គេរាយការណ៍មកថា លោក ថោង សុខាំភូ មេគយច្រកកែវផុសអនុញ្ញាតឱ្យដឹកជញ្ជូនទំនិញគេចពន្ធឆ្លងកាត់ ប៉ុន្ដែរាល់ការទទួលផល ប្រយោជន៍ពីក្រុមឈ្មួញទាំងនោះ គេទទួលស្គាល់ថា មិនមែនតែលោក ថោង សុខាំភូ អត្ដនោម័តដោយខ្លួនឯង នោះឡើយ អាចមានជាប់ពាក់ព័ន្ធទៅនឹងមេគយធំៗដទៃទៀត៕
No comments:
Post a Comment
yes