ខេត្តព្រះសីហនុ ៖ គេនៅតែអះអាងថាទំនិញ ជាច្រើនប្រភេទដែលនាំមកពីប្រទេសថៃឆ្លងចូលកម្ពុជាតាមខេត្ដកោះកុង ខេត្ដព្រះសីហនុនិងខេត្ដកំពត យ៉ាងច្រើនសន្ធឹកសន្ធាប់នោះ មានទំនិញជាង៥០ ភាគរយ មិនបានបង់ពន្ធនាំចូលដោយសារតែមានការឃុបឃិតគ្នារវាងឈ្មួញនិងក្រុមសមត្ថកិច្ចជាច្រើនស្ថាប័ន ដែលក្នុងនោះអង្គភាពនគរបាលប្រឆាំងបទល្មើសលើផ្ទៃសមុទ្រ ដែលមានទីតាំងតាមបណ្តោយទំនប់កោះព្រាប ស្ថិតនៅក្នុងសង្កាត់លេខ១ ក្រុងព្រះសីហនុក្រោមការគ្រប់គ្រងរបស់លោក តេង សួន ជាប្រធាននាយកដ្ឋានព្រំដែនទឹក ច្រើនតែបង្ក្រាបទៅលើការដឹកជញ្ជូនទំនិញរបស់ឈ្មួញតូចតាចប៉ុណ្ណោះ ដូចជាការដឹកសាច់មាន់ឆ្អឹងមាន់ ជង្គង់មាន់ ដោយឡែកបទល្មើសធំៗដែលដឹកទាំងទូកនិងកប៉ាល់សមត្ថកិច្ច ហាក់ដូចជាមិនបានគិតគូរទប់ស្កាត់លើបញ្ហាទាំងអស់នេះដើម្បីរួមចំណែកក្នុងការប្រមូលពន្ធជូនរដ្ឋនោះទេ។
សេចក្តីរាយការណ៍ព័ត៌មានបានឲ្យដឹងថា បទល្មើសនៃការដឹកជញ្ជូនទំនិញគេចពន្ធមានចំនួនច្រើនដែលក្រុមឈ្មួញបានទំនាក់ទំនងជាមួយ អង្គភាពនគរបាលប្រឆាំងបទល្មើសលើផ្ទៃសមុទ្រ ព្រោះគេបានឃើញយ៉ាងច្បាស់ចំពោះករណី ដែលក្រុមនគរបាលទាំងនោះចេញល្បាត នៅតាមផ្ទៃសមុទ្រហើយនាំគ្នាប្រមូលលុយពីឈ្មួញដឹកជញ្ជូនទំនិញខុសច្បាប់ និងទៅប្រមូលប្រាក់ពីទូករបស់ជនជាតិថៃ និងវៀតណាមដែលចូលមកនេសាទនៅលើដែនសមុទ្រកម្ពុជាផងដែរ។ ការនេសាទល្មើសច្បាប់របស់ឈ្មួញថៃនិងវៀតណាមសុទ្ធតែប្រើប្រាស់នូវប្រភេទឧបករណ៍ល្មើសច្បាប់ដោយមានការបើកដៃ ពីក្រុមនគរបាលប្រឆាំងបទល្មើសលើផ្ទៃសមុទ្ររាប់សិបឆ្នាំមកហើយ។
ចំណុចទាំងនេះមិនមែនសំដៅថា សមត្ថកិច្ចរបស់កម្ពុជាពុំមានលទ្ធភាពដើម្បីប្រើទូកឬក៏អាវុធបង្ក្រាបទៅលើការនេសាទល្មើសច្បាប់ទាំងនោះទេ ប៉ុន្ដែបញ្ហាទាំងអស់នេះវាបានកើតឡើងដោយសារតែក្រុមសមត្ថកិច្ច និងជំនាញជលផល រួមទាំងក្រុមនគរបាលប្រឆាំងបទល្មើសលើផ្ទៃសមុទ្រមានភាពធូររលុងពាក់ព័ន្ធទៅនឹងបញ្ហាពុករលួយយកលុយពីការនេសាទល្មើសច្បាប់ របស់ជនជាតិថៃនិងវៀតណាម។ មានទំនិញជាច្រើនដែលចេញមកពីចំណុចកំពង់ផែខ្លងស៊ុន ប្រទេសថៃត្រូវបានគេដឹកជញ្ជូនចូលទឹកដីខេត្ដកោះកុង ខេត្ដព្រះសីហនុ ចូលតាមកំពង់ផែឧកញ៉ាម៉ុង ដែលមានក្រុមហ៊ុនរបស់លោក ឡុង ម៉េង សម្រាប់ដឹកជញ្ជូនទំនិញគេចពន្ធទាំងនោះក្នុងមួយថ្ងៃៗ រាប់សិបឡានយីឌុប។ ដូច្នេះចំណូលថវិកាជាតិដែលត្រូវបាត់បង់ទៅលើការបង់ពន្ធនាំចូលមានច្រើនសន្ធឹកសន្ធាប់ ដែលថ្នាក់លើនិង អង្គភាពប្រឆាំងអំពើពុករលួយត្រូវតែត្រួតពិនិត្យជាបន្ទាន់ផងដែរ ថាតើសមត្ថកិច្ចណាខ្លះដែលបានពាក់ព័ន្ធនឹងបទល្មើសគេចពន្ធ?
លោក តេង សួន ដែលក្តោបក្តាប់អង្គភាពនគរបាលបង្ក្រាបបទល្មើសលើផ្ទៃសមុទ្រ គឺជាអ្នកក្ដោបយ៉ាងណែនទៅលើស្ថិតិនៃបទល្មើសទាំងនោះ ប៉ុន្ដែអាចមានចំណុចខ្សោយខ្លះ ដែលលោក តេង សួន ធ្វើមិនដឹងមិនឮពីករណីមន្ត្រីក្រោមឱវាទដែលពាក់ព័ន្ធទៅនឹងការទទួលផលពីក្រុមឈ្មួញល្មើសច្បាប់ទាំងតូចទាំងធំ ដែលមានការចាត់តាំងឱ្យមន្ដ្រីដែលចេញល្បាតតាមផ្ទៃសមុទ្រនោះដើរប្រមូលប្រាក់ពីក្រុមឈ្មួញយ៉ាងអនាធិបតេយ្យ និងមួយចំនួនទៀតគឺដាក់ខែសម្រាប់អង្គភាពនេះ ។ នៅលើផ្ទៃសមុទ្រ គេបានឃើញសមត្ថកិច្ចជាច្រើនស្ថាប័ន ប៉ុន្ដែមន្ត្រីទាំងនោះមិនត្រូវបានគេអះអាងថាសហការគ្នាដើម្បីទប់ស្កាត់បទល្មើសទាំងនោះទេ ឃើញតែដណ្ដើមប្រយោជន៍គ្នាយកទៅធ្វើមានធ្វើបានរៀងៗខ្លួន។ កត្ដាទាំងអស់នេះហើយដែលធ្វើឱ្យបទល្មើសកើនឡើងជាលំដាប់ ហើយបាត់បង់ចំណូលពន្ធនាំចូលយ៉ាងច្រើនក្នុងមួយខែៗ។
ការបង្ក្រាបទៅលើទំនិញគេចពន្ធ ឬទំនិញខុសច្បាប់មួយចំនួនកន្លងមកដោយសមត្ថកិច្ចនៅខេត្ដកោះកុង និងខេត្ដព្រះសីហនុ ធ្វើឡើងដោយសារតែក្រុមឈ្មួញទាំងនោះមិនបានបង់ប្រាក់ដល់សមត្ថកិច្ចតែប៉ុណ្ណោះ ។ ប្រធានអង្គភាពនគរបាលបង្ក្រាបបទល្មើសលើផ្ទៃសមុទ្រ អាចពាក់ព័ន្ធទៅនឹងអំពើពុករលួយតាមរយៈការចាត់តាំងមន្ដ្រីនគរបាលអង្គភាពនេះឲ្យល្បាតលើផ្ទៃសមុទ្រ ហើយការចុះល្បាតសព្វដងច្រើនតែមានសកម្មភាព ប្រមូលប្រាក់ពីក្រុមឈ្មួញដឹកជញ្ជូនទំនិញគេចពន្ធតែប៉ុណ្ណោះនិងករណីឈ្មួញជាច្រើនទៀតបើទោះជាមិនបង្ក្រាបប៉ុន្ដែសុទ្ធតែមានការបង់ប្រាក់ជាប្រចាំខែ។
សកម្មភាពបទល្មើសនៃទំនិញគេចពន្ធដែលហូរចូលតាមផ្ទៃសមុទ្រមកប្រទេសកម្ពុជា គេក៏បានឃើញក្នុងមួយថ្ងៃៗប្រភេទឡានយីឌុបដឹកទំនិញមកពីកំពង់ផែឧកញ៉ាម៉ុងដ៏ច្រើនបំផុត។ ដូចជាករណីដឹកជញ្ជូនទំនិញរបស់ក្រុមហ៊ុនចំនួនពីរ ដែលដឹកជញ្ជូនស្ទើរតែផ្ដាច់មុខទៅលើទំនិញគេចពន្ធទាំងនោះ ទី១-គឺក្រុមហ៊ុនឡុងម៉េង និងទី២-ជារបស់លោក ហាក់ ម៉ៅ ដែលជាមេបញ្ជាការរងកងពលតូចលេខ៧០ដែលឈ្មួញទាំងពីរនាក់នេះគឺជា ជើងខ្លាំងយូរឆ្នាំមកហើយ គ្មាននរណាហ៊ានប៉ះពាល់ទេ៕
No comments:
Post a Comment
yes