ក្រុមគ្រូបង្រៀនប្រមាណជាង២រយនាក់ដឹកនាំដោយលោក រ៉ុង ឈុន នៅព្រឹកថ្ងៃសុក្រនេះ បានធ្វើការជួបប្រជុំគ្នានៅលើសួនប្រជាធិបតេយ្យក្បែរវត្តភ្នំ ដើម្បីប្រារព្ធទិវាគ្រូបង្រៀនពិភពលោក ដោយមានទាំងការដង្ហែញត្តិដោយតំណាង១៥នាក់ដាក់ទៅក្រសួងអប់រំ ខុទ្ទកាល័យនាយករដ្ឋមន្រ្តី និងរដ្ឋសភាផងដែរ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានឲ្យដឹងថា ញត្តិដែលបានដាក់ទៅកាន់រដ្ឋាភិបាល រដ្ឋសភា និងស្ថាប័នពាក់ព័ន្ធ ក៏មានការទាមទារឲ្យតម្លើងប្រាក់ខែដល់គ្រូបង្រៀនឲ្យបាន១លានរៀល ស្មើនឹង២៥០ដុល្លារអាមេរិក តម្លើងប្រាក់អតីតភាពការងារ និងតម្លើងប្រាក់ថែមម៉ោងផងដែរ។ ព្រោះថា ប្រាក់ខែគ្រូបង្រៀនបច្ចុប្បន្ននៅបឋមសិក្សាគឺចាប់ពីចំនួន ២៤ម៉ឺនរៀល ស្មើនឹង៦០ដុល្លារអាមេរិក ហើយសម្រាប់គ្រូបង្រៀនអនុវិទ្យាល័យបានចំនួន៣០ម៉ឺនរៀលស្មើនឹង៨០ដុល្លារ ចំណែកគ្រូវិទ្យាល័យបានចំនួន៤៤ម៉ឺនដែលប្រហាក់ប្រហែលនឹង១១០ដុល្លារប៉ុណ្ណោះ។
សូមបញ្ជាក់ថា ទិវាគ្រូបង្រៀនពិភពលោកដែលរៀបចំធ្វើឡើងដោយសមាគមគ្រូបង្រៀនកម្ពុជាឯករាជ្យក្នុងឆ្នាំនេះ ត្រូវបានធ្វើឡើងក្រោមប្រធាន «យើងប្រកាន់ជំហរ ដើម្បីគ្រូបង្រៀន» ដើម្បីទាក់ទាញការយកចិត្តទុកដាក់ពីរដ្ឋាភិបាលកម្ពុជា និងសាធារណៈជន ចំពោះតួនាទីដ៏សំខាន់របស់គ្រូបង្រៀននៅទូទាំងប្រទេសកម្ពុជា និងសារៈសំខាន់ក្នុងការកសាងអនាគតដ៏ល្អប្រសើរ៕
No comments:
Post a Comment
yes