លោក សម រង្ស៊ី ដែលទើបក្លាយជាប្រធានគណបក្សសង្រ្គោះជាតិ និងលោក កឹម សុខា ប្រធានគណបក្សសិទ្ធិមនុស្ស នឹងជួបគ្នានៅចុងសប្តាហ៍នេះឯប្រទេសអូស្រ្តាលី ដើម្បីពិភាក្សាអំពីរចនាសម្ព័ន្ធគណបក្សសង្រ្គោះជាតិដែលទើបបង្កើតថ្មី ព្រមទាំងរកមធ្យោបាយឲ្យលោក សម រង្ស៊ី បានចូលស្រុកវិញ។ នេះបើតាមការអះអាងរបស់មន្រ្តីជាន់ខ្ពស់គណបក្សសមរង្ស៊ី។
លោក សម រង្ស៊ី និងលោក កឹម សុខា
តាមមន្រ្តីរូបនោះ កំឡុងស្ថិតនៅប្រទេសអូស្រ្តាលី ប្រធានគណបក្សប្រឆាំងទាំងពីររូបនេះ ក៏នឹងទៅជួបមន្រ្តីជាន់ខ្ពស់របស់រដ្ឋាភិបាលអូស្រ្តាលីផងដែរ ដើម្បីជំរុញឲ្យមានការដោះស្រាយជួយឲ្យលោក សម រង្ស៊ី បានវិលចូលប្រទេសវិញ និងធ្វើឲ្យមានការបោះឆ្នោតដោយសេរី យុត្តិធម៌ ក្នុងប្រទេសកម្ពុជា តាមរយៈធ្វើកំណែទម្រង់គណៈកម្មាធិការជាតិរៀបចំការបោះឆ្នោត។
សូមបញ្ជាក់ថា លោក សម រង្ស៊ី ត្រូវបានតុលាការប្រទេសកម្ពុជាកាត់ទោសឲ្យជាប់ពន្ធនាគាររយៈពេលជាង១០ឆ្នាំចំពោះទោសដកតម្រុយបង្គោលព្រំដែនកម្ពុជា-វៀតណាមក្នុងខេត្តស្វាយរៀង ដែលបានបោះចូលក្នុងដីស្រែប្រជាកសិករខ្មែរ។
លោក ប៉ុល ហំ អនុប្រធានគណៈកម្មការបណ្តោះអាសន្ន នៃគណបក្សសង្រ្គោះជាតិបាននិយាយថា ករណីលោក សម រង្ស៊ី គឺជាករណីនយោបាយ ដូច្នេះគណបក្សប្រជាជនកម្ពុជាដែលកំពុងកាន់អំណាច ត្រូវតែពិភាក្សាជាមួយនឹងគណបក្សសង្រ្គោះជាតិដោះស្រាយបញ្ហានេះ ហើយអនុញ្ញាតឲ្យលោក សម រង្ស៊ី បានវិលមកចូលរួមប្រកួតប្រជែងនៅក្នុងការបោះឆ្នោតឆ្នាំ២០១៣ខាងមុខបានដោយសេរី។ លោក ប៉ុល ហំ បន្តថា បើគ្មានការអនុញ្ញាតឲ្យលោក សម រង្ស៊ី បានចូលរួមបោះឆ្នោតទេ នោះលោកនាយករដ្ឋមន្រ្តី ហ៊ុន សែន នឹងឡើងលើសង្វៀនប្រកួតតែម្នាក់ឯងជាមួយនឹងអាជ្ញាកណ្តាលប៉ុណ្ណោះ ដូច្នេះការប្រកួតនោះគឺអត់មានន័យ។
តែសម្រាប់លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្រ្តីវិញ គ្មាននរណាហាមឃាត់លោក សម រង្ស៊ី មិនឲ្យវិលចូលប្រទេសទេ, ប៉ុន្តែនៅពេលដែលគាត់មក ទ្វារគុកក៏បើករង់ចាំគាត់ដែរ៕
No comments:
Post a Comment
yes