កំពង់ធំ ៖ យោងសេចក្តីរាយការណ៍ កាលពីយប់ថ្ងៃទី ៤ ខែ តុលា ឆ្នាំ ២០១២ នៅចំណុចភូមិ តាប្រុក ឃុំបល្ល័ង្គ ស្រុកបារាយណ៍ ខេត្តកំពង់ធំ មានករណីជំរិតទារលុយពីរថយន្តដឹកខ្ចៅ ដែលដឹកពីខេត្តសៀមរាប ទៅខេត្តកំពង់ចាម។
ប្រភពព័ត៌មានបានឲ្យដឹងថា កាលពីវេលាម៉ោង ៩ រហូតដល់ម៉ោង ១០.៣០នាទី មានកំលាំងអាវុធហត្ថស្នាក់ការ១០២ បានដាក់កុងត្រូលកាក់រថយន្តដឹកខ្ចៅ ក្រោមការបញ្ជារបស់លោក ជិន ស៊ីថា នាយសង្កាត់ រដ្ឋបាលជលផលបារាយណ៍ អស់រយៈពេល ១ម៉ោងកន្លះមិនព្រមឲ្យរថយន្តបើកចេញនោះទេ ហើយបានជំរិតទារលុយ ៧លានរៀល ដោយអះអាងថា ជាមុខរបរខុសច្បាប់ ហើយពីមុនមកធ្លាប់បានឲ្យចាយ តែមកមួយរយះនេះ ថៅកែខ្ចៅមិនព្រមគិតគូរ ទើបលោក ជិន ស៊ីថា ប្រើធម៌ក្តៅបែបនេះ។
ចែសុខ ជាម្ចាស់ខ្ចៅ បានឲ្យដឹងថា លោកជិន ស៊ីថា បានជំរិតទារលុយពីកូនចៅរបស់គាត់ នៅចំណុចភូមិតាប្រុក តែគាត់មិនបានឲ្យលុយកូនចៅមកជាមួយ ហើយក៏សុំត្រឹមតែ៧០ម៉ឺនរៀល និងសុំឲ្យលោក ជិន ស៊ីថា នាយសង្កាត់រដ្ឋបាលជលផលបារាយណ៍ ឲ្យរថយន្តរបស់គាត់ទៅសិនចុះ ក្រោយមករថយន្តក៏បានបន្តដំណើរទៅមុខទៀត។ លុះព្រឹកឡើងលោក ជិនស៊ីថា បានទូរស័ព្ទមកគំរាមឲ្យចែសុខបង់លុយ ៧ លានរៀល បើចង់រកស៊ីផ្លូវនេះទៀត។ តែចែសុខ បានអះអាងថា គាត់មិនព្រមបង់លុយឲ្យជាដាច់ខាត ព្រោះមុខរបររបស់គាត់ មិនមែនជាមុខរបរខុសច្បាប់នោះទេ។ ប្រភពបានឲ្យដឹងថា លោកជិន ស៊ីថា ក៏បាននិយាយថាបើចែសុខមិនព្រមបង់លុយ៧លានរៀល សំរាប់ទិញផ្លូវរកស៊ីទេ កុំសង្ឃឹមថា នឹងរកស៊ីដឹកខ្ចៅ ឬលៀសតាមផ្លូវនេះទៀត។
លោក ជិន ស៊ីថា នាយសង្កាត់បានឲ្យដឹងថា លោកមិនបានទារលុយដល់ទៅ ៧ លានរៀលនោះទេ តែដោយយល់ថា កំលាំងកងរាជអាវុធហត្ថចុះធ្វើការជាមួយ ក៏សុំឲ្យបង់លុយថ្លៃបាយទឹក ហើយការចុះស្ទាក់ជំរិតទារលុយ៧ លានរៀលនោះ គឺជាការបំភ្លើស ព្រោះរូបគាត់ចុះមកធ្វើការនេះ ក៏បានសុំយោបល់ លោកប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំ ហើយលោកបានបន្តថា លោកគ្រាន់តែបានលុយកាក់ ចំនួនបន្តិចបន្តួចតែប៉ុណ្ណោះ រីឯការជំរិតទារលុយ ៧ លានរៀល លោកមិនបានដឹងទេ។
លោក ប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំ បានឲ្យដឹងថា លោកមិនបានដឹងទាល់តែសោះ ព្រោះលោករវល់ចុះទៅបបង្ក្រាបបទល្មើសនៅឃុំផាត់សណ្តាយ ចំនួន ២ថ្ងៃ ហើយលោកទើបតែវិល ត្រឡប់មកវិញនៅរសៀលថ្ងៃនេះឯង ។
លោក ឃុន ប៊ុនហួរ មេបញ្ជាការកងរាជអាវុធហត្ថស្រុកបារាយណ៍ បានឲ្យដឹងថា លោកមិន ដែលមានគោលការណ៍ ឲ្យមន្ត្រីក្រោមឱវាទទៅពាក់ព័ន្ធនិងបងប្អូនដែលប្រកបមុខរបរ លក់ខ្ចៅ ខ្យងនោះទេ ព្រោះជាមុខរបរសត្វអត់ឈាម និងហាមដាច់ខាតមិនឲ្យមានការពាក់ព័ន្ធនោះទេ តែនៅយប់ថ្ងៃកើតហេតុ លោក ជិន ស៊ីថា បានមកតែម្នាក់ឯង ហើយសុំកំលាំងគាត់ឲ្យជួយឃាត់រថយន្តដឹកលៀស។ ចំណែកលុយ កាក់គឺលោក ជិន ស៊ីថា ដោះស្រាយដោយវិធីណានោះ កូនចៅរបស់លោកមិនបានដឹងទេ ហើយកូនចៅរបស់លោកបានទទួលលុយថ្លៃពលកម្មត្រឹមតែ ៣០.០០០រៀលប៉ុណ្ណោះ៕
No comments:
Post a Comment
yes