ប្រជាសហគមន៍ នៃបណ្តាញព្រៃឡង់ទាំង៤ខេត្ត គឺខេត្តក្រចេះ ស្ទឹងត្រែង ព្រះវិហារ និងកំពង់ធំ ព្រមទាំងអង្គការមិត្តព្រៃឈើបានប្រកាសថា ពេលនេះពួកគេកំពុងតាមឃ្លាំមើលការលុបចោលដីសម្បទានសេដ្ឋកិច្ចក្នុងព្រៃឡង់របស់រដ្ឋាភិបាល។
តាមសេចក្តីប្រកាសព័ត៌មានរួមរបស់បណ្តាញសហគមន៍ព្រៃឡង់ និងមិត្តព្រៃឈើឲ្យដឹងថា ពួកគេស្វាគមន៍ការសម្រេចរបស់រដ្ឋាភិបាលក្នុងការលុបចោលសម្បទានដីសេដ្ឋកិច្ចក្នុងតំបន់ព្រៃឡង់ដល់ក្រុមហ៊ុនប្រមាណ២០កាលពីពេលថ្មីៗកន្លងមកនេះ។ ប៉ុន្តែពួកគេនៅតែមានការព្រួយបារម្ភចំពោះការកាប់បំផ្លាញព្រៃឈើខុសច្បាប់ដែលកំពុងរីករាលដាល និងបន្តការផ្តល់សម្បទានផ្សេងទៀតដែលបំផ្លិចបំផ្លាញនៅក្នុងតំបន់ព្រៃស្រោង។
ប៉ុន្តែទោះជាយ៉ាងណាក៏ដោយ បើតាមបណ្តាញព្រៃឡង់ទាំង៤ខេត្ត និងមិត្តព្រៃឈើ គេមិនទាន់ឃើញក្រុមហ៊ុនសម្បទានសេដ្ឋកិច្ចក្នុងតំបន់ព្រៃឡង់ណាមួយត្រូវបានដកចេញ និងបញ្ឈប់សកម្មភាពរបស់ខ្លួនឡើយ បន្ទាប់ពីមានការសម្រេចរបស់ទីស្តីការគណៈរដ្ឋមន្រ្តីកាលពីថ្ងៃទី២៨ ខែកញ្ញា ឆ្នាំ២០១២ដកហូតដីសម្បទានសេដ្ឋកិច្ចក្នុងតំបន់ព្រៃឡង់មកនោះ។
ក្រុមហ៊ុនដែលកំពុងធ្វើអាជីវកម្មក្នុងតំបន់ព្រៃឡង់បច្ចុប្បន្ននេះ ត្រូវតំណាងសហគមន៍ព្រៃឡង់រៀបរាប់ថា មាន ក្រុមហ៊ុន C R C K Rubber Development Co., Ltd. I (ស្រុកសណា្តន់ខេត្តកំពង់ធំ ), Heam Kok Ham Co.,Ltd (ស្រុកសណា្តន់ខេត្តកំពង់ធំ), Chhun Hong Rubber Better (ស្រុកសំបូរខេត្តក្រចេះ), C X P B Development(ស្រុកសំបូរខេត្តក្រចេះ), Timas Resources (កំពង់ធំ និងខេត្តក្រចេះ), P N T Co, Ltd (ព្រះវិហារ), Thy Nga Development and Investment Co., Ltd (កំពង់ធំ និងព្រះវិហារ), Heng You (Cambodia) Company Limited (ព្រះវិហារ), Heng Ruy (Cambodia) International Company Limited (ព្រះវិហារ), Heng Nong(Cambodia) Company Limited (ព្រះវិហារ), Teng Saravuth Campany (កំពង់ធំ), Sok Somnang Development Company។
ជាមួយគ្នាបណ្តាញសហគមន៍ព្រៃឡង់ និងមិត្តព្រៃឈើ ក៏បានសំណូមពរដល់រដ្ឋាភិបាលឲ្យជួយបង្ហាញឈ្មោះក្រុមហ៊ុនពិតប្រាកដដែលបានសម្រេចលុបចោលដីសម្បទានក្នុងតំបន់ព្រៃឡង់ ដើម្បីឲ្យពួកគេបានចូលរួមចំណែកសហការ និងតាមដានផង។
ទន្ទឹមនោះ បណ្តាញសហគមន៍ព្រៃឡង់ ក៏បានបង្ហាញការស្វាគមន៍ផងដែរដល់សេចក្តីព្រាងអនុក្រិត្យរបស់រដ្ឋាភិបាល ដើម្បីដាក់ព្រៃឡង់ជាតំបន់ការពាររួមគ្នាជាមួយសហគមន៍ព្រៃឡង់ក្នុងបំណងជំរុញឲ្យរដ្ឋាភិបាលកំណត់ព្រំប្រទល់ និងការគ្រប់គ្រងព្រៃឈើផងដែរ។ ហើយសង្ឃឹមថា រដ្ឋាភិបាលនឹងពន្លឿនដំណើរការនេះ ដើម្បីកុំឲ្យព្រៃឡង់បាត់បង់ដោយសារតែការកាប់បំផ្លាញ ការទន្រ្ទាន និងការគំរាមកំហែងដល់ព្រៃឈើ៕
No comments:
Post a Comment
yes