ឃាតកម្មលើអ្នកកាសែតខ្មែរម្នាក់កាលពីពាក់កណ្ដាលខែកញ្ញា បានបន្ថែមចំនួនទៅលើចំនួនសរុបនៃអ្នកកាសែតនៅតាមប្រទេសនានា នៅលើពិភពលោក ដែលបាត់បង់ជីវិតក្នុងពេលបំពេញការងាររបស់ខ្លួន។
ពលរដ្ឋនាំគ្នាមកមើលសាកសពអ្នកសារព័ត៌មាន "វីរជនខ្មែរ" លោក ហង្ស សិរីឧត្ដម ដែលត្រូវគេរកឃើញនៅក្នុងឃ្លុបក្រោយរថយន្ត នាឃុំចាអ៊ុង ស្រុកអូរជុំ ខេត្តរតនគិរី នៅថ្ងៃទី១១ ខែកញ្ញា ឆ្នាំ២០១២។
វិទ្យាស្ថានសុវត្ថិភាពព័ត៌មានអន្តរជាតិ (International News Safety Institute=INSI) បានផ្សាយរបាយការណ៍អំពីគ្រោះថ្នាក់ដល់ជីវិតលើអ្នកសារព័ត៌មានដែលបំពេញការងារតាមវិជ្ជាជីវៈរបស់ខ្លួនថា ចាប់ពីដើមឆ្នាំ២០១២ រហូតដល់ខែកញ្ញា អ្នកកាសែតបានបាត់បង់ជីវិតមានចំនួន ៩៩នាក់ រួមទាំងអ្នកកាសែតខ្មែរផង។ ក្នុងខែកញ្ញា តែមួយគត់ អ្នកកាសែតស្លាប់មានចំនួន ១៣នាក់ គឺនៅប្រទេសកម្ពុជា សូម៉ាលី ស៊ីរី អ៊ីរ៉ាក់ និងប្រទេសតង់ហ្សានី។ ចំនួននេះគឺច្រើនជាងពីឆ្នាំ២០១១ ដោយរាប់ពេញមួយខែតុលា ផង។
ក្រុមប្រឹក្សាសិទ្ធិមនុស្សនៃអង្គការសហប្រជាជាតិ (អ.ស.ប) បានបើកសម័យប្រជុំស្ដាប់របាយការណ៍របស់បណ្ឌិតសាស្រ្តាចារ្យ សុរិយា ស៊ូប៊ែឌី (Surya P. Subedi) អ្នករាយការណ៍ពិសេសនៃអ.ស.បផ្នែកសិទ្ធិមនុស្សប្រចាំកម្ពុជា អំពីស្ថានការណ៍សិទ្ធិមនុស្សនៅកម្ពុជា កាលពីថ្ងៃទី២៥ កញ្ញា។ ក្នុងកិច្ចពិភាក្សានៅក្រុងហ្សឺណែវ ប្រទេសស្វីស តំណាងប្រទេសជាច្រើនបានសំដែងការយកចិត្តដាក់ចំពោះអំពើហិង្សាទៅលើក្រុមការពារសិទ្ធិមនុស្ស និងអ្នកកាសែត ហើយអំពាវនាវឲ្យរាជរដ្ឋាភិបាលស៊ើបអង្កេតករណីទាំងអស់នោះ។
តំណាងរាជរដ្ឋាភិបាលបានឆ្លើយតបវិញថា អ្វីៗស្រេចតែលើរាជរដ្ឋាភិបាលដើម្បីពិចារណាចំពោះអនុសាសន៍ទាំងឡាយដែលអនុវត្តទៅបានសមស្រប ហើយឆ្លុះបញ្ចាំងអំពីសេចក្ដីត្រូវការប្រទេសកម្ពុជា។
ទាក់ទងនឹងករណីឃាតកម្មលើរូបលោក ហង្ស សិរីឧត្តម អ្នកកាសែតស៊ើបអង្កេតបម្រើការងារឲ្យកាសែតវរជនខ្មែរ សារព័ត៌មានវរជនខ្មែរ បានបញ្ជាក់ក្នុងសេចក្ដីថ្លែងចូលរួមមរណទុក្ខកាលពីថ្ងៃទី១១ កញ្ញា ថា មានទាក់ទិននឹងរបាយការណ៍ស្ដីអំពីអាជីវកម្មខុសច្បាប់លើព្រៃឈើនៅភាគឦសានប្រទេស។
មន្ត្រីស៊ើបអង្កេតនៃសមាគមអាដហុក ប្រចាំខេត្តរតនគិរី លោក ឆាយ ធី បានរៀបរាប់អំពីភាពសាហាវយង់ឃ្នងនៃឃាតកទៅលើរូបលោក ហង្ស សិរីឧត្តម បន្ទាប់ពីគេរកឃើញសាកសពរបស់លោក៖ «ពេលដែលយើងទៅដល់សាកសពអត់ឃើញក្នុងឡានទេ ប៉ុន្តែមានក្លិនជះស្អុយពីឃ្លុបក្រោយ។ អ៊ីចឹងហើយសមត្ថកិច្ចទៅបើកឃ្លុបក្រោយឃើញសាកសពហ្នឹងដាក់ក្នុងឡានផ្កាប់មុខហ្នឹង យើងឃើញលលាដ៍ក្បាលពីខាងក្រោយគាត់បែក បែកដោយស្នាមកាប់ ឬវាយនឹងដំបងឈើ។ដោយសារសភាពហើមរលួយអត់ឃើញមានឈាមទេ មានតែខ្ទុះផ្ងារឡើង ហើយដាក់លើដីបានយើងឃើញផ្ទៃមុខជនរងគ្រោះត្រូវបានវាយទក់អស់ផ្ទៃមុខ ឡើងសំប៉ែតផ្ទៃមុខសាកសព»។
អាជ្ញាធរមានសមត្ថកិច្ចបានចាប់ខ្លួនជនសង្ស័យជាភ្នាក់ងារកងរាជអាវុធហត្ថមួយរូប មានឋានន្តរសក្ដិជាព្រឹន្ទបាលទោ ឈ្មោះ អ៊ាន ប៊ុនហេង ហៅ អេង និងភរិយាឈ្មោះ វី បម្រុងបញ្ជូនទៅតុលាការខេត្តរតនគិរី នៅថ្ងៃទី១៥ កញ្ញា។
សមត្ថកិច្ចប៉ូលិសអះអាងថា ការស៊ើបអង្កេតរយៈពេល ៤៨ម៉ោងលើឃាតកម្មនោះ បានចប់រួចរាល់ជាស្ថាពរ។ ចៅក្រមស៊ើបសួរនៃតុលាការខេត្តរតនគិរី នៅថ្ងៃទី១៦ ខែកញ្ញា បានសម្រេចឃុំខ្លួនជនជាប់ចោទនៅពន្ធនាគារខេត្តជាបណ្តោះអាសន្ន។ មកទល់ពេលនេះ គេមិនទាន់ដឹងថា តើជនសង្ស័យមានទោសកម្រិតណា ឬគ្មានទោសនៅឡើយទេ៕
No comments:
Post a Comment
yes