មន្ត្រីស្ថាប័នអយ្យការតុលាការខេត្តរតនគិរី បានចេញដីកាកោះអញ្ជើញសកម្មជនសិទ្ធិមនុស្ស ៣នាក់ និងអ្នកសារព័ត៌មានមួយរូបឲ្យទៅឆ្លើយបំភ្លឺពីដំណើររឿងញុះញង់ឲ្យប្រព្រឹត្តបទឧក្រិដ្ឋ។
មន្ត្រីសិទ្ធិមនុស្សនៃសមាគមអាដហុក (Adhoc) និងមន្ត្រីមជ្ឈមណ្ឌលសិទ្ធិមនុស្សកម្ពុជា (CCHR) រួមទាំងអ្នកយកព័ត៌មានវិទ្យុអាស៊ីសេរី (RFA) នឹងត្រូវចូលខ្លួនទៅបំភ្លឺនៅស្ថាប័នអយ្យការតុលាការខេត្តរតនគិរី នៅពាក់កណ្ដាលខែតុលា ឆ្នាំ២០១២ ខាងមុខនេះ ក្នុងដំណើររឿងញុះញង់ឲ្យប្រព្រឹត្តបទឧក្រិដ្ឋដោយបានសម្រេច។
ព្រះរាជអាជ្ញារងអមតុលាការខេត្តរតនគិរី លោក ជា សុភ័ក្ត្រ កាលពីថ្ងៃទី២៨ ខែកញ្ញា ឆ្នាំ២០១២ បានចេញដីកាកោះចំនួនបួនផ្សេងគ្នា អញ្ជើញអ្នកសម្របសម្រួល និងមន្ត្រីផ្នែកអង្កេតសមាគមអាដហុក ខេត្តរតនគិរី គឺលោក ប៉ែន ប៊ុណ្ណារ៍ និងលោក ឆាយ ធី។ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ និងអ្នកយកព័ត៌មានវិទ្យុអាស៊ីសេរី លោក រដ្ឋា វីសាល ឲ្យចូលទៅបំភ្លឺនៅស្ថាប័នអយ្យការនៅថ្ងៃទី១០ និងថ្ងៃទី១១ ខែតុលា ខាងមុខនេះ។
ការកោះហៅនេះ ធ្វើឡើងក្រោយពេលជាង ២០ថ្ងៃបន្ទាប់ពីអ្នកសារព័ត៌មានវរជនខ្មែរ ត្រូវគេសម្លាប់ និងតែប៉ុន្មានថ្ងៃក្រោយដែលអ្នកយកព័ត៌មានកាសែត តាព្រហ្ម ត្រូវគេវាយដោយអាវុធធ្វើឲ្យរបួសនៅខេត្តរតនគិរី។
អ្នកសម្របសម្រួលសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ នៅថ្ងៃច័ន្ទ ទី១ ខែតុលា ឆ្នាំ២០១២ ចាត់ទុកដីកាកោះហៅនេះមានលក្ខណៈគំរាមកំហែង បំភិតបំភ័យទៅលើស្មារតី និងសិទ្ធិសេរីភាពបញ្ចេញមតិរបស់អ្នកការពារសិទ្ធិមនុស្ស ហេតុនេះលោកបានស្នើសុំមេធាវីការពារក្តីដើម្បីឆែកមើលសំណុំរឿងចោទប្រកាន់នេះ។
លោកសន្និដ្ឋានថា រឿងក្ដីនេះទំនងមានជាប់ពាក់ព័ន្ធទៅនឹងមន្ត្រីអាជ្ញាធរឃុំប៉ាតាង ដែលបានប្ដឹងចោទប្រកាន់លោកក្នុងបទឧក្រិដ្ឋប្រឆាំងអាជ្ញាធរដែនដី ដោយសារតែលោកបានប្រឹក្សាអប់រំប្រជាពលរដ្ឋយល់ដឹងពីសិទ្ធិតវ៉ាដីធ្លី សិទ្ធិការពារព្រៃឈើសហគមន៍ជនជាតិដើមភាគតិច។
លោក ប៉ែន ប៊ុណ្ណារ៍៖ «វាកើតចេញពីអាជ្ញាធរ សភាពការណ៍នៅក្នុងខេត្តយើងហ្នឹងវាធ្ងន់ធ្ងរណាស់សំរាប់អ្នកការពារសិទ្ធិមនុស្ស ហើយនិងអ្នកសារព័ត៌មាន។ យើងបានជូនដំណឹងទៅសហគមន៍ផ្សេងដែលគាត់រងគ្រោះដោយសារដីធ្លីទាំងអស់ហ្នឹងណា! គាត់ថា គាត់នឹងមកចូលរួមជាមួយយើងនៅថ្ងៃទី១១ ប្រហែលជា ១.០០០នាក់ ពាក់ព័ន្ធជាមួយនឹងដីកាកោះយើងដែរ»។
ចំណែកប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍បញ្ជាក់ថា លោកនឹងចូលខ្លួនទៅបំភ្លឺពីករណីនេះ ពីព្រោះលោកមិនបានធ្វើកំហុសអ្វីដូចការចោទនោះទេ។
លោកកត់សំគាល់ថា អង្គការលោកបានរកឃើញបញ្ហាមិនប្រក្រតីច្រើនរបស់អតីតចៅក្រមស៊ើបអង្កេតតុលាការ និងមន្ត្រីអាជ្ញាធរមូលដ្ឋានក្នុងខេត្តនេះ ដូច្នេះលោកសន្និដ្ឋានថា រឿងក្តីនេះមានទំនាក់ទំនងទៅនឹងការខឹង ឬគំនុំរបស់មន្ត្រីពាក់ព័ន្ធប្រព្រឹត្តរឿងមិនត្រឹមត្រូវពុករលួយ៖ «ចំពោះខ្ញុំមិនមានស្អីភ្ញាក់ផ្អើលទេ ព្រោះអ្វីការងារយើងធ្វើនេះ គឺយើងតែងតែប្រឈមហើយ។ យើងដឹងថា អ្នកកាន់អំណាច អ្នកមានអំណាច គាត់អត់អាចធ្វើអ្វីស្រេចចិត្តគាត់ខឹងគាត់ស្អីប៉ះពាល់ផលប្រយោជន៍»។
ព្រះរាជអាជ្ញារងអមតុលាការខេត្តរតនគិរី លោក ជា សុភ័ក្ត្រ បានបដិសេធថា លោកមិនមានចេតនាចេញដីកាគំរាមកំហែងស្មារតីសកម្មជនសិទ្ធិមនុស្សអ្វីនោះទេ ប៉ុន្តែដោយសារសំណុំរឿងក្តីដែលលោកកំពុងគ្រប់គ្រងមានច្រើនពេក ហេតុនេះលោកចេញដីកាកោះហៅចុងចោទរឿងនេះមកបញ្ចប់នីតិវិធី ដោយសារតែមានពាក្យបណ្ដឹងចោទប្រកាន់មន្ត្រីសិទ្ធិមនុស្ស និងអ្នកសារព័ត៌មាន៖ «ខ្ញុំថា ហៅមកដើម្បីបំពេញនីតិវិធីឲ្យខ្ញុំធ្វើដើម្បីបញ្ចប់សំណុំរឿងកុំឲ្យទុកនៅច្រើនពេក បើគេប្ដឹងអ៊ីចឹង»។
មន្ត្រីសមាគមអាដហុក លោក ប៉ែន ប៊ុណ្ណារ៍ និងអ្នកយកព័ត៌មានវិទ្យុអាស៊ីសេរី លោក រដ្ឋា វីសាល កាលពីឆ្នាំ២០០៨ ក៏មានពាក្យប្ដឹងចោទប្រកាន់ពីបទញុះញង់ និងសមគំនិតញុះញង់ជនជាតិដើមភាគតិចនៅឃុំប៉ាតាង ស្រុកលំផាត់ ខេត្តរតនគិរី ឲ្យប្រព្រឹត្តបទល្មើសដូចគ្នា ហើយរហូតមកទល់នឹងថ្ងៃច័ន្ទនេះ ប្រភពមន្ត្រីតុលាការមួយរូបសុំមិនបញ្ចេញឈ្មោះឲ្យដឹងក្រៅផ្លូវការថា មន្ត្រីស្ថាប័នអយ្យការតុលាការខេត្តរតនគិរី បានសម្រេចលើកលែងចោទប្រកាន់រឿងក្តីនេះហើយ។
ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា កាលពីខែកញ្ញា ឆ្នាំ២០០៩ សំដែងការព្រួយបារម្ភថា ការចេញដីកាកោះពាក់ព័ន្ធបណ្ដឹងកាលពីខែវិច្ឆិកា ឆ្នាំ២០០៨ ចោទប្រកាន់អ្នកការពារសិទ្ធិមនុស្សទាំងពីរ ទំនងត្រូវគេប្រើប្រាស់ជាបណ្ដឹងតាមផ្លូវតុលាការដើម្បីយាយី និងដាក់កំហិតលើសេរីភាពនៃការបញ្ចេញមតិពាក់ព័ន្ធប្រយោជន៍សាធារណៈ ជាពិសេសបញ្ហាដីធ្លីដែលមិនទាន់ដោះស្រាយរួចនៅខេត្តរតនគិរី។ ការិយាល័យបានអំពាវនាវឲ្យបញ្ចប់ការយាយីចំពោះអ្នកការពារសិទ្ធិមនុស្សនៅខេត្តរតនគិរី៕
No comments:
Post a Comment
yes