លោកបណ្ឌិតរដ្ឋ ជាម យៀប ថ្លែងទៅកាន់ក្រុមយុវជនស្ដីពីបញ្ហាបូមយករ៉ែប្រេង
នៅសាលាគរុកោសល្យក្នុងរាជធានីភ្នំពេញ កាលពីថ្ងៃទី២២ ខែវិច្ឆិកា ឆ្នាំ២០១២
ក្រុមយុវជនជួបជុំគ្នាពិភាក្សា និងស្វែងរកព័ត៌មានអំពីចំណូលធនធានប្រេង រ៉ែ និងការប្រើប្រាស់ធនធានរ៉ែនោះឲ្យមានប្រសិទ្ធភាព តម្លាភាព និងជៀសវាងអំពើពុករលួយ នៅគ្រាដែលគម្រោងរបស់រដ្ឋាភិបាលក្នុងការបូមយកប្រេងនៅបាតសមុទ្រកម្ពុជា។
គម្រោងទាញយករ៉ែប្រេង នៅខេត្តព្រះសីហនុ នៅក្នុងឆ្នាំ២០១២ នេះ ត្រូវបានបរាជ័យ ដោយសារក្រុមហ៊ុនទទួលវិនិយោគនោះបានពន្យារពេលរហូតដល់ឆ្នាំ២០១៦ ដោយសារមិនបានបញ្ចេញព័ត៌មានពីបញ្ហានេះ មិនទាន់ច្បាស់លាស់នៅឡើយ។
តំណាងអង្គការអភិវឌ្ឍន៍ធនធានយុវជន បានឲ្យដឹងថា ការពន្យារពេលរបស់ក្រុមហ៊ុនអាមេរិកឈ្មោះ សឺវរ៉ុន (Chevron) បូមយកប្រេងពីបាតសមុទ្រនៅប្លុកអេ (A) ស្ថិតនៅភាពអាថ៌កំបាំងនៅឡើយ គឺមិនទាន់មានព័ត៌មានច្បាស់លាស់អំពីបញ្ហានេះទេ។ ការថ្លែងដូច្នេះ នៅក្នុងសន្និសីទសារព័ត៌មាននៃវេទិកាយុវជន ស្ដីពីការយល់ដឹងរបស់យុវជនទៅកាលានុវត្តភាពរបស់កម្ពុជា ក្នុងការធានាពីតម្លាភាពចំណូលពីវិស័យឧស្សាហកម្មនិស្សារណកម្ម ដែលគេធ្វើឡើងនៅសាលាគរុកោសល្យក្នុងរាជធានីភ្នំពេញ នៅថ្ងៃទី២២ វិច្ឆិកា ឆ្នាំ២០១២។
ប្រធានអង្គការកម្មវិធីអភិវឌ្ឍន៍ធនធានយុវជន (YRDP) លោក ជាង សុខា មានប្រសាសន៍ថា វិស័យឧស្សាហកម្មនិស្សារណកម្មនេះ មិនត្រូវបានរដ្ឋាភិបាលបញ្ចេញព័ត៌មានឲ្យដឹងជាសាធារណៈទេ ដូច្នេះលោកបានរៀបចំវេទិកាយុវជន ដើម្បីឲ្យយុវជនមានឱកាសសួរដេញដោលអំពីបញ្ហានេះទៅអ្នកតំណាងរាស្ត្រ ពីព្រោះថា យុវជនជាកម្លាំងចលករយ៉ាងសំខាន់ដើម្បីឲ្យសង្គមមានការផ្លាស់ប្ដូរ។
កន្លងមក លោកនាយករដ្ឋមន្ត្រី ហ៊ុន សែន បានប្រកាសថា ក្រុមហ៊ុនសឺវរ៉ុន គ្រោងបូមយកដំណក់ប្រេងដំបូងនៅថ្ងៃទី១២ ខែ១២ ឆ្នាំ២០១២ នៅវេលាម៉ោង១២ ប៉ុន្តែគម្រោងនេះត្រូវបានបរាជ័យទៅវិញ ដោយសារក្រុមហ៊ុនសឺវរ៉ុន បានពន្យារពេលរហូតទៅដល់ឆ្នាំ២០១៦ ដោយសារតែកម្ពុជា កំពុងតែធ្វើសេចក្តីព្រាងច្បាប់ស្ដីពីការគ្រប់គ្រងចំណូលប្រេង និងឧស្ម័ននៅឡើយ។
ម្យ៉ាងវិញទៀត ក្រុមហ៊ុនសឺវរ៉ុន និងរដ្ឋាភិបាលកម្ពុជា មិនទាន់បានចុះហត្ថលេខាស្ដីពីការធ្វើអាជីវកម្មប្រេងនៅឡើយទេ នៅខណៈក្រុមហ៊ុននេះកំពុងតែស្ថិតនៅក្នុងដំណើរការរុករកប្រេងនោះ។
ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម លោកបណ្ឌិតរដ្ឋ ជាម យៀប បានឆ្លើយតបទៅកាន់ក្រុមយុវជនថា ការពន្យារពេលបូមយកប្រេងពីបាតសមុទ្រកម្ពុជា នេះ ដោយសារក្រុមហ៊ុនសឺវរ៉ុន ត្រូវសិក្សាបន្ថែមទៀតអំពីការរុករក និងបូមយកប្រេងនេះ។
និស្សិតនៃសាកលវិទ្យាល័យពុទ្ធិកសីហនុរាជ ឈ្មោះ ស៊ីនួន បានលើកឡើងថា វាជាកត្តាសំខាន់ណាស់នៅក្នុងស្ថានភាពប្រទេសកម្ពុជា បច្ចុប្បន្ន សម្រាប់ក្រុមយុវជនទទួលបានព័ត៌មានអំពីចំណូលនានារបស់រដ្ឋាភិបាល ពិសេសគឺចំណូលបានមកពីធនធានរ៉ែ និងប្រេង ហើយប្រើប្រាស់ចំណូលពីធនធានទាំងនេះឲ្យមានប្រសិទ្ធភាព តម្លាភាព និងគ្មានអំពើពុករលួយ។
ក្រុមហ៊ុនសឺវរ៉ុន ជាក្រុមហ៊ុនប្រេងធំមួយរបស់អាមេរិក ក្រុមហ៊ុននេះនឹងចាប់ផ្ដើមអភិវឌ្ឍតំបន់អណ្ដូងប្រេងលើផ្ទៃសមុទ្រជាលើកដំបូងនៅកម្ពុជា នាឆ្នាំក្រោយ។ ម្យ៉ាងទៀត គេសង្ឃឹមថា កម្ពុជា នឹងក្លាយជាគោលដៅចាប់អារម្មណ៍នៅក្នុងតំបន់ សម្រាប់អ្នកវិនិយោគមកបណ្ដាក់ទុនលើវិស័យប្រេង និងឧស្ម័ន។ ក្រុមហ៊ុនសឺវរ៉ុន មានចំណែក ៣០% នៅក្នុងប្លុកអេ ដោយមានក្រុមហ៊ុនផ្សេងទៀតជាដៃគូពាណិជ្ជកម្ម ដូចជា ក្រុមហ៊ុនមីតស៊ុយ (Mitsui & Co) ក្រុមហ៊ុនគ្រីស អ៊ីននើជី (Kris Energy) និងក្រុមហ៊ុនជីអេស កាល់តិច (GS Caltex Corp) នឹងមានមុខងារជាក្រុមហ៊ុនប្រតិបត្តិការគម្រោងនេះ។
ប្រទេសកម្ពុជា គ្រោងបូមយកប្រេងពីបាតសមុទ្រជាលើកដំបូង កាលពីឆ្នាំ២០១០ ប៉ុន្តែគម្រោងនេះ បានពន្យាររហូតដល់ចុងឆ្នាំ២០១២។ ប៉ុន្តែនៅពេលនេះ គម្រោងនេះត្រូវបានពន្យារជាថ្មីម្ដងទៀត រហូតដល់ឆ្នាំ២០១៦។
លោក ជាម យៀប បញ្ជាក់ទៀតថា នៅខណៈដែលទីផ្សារប្រេងនៅលើទីផ្សារអន្តរជាតិ មានតម្លៃខ្ពស់នោះ រដ្ឋាភិបាលបានបញ្ចេញទុនជួយទប់តម្លៃប្រេងកុំឲ្យឡើងថ្លៃខ្ពស់ពេកក្នុងមួយខែជាង ២០លានដុល្លារអាមេរិក៕
No comments:
Post a Comment
yes