កិច្ចប្រជុំបិទទ្វារនេះ បានធ្វើឡើងដោយប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា លោក ជាម យៀប ជាមួយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរួមជាមួយមន្រ្តីជំនាញមួយចំនួនទៀត ចំពោះគម្រោងចំណាយថវិកាជាតិឆ្នាំ២០១៣។
លោក ជាម យៀប បានឲ្យដឹងកាលពីថ្ងៃទី២២ ខែវិច្ឆិកា មុនកិច្ចប្រជុំនៅថ្ងៃនេះថា កញ្ចប់ថវិកាជាតិឆ្នាំ២០១៣ មានចំនួន ១២លានលានរៀល ឬប្រមាណជាង៣ពាន់លានដុល្លារអាមេរិក។
បើតាមលោក ជាម យៀប មានវិស័យចំនួន៧ ជាស្ថាប័នអាទិភាពដែលនឹងទទួលបានថវិកាជាតិច្រើនជាងគេ តែលោកមិនបានបញ្ជាក់ពីឈ្មោះក្រសួង និងចំនួនទឹកប្រាក់ដែលត្រូវចំណាយនោះទេ។
ប្រធានក្រុមតំណាងរាស្ត្រគណបក្សសមរង្ស៉ី លោក សុន ឆ័យ មានប្រសាសន៍ថា ការពិគ្រោះយោបល់បិទទ្វារបែបនេះ មិនបង្ហាញពីតម្លាភាពក្នុងនាមប្រទេសប្រកាន់លិទ្ធិប្រជាធិបតេយ្យទេ។ លោកថា ទីបំផុត ពលរដ្ឋកម្ពុជាក្រីក្រជាអ្នករងគ្រោះ ដោយសារជំពាក់បំណុលបរទេស ៖" តាមនយោបាយខ្ចីលុយយកមកចាយហើយបណ្ដោយឲ្យមានអំពើពុករលួយលួចប្រាក់ជាតិរាប់ពាន់ មិនមែន៥០០លានដុល្លារដូចស្ថានទូតអាមេរិកកាំងធ្លាប់ប្រកាសប្រាំប្រាំមួយឆ្នាំមុនទេ ។ឥឡូវតាមការប៉ានស្មានថ្មីនេះជាងមួយពាន់លានដែលត្រូវបាត់បង់ទៅ។ យើងថាត្រូវតែប្រមូលលុយហ្នឹងមក ដើម្បីយកមកចែកជូនដល់មន្ត្រីរាជការ គ្រូបង្រៀន កងកម្លាំងប្រដាប់អាវុធយើងដែលខិតខំបម្រើប្រយោជន៍ជាតិនោះ មិនអាចឲ្យគ្នារស់នៅវេទនារហេមរហាមទេ" ។
បើទោះជាយ៉ាងណា លោក សុន ឆ័យ ឲ្យដឹងថា នៅថ្ងៃចន្ទដើមសប្តាហ៍ក្រោយ សមាជិករដ្ឋសភាគណបក្សប្រឆាំងសមរង្ស៊ី និង សិទ្ធិមនុស្ស នឹងស្នើធ្វើវិសោធនកម្មច្បាប់ស្តីពីពង្រាងថវិកាជាតិនេះ។
អ្នកស្រាវជ្រាវជាន់ខ្ពស់ លោក កែម ឡី មានប្រសាសន៍ថា ការប្រើប្រាស់ថវិកាជាតិកន្លងមករបស់រដ្ឋាភិបាល ច្រើនមិនចំគោលដៅ ដោយផ្តោតខ្លាំងទៅលើវិស័យយោធា ជាជាងវិស័យអទិភាព ដូចជាផ្នែកសង្គមកិច្ច សុខាភិបាល និងកសិកម្មជាដើម។ លោកថា ការស្នើសុំបង្កើនកញ្ចប់ថវិកាជាតិនៅឆ្នាំ២០១៣នេះ ទំនងជាពង្រឹងការគ្រប់គ្រងអំណាចច្រើនជាង ៖ "ទាំងផ្នែកការពារជាតិ ខ្ញុំគិតថាប្រទេសយើង ត្បិតតែថាយើងត្រូវការការពារខ្លះ ក៏ប៉ុន្តែយើងមិនត្រូវចំណាយច្រើនទេ ពីព្រោះអីយើងមិនអាចទៅច្បាំងអ្នកណាឈ្នះទេ ទោះបីជាយើងចង់ច្បាំងជាមួយថៃ យើងចង់ច្បាំងជាមួយវៀតណាត មិនអាចទៅរួចទេ នៅក្នុងស្ថានភាពបច្ចុប្បន្ន ក៏ប៉ុន្តែយើងរៀបចំគ្រាន់តែការពារសន្តិសុខល្មមៗ ខ្ញុំគិតថាបាន ហើយមួយចរន្តពិភពលោក គេមិនត្រូវការកម្លាំងយោធាទេ យើងពង្រឹងតែវិស័យការពារ យើងពង្រឹងតែវិស័យការទូត យើងពង្រឹងតែប្រជាប្រិយភាពនៅក្នុងប្រទេស កែប្រទេសឲ្យមានប្រជាធិបតេយ្យទៅ មិនខ្វះអ្នកមកជួយទេ បើសិនជាមានបញ្ហា"។
សូមបញ្ជាក់ថា ថវិកាជាតិឆ្នាំ២០១២ បានចំណាយសរុបប្រមាណជិតពីរពាន់ប្រាំពីររយលានដុល្លារអាមេរិក (២.៦៩២) គឺកើនឡើងជាង ១៣% បើធៀបនឹងច្បាប់ថវិកាជាតិឆ្នាំ២០១១។ ចំណែកនៅឆ្នាំ២០១៣ ថវិកាជាតិ នឹងកើនរហូតដល់ប្រមាណជាង៣ពាន់លានដុល្លារអាមេរិក៕
No comments:
Post a Comment
yes